ຈາກການລາຍງານຂ່າວຂອງໜ່ວຍກູ້ໄພຯ ອົງການກາແດງລາວໃຫ້ຮູ້ວ່າ ໄດ້ເຫດອຸບັດເຫດຂຶ້ນໃນເສັ້ນທາງກຳລັງກໍ່ສ້າງ ລະຫວ່າງບ້ານໜອງໄຮ-ບ້ານດົງຄຳຊ້າງ 5 ຄືນຊ້ອນແລ້ວ ທີ່ໜ່ວຍກູ້ໄພໄດ້ໄປໃຫ້ການຊ່ວຍເຫຼືອ. ດັ່ງນັ້ນ, ມື້ນີ້ ທີມຂ່າວພວກເຮົາ ຈຶ່ງໄດ້ເດິນທາງລົງໄປເບິ່ງສະພາບຕົວຈິງ ຂອງເສັ້ນທາງດັ່ງກ່າວ.

ຈາກການລົງເບິ່ງຕົວຈິງ ພວກເຮົາໄດ້ເຫັນວ່າຕະຫຼອດເສັ້ນທາງ ເມືອງນ້ອຍ-ຊຽງດາ-ດົງຄຳຊ້າງ-ໜອງແຫ້ວ... ແລະໜອງໄຮ-ດົງຄຳຊ້າງ ເສັ້ນທາງຖືກປູດ້ວຍຄອນກີດສຳເລັດແລ້ວ ປະມານ 90% ຍັງເຫຼືອແຕ່ເສັ້ນທາງບາງຕອນສັ້ນໆ ທີ່ບໍ່ທັນໄດ້ປູເບຕົງ, ປາກທໍ່ລະບາຍນ້ຳເສຍຍັງບໍ່ຖືກອັດຈັກບ່ອນ, ທາງຄົນບາງບາງບ່ອນກຳລັງທຳການກໍ່ສ້າງ, ປ້າຍຈະລາຈອນແລະໄຟເຍືອງທາງຍັງບໍ່ທັນໄດ້ຕິດຕັ້ງ.
ຈາກການສອບຖາມ ປກສ ກຸ່ມບ້ານດົງຄຳຊ້າງ ໄດ້ເຮັດໃຫ້ຮູ້ວ່ານັບຕັ້ງແຕ່ເລິ່ມການກໍ່ສ້າງ ເສັ້ນທາງດັ່ງກ່າວເປັນຕົ້ນມາ ໄດ້ເກີດອຸບັດເຫດຂຶ້ນນັບຄັ້ງບໍ່ຖ້ວນ ໂດຍສະເພາະແມ່ນເລິ່ມເຂົ້າລະດູແລ້ງຜ່ານມາ ແລະພາຍໃນເດືອນດຽວຫຼ້າສຸດນີ້ໄດ້ມີຜູ້ເສຍຊີວິດໄປແລ້ວ 3 ສົບ ສາເຫດແມ່ນຍ້ອນການດື່ມສິ່ງມືນເມົາ ຈາກຮ້ານບັນເທີງຫຼາຍໆຮ້ານຢູ່ບ້ານດົງຄຳຊ້າງ ແລ້ວຂີ່ລົດກັບແລ້ວກໍໄປຕຳກອງດິນ ທີ່ກອງຢູ່ກາງທາງ ຫຼືຕົກສົ້ນເສັ້ນທາງຄອນກີດ ທີ່ສຸດຈຸດປຸດໄວ້ ເຮັດໃຫ້ເສຍຊີວິດ ແລະບາດເຈັບສາຫັດໄປຫຼາຍລາຍ.
ສິ່ງທີ່ປະຊາຊົນຮຽກຮ້ອງຄື: ຂໍໃຫ້ພາກສ່ວນທີ່ກ່ຽວຂ້ອງ ຍ້າຍກອງດິນອອກຈາກທາງ, ເອົາດິນມາຖົມຈຸດສົ້ນສຸດຂອງທາງເບຕົງ ແລະຕັ້ງປ້າຍເຕືອນໃສ່ໃຫ້ຫຼາຍໆ ປ້າຍ ບໍ່ດັ່ງນັ້ນ ປີໃໝ່ປີນີ້ ອາດຈະມີຄົນໄດ້ຮັບບາດເຈັບ ຫຼືເສຍຊີວິດເພິ່ມອີກ ຢ່າງບໍ່ຕ້ອງສົງໄສ.