ການເບິ່ງໜັງເປັນກິດຈະກຳສຳລັບໃຜຫລາຍໆຄົນທີ່ມັກຈະເຮັດຍາມວາງຖ້າຢາກໄດ້ອັດທະລົດກໍຕ້ອງມີຂະໜົມແລະເຄື່ອງດື່ມຢູ່ໃກ້ໆມືໄວ້ຈັບຮັບປະທານເວລາໜັງກຳລັງມ່ວນອີກແຕ່ຮູ້ຫລືບໍ່ວ່າການຮັບປະທານອາຫານໃນຂະນະທີ່ເບິ່ງໜັງສາມາດເຮັດໃຫ້ຕຸ້ຍໄດ້ໂດຍສະເພາະໜັງເສົ້າທີ່ເຮັດໃຫ້ເຮົາເສຍນ້ຳຕາຍິ່ງເບິ່ງຍິ່ງເສົ້າກໍຍິ່ງຮັບປະທານຫລາຍຂຶ້ນ
ການສຶກສາລ່າສຸດຂອງ the Cornell Food and Brand Lab ໄດ້ເປີດເຜີຍວ່າການເບິ່ງໜັງແນວເສົ້າສົ່ງຜົນໃຫ້ຄົນເຮົາຮັບປະທານອາຫານຫລາຍກວ່າການເບິ່ງໜັງແນວຕະຫລົກໂດຍໃນການສຶກສາພົບວ່າຜູ້ທີ່ເບິ່ງໜັງໂລແມນຕິກຈະມີການຮັບປະທານປ໋ອບຄອນຫລາຍກວ່າຄົົນທີ່ເບິ່ງໜັງແນວຕະຫລົກເຖິງ28%ໃນຂະນະທີ່ຜູ້ທີ່ເບິ່ງໜັງເສົ້ານັ້ນຮັບປະທານປ໋ອບຄອນຫລາຍກວ່າຄົນເບິ່ງໜັງຕະຫລົກເຖິງ55 %ເລີຍຊຶ່ງນັ້ນເປັນສາເຫດຂອງຮອບແອວທີ່ເພີ່ມຂຶ້ນນັ້ນເອງ
ເຖິງແມ່ນວ່າການເບິ່ງໜັງເສົ້າຈະເປັນສາເຫດຂອງການຮັບປະທານທີ່ຫລາຍຂຶ້ນແຕ່ການແກ້ບັນຫາກໍບໍ່ແມ່ນວ່າຕ້ອງເຊົາເບິ່ງໜັງເສົ້າໄປເລີຍຕາບໃດທີ່ທ່ານປ່ຽນຂອງວ່າງທີ່ວ່າງຕໍ່ໜ້າຕອນທີ່ເບິ່ງໜັງຈາກຂອງວ່າງທີ່ເຮັດໃຫ້ຕຸ້ຍເປັນຂອງວ່າງທີ່ດີຕໍ່ສຸກຂະພາບຫລືຫມາກໄມ້ບັນຫາເລື່ອງການຮັບປະທານຫລາຍເກີນໄປກໍບໍ່ແມ່ນບັນຫາໂດຍDr. Brian Wansink ຫົວໜ້າທີມຜູ້ວິໄຈໄດ້ເປີດເຜີຍວ່າ ລະຫວ່າງການເບິ່ງໜັງຄົນເຮົາຈະບໍ່ຄ່ອຍສົນໃຈວ່າຄົນເຮົາຈັບຫຍັງເຂົ້າປາກດັ່ງນັ້ນຫາກປ່ຽນຈາກຂອງວ່າງທົ່ວໄປເປັນອາຫານເພື່ອສຸກຂະພາບກໍຈະຊ່ວຍເຮັດໃຫ້ໄດ້ປະໂຫຍດຫລາຍຂຶ້ນ ແຖມຍັງບໍ່ຕ້ອງກັງວົນເລື່ອງຄວາມຕຸ້ຍອີກ