ເສດຖະກິດສະຫະລັດອາເມຣິກາຫລາຍພາກສ່ວນ ສົ່ງສັນຍານໄດ້ຮັບຜົນກະທົບ ຫລັງທະນາຄານກາງສະຫະລັດ ກຽມປັບອັດຕາດອກເບ້ຍ.
ສຳນັກຂ່າວຕ່າງປະເທດ ລາຍງານໃນວັນທີ 18 ມີນາຜ່ານມານີ້ວ່າ ຈາກທີ່ທະນາຄານກາງສະຫະລັດອາເມຣິກາ ກຽມປະກາດຂຶ້ນອັດຕາດອກເບ້ຍເລັກໜ້ອຍ ເນື່ອງຈາກຕະຫລາດການຈ້າງງານເພີ່ມຂຶ້ນ ເຊິ່ງເຮັດໃຫ້ມີບັນຫາຕາມມາໃນພາກເສດຖະກິດຫລາຍດ້ານ ເຊິ່ງເລີ່ມສົ່ງສັນຍານທີ່ຈະໄດ້ຮັບຜົນກະທົບ ໂດຍພົບວ່າພາກການໃຊ້ຈ່າຍໃນຄົວເຮືອນ, ພາກການຜະລິດ ແລະ ກຳລັງການຊື້ຂອງຜູ້ບໍລິໂພກ ທີ່ເປັນຕົວເລກຊຸກດັນຫລັກຂອງເສດຖະກິດສະຫະລັດ ລ່າສຸດບໍ່ມີການເໜັງຕີງເທົ່າທີ່ຄວນ ໃນຂະນະທີ່ການສົ່ງອອກ ກໍເລີ່ມຊະລໍຕົວລົງ ເນື່ອງຈາກຄ່າເງິນໂດລາທີ່ແຂັງຄ່າຂຶ້ນ ລວມໄປເຖິງລາຍໄດ້ຂອງຮ້ານຄ້າຂາຍຍ່ອຍ ແລະ ຮ້ານອາຫານຫລຸດລົງເຊັ່ນກັນ, ເຖິງແມ່ນວ່າສະຫະລັດຈະມີການຈ້າງງານເພີ່ມຂຶ້ນເຖິງ 200,000 ກ່ວາອັດຕາ ໃນທ້າຍປີທີ່ຜ່ານມາ ອັນໄດ້ເຮັດໃຫ້ອັດຕາການວ່າງງານຫລຸດລົງ 5.5% ແຕ່ອັດຕາການເຕີບໂຕຂອງຄ່າຈ້າງຂັ້ນຕ່ຳລາຍປີ ຍັງຄົງຢູ່ທີ່ 2% ເຊິ່ງບໍ່ສາມາດກະຕຸ້ນກໍ່ໃຫ້ເກີດການຊື້ຂາຍໃນພາກຄົວເຮືອນໄດ້.