ພູ​ເຂົາ​ໄຟ​ຕູ​ຣິ​ອັນ​ບາ ໃນ​ຄອ​ສ​ຕາ​ຣິ​ກາ ເກີດ​ລະ​ເບີດ​ຮຸນ​ແຮງ​ໃນ​ຮອບ 20 ປີ ທາງ​ການ​ສັ່ງ​ອົບ​ພະ​ຍົບ​ປະ​ຊາ​ຊົນ ປິດ​ສະ​ໜາມ​ບິນ ແລະ ຖະ​ໜົນ​ທຸກ​ສາຍທີ່​ໄປ​ສູ່​ພູ​ເຂົາ​ໄຟ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 14 ມີ​ນາ​ນີ້​ວ່າ ພູ​ເຂົາ​ໄຟ​ຕູ​ຣິ​ອັນ​ບາ ຢູ່​ທາງ​ພາກ​ກາງ​ຂອງ​ປະ​ເທດ​ຄອ​ສ​ຕາ​ຣິ​ກາ ເກີດ​ລະ​ເບີດຂຶ້ນ 4 ຄັ້ງ ໂດຍ​ພົ່ນ​ແກ໊ສ ແລະ ຂີ້​ເຖົ່າ​ຖ່ານ​ສູງ 1 ກິ​ໂລ​ແມັດ​ຂຶ້ນ​ສູ່​ທ້ອງ​ຟ້າ ຂີ້​ເຖົ່າ​ຖ່ານ​ຕົກ​ໃສ່​ເຮືອນ​ຊານ​ປະ​ຊາ​ຊົນ ແລະ ລົດ​ຍົນ​ ຈົນ​ກາຍ​ເປັນ​ສີ​ເທົາ ແລະ ລອຍ​ໄປ​ຕົກ​ຮອດ​ນະ​ຄອນ​ຫລວງ​ໂຮ​ເຊ່ ເມືອງ​ຫລວງ​ຂອງ​ຄອ​ສ​ຕາ​ຣິ​ກາ ເຊິ່ງ​ຢູ່​ຫ່າງ​ຈາກ​ພູ​ເຂົາ​ໄຟ​ພຽງ​ແຕ່ 50 ກິ​ໂລ​ແມັດ ເຮັດ​ໃຫ້​ຕ້ອງ​ປິດ​ສະ​ໜາມ​ບິນ​ໂຮ​ເຊ່ ແລະ ປິດ​ຖະ​ໜົນ​ທຸກ​ສາຍ ທີ່​ມຸ່ງ​ໜ້າ​ໄປ​ຫາ​ພູ​ເຂົາ​ໄຟ ໂດຍ​ການ​ສັ່ງ​ອົບ​ພະ​ຍົບ​ປະ​ຊາ​ຊົນ​ທີ່​ອາ​ໄສ​ຢູ່​ໃນ​ລັດ​ສະ​ໝີ​ປະ​ມານ 2 ກິ​ໂລ​ແມັດ ອ້ອມ​ຮອບ​ພູ​ເຂົາ​ໄຟ ແຕ່​ຍັງ​ບໍ່​ທັນ​ມີ​ລາຍ​ງານ​ຄວາມ​ເສຍ​ຫາຍເທື່ອ.

ດ້ານ​ໜ່ວຍ​ງານ​ແຜ່ນ​ດິນ​ໄຫວ ແລະ ພູ​ເຂົາ​ໄຟ​ວິ​ທະ​ຍາ ຂອງ​ຄອ​ສ​ຕາ​ຣິ​ກາໄດ້​ລະ​ບຸ​ວ່າ ການ​ລະ​ເບີດ​ຄັ້ງ​ນີ້ ແມ່ນ​ຮຸນ​ແຮງ​ທີ່​ສຸດ​ໃນ​ຮອບ 20 ປີ ນັບ​ຕັ້ງ​ແຕ່​ປີ 1996 ເປັນ​ຕົ້ນ​ມາ ​ໂດຍພູ​ເຂົາ​ໄຟ​ຕູ​ຣິ​ອັນ​ບາ ແມ່ນເປັນ​ສະ​ຖານ​ທີ່​ທ່ອງ​ທ່ຽວ​ສຳ​ຄັນ​ຂອງ​ຄອ​ສ​ຕາ​ຣິ​ກາ.