ວຽກງານກວດກາທາງດ້ານການເງິນ ເປັນວຽກໜຶ່ງທີ່ມີຄວາມສຳຄັນ ເຊິ່ງໃນຜ່ານມາ ພັກ-ລັດຖະບານ ໂດຍສະເພາະ ຄະນະພັກ ແລະ ພະນັກງານຂັ້ນນຳທຸກຂັ້ນຂອງກະຊວງການເງິນ ໄດ້ຖືເປັນບຸລິມະສິດໜຶ່ງເພື່ອສ້າງວິໄນການເງິນ-ການຄັງ ເຮັດໃຫ້ຂົງເຂດດັ່ງກ່າວ ມີການຫັນປ່ຽນທີ່ຕັ້ງໜ້າດີຂຶ້ນ ສະນັ້ນ ເພື່ອປະຕິບັດໂຄງການການຮ່ວມມືລະຫວ່າງ ກະຊວງການເງິນ ສປປ ລາວ ແລະ ກະຊວງການເງິນ ສສ ຫວຽດນາມ ໃນວັນທີ 7 ມີນາຜ່ານມາ ທີ່ຫ້ອງປະຊຸມເຂດການຄ້າຊາຍແດນ ແດນສະຫວັນ ແຂວງສະຫວັນນະເຂດ ສປປ ລາວ ດ່ານສາກົນລາວ-ຫວຽດນາມ (ແດນສະຫວັນ-ລາວບາວ) ໄດ້ຈັດຕັ້ງພິທີມອບ-ຮັບປື້ມຄູ່ມື “ກວດກາການເງິນ” ເຊິ່ງເປັນໜຶ່ງໃນການຮ່ວມມືດ້ານວຽກງານກວດກາ ລະຫວ່າງສອງກະຊວງການເງິນຂອງລາວ ແລະ ຫວຽດນາມ ທີ່ໄດ້ຮັບການພັດທະນາທີ່ມີເນື້ອໃນອຸດົມສົມບູນ ມີປະສິດທິຜົນ ຈາກການພັດທະນາສະຖາບັນເອກະສານທາງດ້ານກົດໝາຍ ໃຫ້ການແລກປ່ຽນປະສົບການ ແລະ ການເຝິກອົບຮົມເປັນມືອາຊີບສຳລັບການກວດກາໃນການເງິນ.
ພິທີມອບ-ຮັບປື້ມຄູ່ມື “ກວດກາການເງິນ” ໃນຄັ້ງນີ້ ມີຈຳນວນທັງໝົດ 200 ຫົວ ປະກອບເປັນ 2 ພາສາ ມີ 500 ກວ່າໜ້າ ເຊິ່ງຕາງໜ້າກະຊວງການເງິນ ສປປ ລາວ ກ່າວຮັບໂດຍແມ່ນທ່ານ ໂພໄຊ ໝັ້ນພິລາວັນ ຫົວໜ້າກົມກວດກາການເງິນ ຕາງໜ້າກະຊວງການເງິນ ສສ ຫວຽດນາມ ກ່າວມອບໂດຍແມ່ນທ່ານ ດັ່ງ ຫງັອກຕ້ຽນ ຮອງຫົວໜ້າກົມກວດກາການເງິນ ໂດຍຊ້ອງໜ້າການເຂົ້າຮ່ວມເປັນສັກຂີພິຍານ ຂອງພະນັກງານທັງສອງຝ່າຍປື້ມຄູ່ມື “ກວດກາການເງິນ” ປະກອບດ້ວຍ 7 ຫົວຂໍ້ໃຫຍ່ ແລະ ມີ 17 ວິຊາ ທີ່ໄດ້ກຳນົດເນື້ອຫາໃນການກວດກາທາງດ້ານການເງິນ ຂະບວນການກວດກາງົບປະມານຂັ້ນແຂວງ-ຂັ້ນສູນກາງ ຂະບວນການກວດກາງົບປະມານຂັ້ນເມືອງ ທີ່ຂຶ້ນກັບແຂວງ ແລະ ສູນກາງ ຂັ້ນຕອນການກວດສອບທາງດ້ານການເງິນ ສຳລັບໂຄງການກໍ່ສ້າງ ຂະບວນການກວດກາທາງດ້ານການເງິນ ຢູ່ໃນຫ້ອງການຂອງການບໍລິຫານ ຂັ້ນຕອນການກວດສອບທາງດ້ານການເງິນ ຢູ່ໃນໜ່ວຍບໍລິການສາທາລະນະ ຂະບວນການກວດກາທາງດ້ານການເງິນໃນບໍລິສັດ ຂະບວນການກວດກາທາງດ້ານການເງິນໃນຄັງເງິນລັດ ຂະບວນການກວດກາທາງດ້ານການເງິນຂອງກອງທຶນງົບປະມານລັດ ຂະບວນການຂອງການກວດກາການປະມູນທີ່ໄດ້ ຂັ້ນຕອນການກວດສອບພາຍໃນສຳລັບໜ່ວຍງານຂອງກະຊວງການເງິນ ຂະບວນການກວດສອບພາສີ-ກວດກາພາສີ ຂະບວນການກວດສອບພາຍໃນຂົງເຂດພາສີ ຂະບວນການຂອງກິດຈະກຳກວດກາຂອງບໍລິສັດໃນຂົງເຂດຕະຫຼາດຫຼັກຊັບ ຂະບວນການກວດກາບໍລິສັດການຄຸ້ມຄອງກອງທຶນ ແລະ ການລົງທຶນຕະຫຼາດຫຼັກຊັບ ຂະບວນການຈັດການຫຼັງຈາກການກວດກາ ການກວດສອບທາງດ້ານການເງິນ ແລະ ການປ້ອງກັນຕ້ານການສໍ້ລາດບັງຫຼວງ ແລະ ອົງການຈັດຕັ້ງກະຊວງການເງິນ.
ໃນຊຸມປີຜ່ານມາ ກົມກວດກາການເງິນຂອງສອງປະເທດ ກໍ່ໄດ້ມີການພົວພັນ ແລະ ຮ່ວມມືທີ່ດີມາໂດຍຕະຫຼອດ ບົນພື້ນຖານກອບການຮ່ວມມືລະຫວ່າງ 2 ກະຊວງການເງິນຂອງລາວ ແລະ ຂອງຫວຽດນາມ ໂດຍທາງຝ່າຍຫວຽດນາມ ໄດ້ຊ່ວຍຈັດຕັ້ງການເຝິກອົບຮົມໃຫ້ລາວຫຼາຍຄັ້ງ ໃນຫົວຂໍ້ຕ່າງໆ ໃຫ້ທຶນເຝິກອົບຮົມໄລຍະສັ້ນ-ກໍ່ສ້າງພະນັກງານ ລະດັບປະຣິນຍາຕີຈຳນວນໜຶ່ງ ຮ່ວມມື ແລະ ຊ່ວຍເຫຼືອປັບປຸງນິຕິກຳ-ພາລະບົດບາດຂອງກົມ ພົບປະແລກປ່ຽນທາງດ້ານວິຊາການລະດັບຂັ້ນກົມ ແລະ ວຽກງານອື່ນໆອີກຈຳນວນໜຶ່ງ ເຊິ່ງໄດ້ເປັນການປະກອບສ່ວນເຂົ້າໃນການພັດທະນາຂົງເຂດການເງິນ ເວົ້າສະເພາະ ໃນດ້ານວຽກງານກວດກາການເງິນຂອງລາວ ໃຫ້ມີຄວາມເຂັ້ມແຂງຢ່າງບໍ່ຢຸດຢັ້ງ.
ແຫລ່ງຂ່າວ: ວຽງຈັນໃໝ່