ເຈົ້າໜ້າທີ່ຈະລາຈອນ ແຂວງໄຊສົມບູນ ໃຫ້ຮູ້ວ່າ: ໃນເວລາປະມານ 21:00 ໂມງ ຂອງວັນທີ 2 ມີນາຜ່ານມາ, ຢູ່ເຂດຜາອໍລໍ, ບ້ານນ້ຳໂມ້ ເມືອງອານຸວົງ ແຂວງໄຊສົມບູນ ໄດ້ເກີດເຫດລົດບັນທຸກ 10 ລໍ້ ເປັນລົດຂອງບໍລິສັດ ລາວຈະເລີນຊັບ, ໄດ້ແລ່ນອອກມາແຕ່ເມືອງອານຸວົງ ມຸ້ງໜ້າໄປທາງຜາລະແວກ ເມືອງຮົ່ມ ແຂວງໄຊສົມບູນ ເມື່ອມາຮອດຈຸດເກີດເຫດ ຊຶ່ງເປັນທາງຄ້ອຍຊັນ ແລະ ໂຄ້ງ, ຈຶ່ງເຮັດໃຫ້ລົດເຈີດລົງເຫວຂ້າງທາງເລິກປະມານ 500 ກວ່າແມັດ, ເຮັດໃຫ້ມີຜູ້ທີ່ຂີ່ນຳກັນ 9 ຄົນ ໄດ້ຮັບບາດເຈັບສາຫັດ 2 ຄົນ ແລະ ເສຍຊີວິດ 2 ຄົນ, ໃນເບື້ອງຕົ້ນຄົນຂັບລົດຄັນດັ່ງກ່າວໄດ້ໃຫ້ການຕໍ່ເຈົ້າໜ້າທີ່ວ່າ: ລົດຄັນດັ່ງກ່າວ ໄດ້ເກີດເບກແຕກກະທັນຫັນ ແລະ ບໍ່ສາມາດຄວບຄຸມລົດໄວ້ ໄດ້ ຈຶ່ງກໍໃຫ້ເກີດອຸປະເຫດຮ້າຍແຮງດັ່ງກ່າວ.
ເຈົ້າໜ້າທີ່ຈະລາຈອນ ເມືອງໄຊເສດຖາ ໃຫ້ຮູ້ວ່າ: ໃນຕອນບ່າຍຂອງວັນທີ 2 ມີນາຜ່ານມາ, ຢູ່ເສັ້ນທາງ 450 ປີເຂດບ້ານນາຄວາຍ ເມືອງໄຊເສດຖາ ນະຄອນຫລວງວຽງຈັນ ໄດ້ເກີດອຸປະຕິເຫດລົດຈັກ ຍີ່ຫໍ້ເທນ້າ ບໍ່ມີທະບຽນ, ຂັບຂີ່ໂດຍ
ທ້າວ ບຸນເຫລືອ ອາຍຸ 18 ປີ, ອາຊີບກຳມະກອນ, ພັກເຊົາຢູ່ບ້ານດັ່ງກ່າວຜູ້ກ່ຽວໄດ້ຂັບຂີ່ລົດມາແຕ່ທາງ 4 ແຍກ 450 ປີ ມຸ້ງໜ້າໄປນາຄວາຍດ້ວຍຄວາມໄວເສຍຫລັກໄປຕຳເອົາຄູກາງທາງເຮັດໃຫ້ຫົວນ໋ອກພື້ນເສຍຊີວິດຄາທີ່.
ເຈົ້າໜ້າທີ່ຈະລາຈອນໃຫ້ຮູ້ອີກວ່າ: ໃນອາທິດຜ່ານມາ, ທົ່ວປະເທດໄດ້ມີອຸປະຕິເຫດເກີດຂຶ້ນ 119 ກໍລະນີ, ມີຜູ້ເສຍຊີວິດ 29 ຄົນ, ລວມມູນຄ່າເສຍຫາຍຫລາຍກວ່າ 2 ຕື້ກີບ, ເມື່ອທຽບໃສ່ອາທິດກ່ອນ ເຫັນວ່າຈຳນວນອຸປະຕິເຫດແມ່ນເພີ່ມຂຶ້ນ 10 ກໍລະນີ ແລະ ມີຜູ້ເສຍຊີວິດ ເພີ່ມຂຶ້ນ 11 ຄົນ, ຊຶ່ງເປັນອຸທາຫອນເຕືອນໃຫ້ທຸກຄົນຄວນເປັນເຈົ້າການປະຕິບັດລະບຽບຈະລາຈອນໃຫ້ເຂັ້ມງວດ, ບໍ່ຄວນປະໝາດໃນການຂັບຂີ່ຍານພາຫະນະ.
ແຫລ່ງຂ່າວ: ລາວພັດທະນາ