ພັນທະມິດທາງທະຫານໃນອີຣັກ ນຳໂດຍສະຫະລັດອາເມຣິກາ ສາມາດສັງຫານນັກຮົບ IS ໄດ້ຫລາຍກ່ວາ 8,500 ຄົນ ຕັ້ງແຕ່ເດືອນສິງຫາປີກາຍເປັນຕົ້ນມາ.
ສຳນັກຂ່າວຕ່າງປະເທດ ລາຍງານໃນວັນທີ 4 ມີນານີ້ວ່າ ທ່ານ ພົນເອກ ລອຍ ອໍສະຕິນ ຫົວໜ້າກອງບັນຊາການກາງສະຫະລັດອາເມຣິກາ ເຊິ່ງຄວບຄຸມປະຕິບັດການໂຈມຕີກຸ່ມ IS ໄດ້ອອກມາລະບຸວ່າ ກຸ່ມລັດອິດສະລາມເຊິ່ງຄວບຄຸມພື້ນທີ່ສຳຄັນທາງພາກເໜືອ ແລະ ພາກຕາເວັນຕົກຂອງອີຣັກ ມາຕັ້ງແຕ່ລະດູຮ້ອນປີກາຍນີ້ ບໍ່ມີຄວາມອາດສາມາດທີ່ຈະບຸກໂຈມຕີ ແລະ ຍຶດຄອງດິນແດນໃໝ່ໆອີກຕໍ່ໄປ ໂດຍພວກເຂົາໄດ້ຖືກກອງກຳລັງພັນທະມິດ ນຳໂດຍສະຫະລັດອາເມຣິກາ ບຸກໂຈມຕີທາງອາກາດຢ່າງໜັກ ນັບຕັ້ງແຕ່ເດືອນສິງຫາປີຜ່ານມາ ເຮັດໃຫ້ມີພວກນັກຮົບ IS ຖືກສັງຫານໄປແລ້ວຢ່າງໜ້ອຍ 8,500 ຄົນ, ຍານພາຫະນະ, ລົດຕັງ ແລະ ອາວຸດໜັກຖືກເສຍຫາຍຫລາຍຮ້ອຍ, ນອກຈາກນີ້ ຍັງໄດ້ໂຈມຕີໂຮງກັ່ນນ້ຳມັນ ທີ່ກຸ່ມ IS ຍຶດຄອງໃນຊີເຣຍ ເພື່ອທຳລາຍແຫລ່ງລາຍຮັບ ຈາກການຄ້ານ້ຳມັນເຖື່ອນຂອງກຸ່ມ IS ອີກດ້ວຍ.