ໂດຍການຕອບສະໜອງຕາມການເຊື້ອເຊີນຂອງພະບາດສົມເດັດ ພະບໍຣົມ ມະນຽດ ໂນໂຣດົມ ສີຫາໂມນີ ພະມະຫາກະສັດແຫ່ງລາຊະອານາຈັກກຳປູເຈຍ ທ່ານ ຈູມມາລີ ໄຊຍະສອນ ປະທານປະເທດແຫ່ງສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍ ພັນລະຍາ ແລະ ຄະນະໄດ້ເດີນທາງໄປຢ້ຽມຢາມທາງລັດຖະກິດຢູ່ລາຊະອານາຈັກກຳປູເຈຍ ເປັນເວລາ 3 ວັນ ແລະ ໄດ້ເດີນທາງມາເຖິງນະຄອນຫຼວງວຽງຈັນ ດ້ວຍຄວາມສະຫວັດດີພາບໃນວັນ ທີ 28 ກຸມພາຜ່ານມານີ້.
ການຢ້ຽມຢາມທາງລັດຖະກິດລາຊະອານາຈັກກຳປູເຈຍໃນຄັ້ງນີ້ການນຳ ສູງສຸດສອງປະເທດໄດ້ພົບປະຫາລືກັນໃນຫຼາຍຂົງເຂດວຽກງານ ແລະ ສະແດງຄວາມເພິ່ງພໍໃຈເປັນຢ່າງຍິ່ງຕໍ່ສາຍພົວພັນມິດຕະພາບອັນເປັນ ມູນເຊື້ອທີ່ດີງາມ ແລະ ຕີລາຄາສູງ ຕໍ່ຜົນສຳເລັດທີ່ສອງພັກສອງລັດກໍຄື ປະຊາຊົນສອງຊາດລາວ ແລະ ກຳປູເຈຍຍາດມາໄດ້ໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດຂອງຕົນໃນໄລຍະຜ່ານມາ.
ກ່ຽວກັບການຮ່ວມມືສອງຝ່າຍການນຳຂັ້ນສູງສອງປະເທດໄດ້ເປັນ ເອກະພາບ ແລະ ຢືນຢັນວ່າຈະສືບຕໍ່ຮ່ວມມື ແລະ ຊ່ວຍເຫຼືອເຊິ່ງກັນ ແລະ ກັນ ຖານບ້ານໃກ້ເຮືອນຄຽງທີ່ດີ ສືບຕໍ່ປົກປັກຮັກສາມູນເຊື້ອອັນດີງາມໃຫ້ຍືນຍົງຕະຫຼອດໄປ ສືບຕໍ່ແລກປ່ຽນການຢ້ຽມຢາມ ແລະ ພົບປະລະຫວ່າງຜູ້ນຳຂັ້ນສູງກໍຄືຄະນະຜູ້ແທນຂັ້ນຕ່າງໆຂອງສອງ ປະເທດຢ່າງເປັນປົກກະຕິ ພ້ອມຊຸກຍູ້ຂະແໜງການກ່ຽວຂ້ອງປະຕິບັດບັນດາຂໍ້ຕົກລົງທີ່ສອງ ຝ່າຍມີຮ່ວມກັນໃຫ້ປາກົດຜົນເປັນຈິງເທື່ອລະກ້າວ.
ນອກນີ້ສອງຝ່າຍໄດ້ຊຸກຍູ້ໃຫ້ໜ່ວຍງານກ່ຽວຂ້ອງເພີ່ມທະວີການຮ່ວມ ມືໃຫ້ຫຼາຍຂຶ້ນຕາມຄວາມສາມາດຕົວຈິງຂອງ ແຕ່ລະຝ່າຍ, ເພີ່ມທະວີການຮ່ວມມືໃນດ້ານຕ່າງໆເປັນຕົ້ນແມ່ນດ້ານການເມືອງຄວາມ ໝັ້ນຄົງ, ວຽກງານຊາຍແດນ ການສົ່ງເສີມດ້ານເສດຖະກິດ-ການຄ້າ ແລະ ການສຶກສາ.
ໂອກາດຢ້ຽມຢາມຄັ້ງນີ້ທ່ານປະທານປະເທດ ຈູມມາລີ ໄຊຍະສອນ ໄດ້ມອບຫຼຽນໂພໄຊລ້ານຊ້າງໃຫ້ແກ່ພະບາດສົມເດັດ ພະບໍຣົມ ມະນຽດ ໂນໂຣດົມ ສີຫາໂມນີ ຊຶ່ງເປັນຫຼຽນທີ່ມີຄວາມໝາຍສຳຄັນຍິ່ງ ແລະ ໄດ້ສະແດງຄວາມ ຍິນດີທີ່ໄດ້ມາຢ້ຽມຢາມລາຊະອານາຈັກກຳປູເຈຍ ນັບແຕ່ສອງປະເທດໄດ້ສ້າງຕັ້ງສາຍພົວພັນການທູດຮ່ວມກັນມາ ເປັນເວລາ 59 ປີ.
ໂອກາດດຽວກັນນີ້ ທ່ານ ຈູມມາລີ ໄຊຍະສອນ ຍັງໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ຊາຍຊຸມ ຮອງປະທານສະພາສູງຜູ້ທີ 1 ແຫ່ງລາຊະອານາ ຈັກກຳປູເຈຍ, ໄດ້ພົບປະສົມເດັດ ເຮັງ ຊຳຣິນ ປະທານສະພາແຫ່ງຊາດແຫ່ງລາຊະອານາຈັກກຳປູເຈຍ ຊຶ່ງສອງຝ່າຍໄດ້ຕີລາຄາສູງການພົວພັນຮ່ວມມືລະຫວ່າງຂະແໜງ ນິຕິບັນຍັດຂອງສອງປະເທດທີ່ນັບມື້ເລິກເຊິ່ງ ແລະ ຕໍ່ເນື່ອງ ຊຶ່ງໄດ້ນຳເອົາຜົນປະໂຫຍດຕົວຈິງມາສູ່ປະຊາຊົນທັງສອງຊາດທັງ ສະແດງຄວາມຊົມເຊີຍຄວາມຄືບໜ້າຂອງວຽກງານຊາຍແດນ ໂດຍສອງຝ່າຍໄດ້ຮ່ວມກັນສຳຫຼວດປັກຫຼັກໝາຍຊາຍແດນລະຫວ່າງປະເທດ ສຳເລັດແລ້ວເປັນສ່ວນໃຫຍ່ຫຼັງຈາກນັ້ນ ທ່ານ ຈູມາລີ ໄຊຍະສອນ ພ້ອມດ້ວຍຄະນະທາງການໄດ້ໄປພົບປະຢ້ຽມຢາມສົມເດັດ ອັກຄະມະຫາເສນາບໍດີ ເຕໂຈ ຮຸນ ເຊນ ນາຍົກລັດຖະມົນຕີແຫ່ງລາຊະອາ ນາຈັກກຳປູເຈຍທີ່ວັງສັນຕິພາບ ຊຶ່ງທ່ານ ຈູມມາລີ ໄຊຍະສອນ ໄດ້ຊົມເຊີຍຕໍ່ຜົນສຳເລັດຂອງພັກປະຊາຊົນກຳປູ ເຈຍ ໃນການຈັດກອງປະຊຸມໃຫຍ່ວິສາມັນທົ່ວປະເທດຄັ້ງທີ 37 ເມື່ອວັນທີ 30 ມັງກອນ 2015 ທີ່ຜ່ານມາ ທັງໄດ້ ຕີລາຄາສູງຕໍ່ຜົນການຢ້ຽມຢາມ ສປປ ລາວຢ່າງເປັນທາງການຂອງສົມເດັດ ຮຸນເຊນ ແລະ ການເຂົ້າຮ່ວມກອງປະ ຊຸມສຸດຍອດ CLV ໃນປີ 2014.
ລັດຖະບານລາວມີຄວາມປິຕິຍິນດີ ແລະ ຊົມເຊີຍຕໍ່ຜົນສຳເລັດໃນການພັດທະນາເສດຖະກິດ-ສັງຄົມຂອງກຳປູ ເຈຍ ທີ່ລັດຖະບານ ແລະ ປະຊາຊົນກຳປູ ເຈຍຍາດມາໄດ້ໃນຕະຫຼອດໄລຍະຜ່ານມາ, ສະແດງຄວາມເພິ່ງພໍໃຈຢ່າງຈິງໃຈທີ່ພັກ-ລັດຖະບານລາຊະອານາຈັກກຳ ປູເຈຍ ໄດ້ໃຫ້ການສະໜັບສະໜູນຊ່ວຍເຫຼືອ ແລະ ຮ່ວມມືກັບ ສປປ ລາວຖານ ອ້າຍນ້ອງບ້ານໃກ້ເຮືອນຄຽງທີ່ດີຕະຫຼອດມາ ບໍ່ວ່າວຽກສອງຝ່າຍ ຫຼື ຫຼາຍຝ່າຍ ທັງສອງຈະຊຸກຍູ້ໃຫ້ພາກສ່ວນກ່ຽວຂ້ອງປະຕິບັດບົດບັນທຶກກອງ ປະຊຸມຄະນະກຳມາທິການຮ່ວມວ່າດ້ວຍການຮ່ວມມືສອງຝ່າຍລາວ-ກຳປູ ເຈຍ, ກຳປູເຈຍ-ລາວ ຄັ້ງທີ 12 (JC-12) ທີ່ຊຽມຣຽບ ແລະ ຜົນຂອງການຢ້ຽມຢາມ ສປປ ລາວ ຢ່າງເປັນທາງການຂອງສົມເດັດ ຮຸນເຊນ ໃຫ້ໄດ້ຮັບການຈັດຕັ້ງປະຕິບັດເປັນຮູບປະທຳເທື່ອລະກ້າວ ເພື່ອຜົນປະໂຫຍດຂອງປະຊາຊົນສອງຊາດ.
ແຫລ່ງຂ່າວ: ເສດຖະກິດ – ສັງຄົມ