ໄຂ້​ຫວັດ​ສັດ​ປີກ​ລະ​ບາດ​ໃນ​ເມືອງ​ໂມນ​ຍະ​ວາ ປະ​ເທດ​ມຽນ​ມ້າ ທາງ​ການ​ຂ້າ​ສັດ​ປີກ​ຫລາຍ​ພັນ​ໂຕ ເພື່ອ​ປ້ອງ​ກັນ​ການ​ແຜ່​ລະ​ບາດ​.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 26 ກຸມ​ພາ​ຜ່ານ​ມາ​ນີ້​ວ່າ ທາງ​ການ​ມຽນ​ມ້າ ໄດ້​ກຳ​ຈັດ​ສັດ​ປີກ​ຈຳ​ນວນ​ຫລາຍ​ພັນ​ໂຕ ເພື່ອ​ຄວບ​ຄຸມ​ການ​ແຜ່​ລະ​ບາດ​ຂອງ​ເຊື້ອ​ໄຂ້​ຫວັດ​ສັດ​ປີກ H5N1 ໃນ​ເມືອງ​ໂມນ​ຍະ​ວາ (Monywa) ທາງ​ພາກ​ຕາ​ເວັນ​ຕົກ​ຂອງ​ແຂວງ​ມັນ​ດະ​ເລ ເນື່ອງ​ຈາກ​ການ​ລະ​ບາດ​ຂອງ​ພະ​ຍາດ​ໄຂ້​ຫວັດ​ສັດ​ປີກ ໄດ້​ເຮັດ​ໃຫ້ໄກ່​ຫລາຍ​ກ່​ວາ 1,400 ໂຕ ແລະ ນົກ​ກະ​ທາ​ອີກ​ຫລາຍ​ກ່​ວາ 10,000 ໂຕ ​ຕາຍ​ຈາກ​ການ​ແຜ່​ລະ​ບາດໃນ​ຊ່ວງ​ຕົ້ນ​ເດືອນ​ນີ້ ເຮັດ​ໃຫ້​ທາງ​ການ​ຈຳ​ເປັນ​ໄດ້​ຂ້າ​ໄກ່​ປະ​ມານ 1,500 ໂຕ ແລະ ນົກ​ກະ​ທາ​ອີກ ຫລາຍ​ກ່​ວາ 20,000 ໂຕ ເພື່ອ​ປ້ອງ​ກັນ​ການ​ແຜ່​ລະ​ບາດ​ອອກ​ສູ່​ວົງ​ກ້​ວາງ.