ຫິ​ມະ​ຖະ​ຫລົ່ມ​ທາງ​ພາກ​ຕາ​ເວັນ​ອອກ​ສຽງ​ເໜືອ ຂອງ​ປະ​ເທດ​ອັບ​ກາ​ນິ​ສະ​ຖານ ມີ​ຜູ້​ເສຍ​ຊີ​ວິດ​ແລ້ວ​ຫລາຍ​ກ່​ວາ 200 ຄົນ ຊ້ຳ​ຫິ​ມະ​ຍັງ​ຈະ​ຕົກ​ໜັກ​ຕື່ມ​ອີກ 2 ວັນ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 27 ກຸມ​ພາ​ນີ້​ວ່າ ເກີດ​ເຫດ​ຫິ​ມະ​ຖ​ະ​ຫລົ່ມ​ຄັ້ງ​ຮາຍ​ແຮງ​ທີ່​ສຸດ ໃນ​ຮອບ 30 ປີ ຢູ່​ພາກ​ຕາ​ເວັນ​ອອກ​ສຽງ​ເໜືອ ຂອງ​ປະ​ເທດ​ອັບ​ກາ​ນິ​ສະ​ຖານ​ມື້​ວານ​ນີ້ (26 ກຸມ​ພາ) ເຊິ່ງ​ເກີດ​ຈາກ​ພາ​ຍຸ​ຫິ​ມະ ຕົກ​ລົງ​ມາ​ຕັ້ງ​ແຕ່​ມື້​ວັນ​ອັງ​ຄານ​ທີ 24 ກຸມ​ພາ​ເປັນ​ຕົ້ນ​ມາ ເຊິ່ງ​ເຮັດ​ໃຫ້​ມີ​ປະ​ຊາ​ຊົນ​ເສຍ​ຊີ​ວິ​ດ​ແລ້ວ ຫລາຍ​ກ່​ວາ 200 ຄົນ ໃນ​ຂະ​ນະ​ທີ່​ພະ​ຍາ​ກອນ​ອາ​ກາດ​ກໍ​ລະ​ບຸ​ວ່າ ຫິ​ມະ​ຍັງ​ຈະ​ຕົກ​ໜັກ​ຕໍ່​ໄປ​ອີກ​ຢ່າງ​ໜ້ອຍ 2 ວັນ.

ພື້ນ​ທີ່​ທີ່​ໄດ້​ຮັບ​ຜົນ​ກະ​ທົບ​ຫລາຍ​ທີ່​ສຸດ ແມ່ນ​ຢູ່​ແຂວງ​ປັນ​ຊີ ທາງ​ພາກ​ເໜືອ​ຂອງ​ນະ​ຄອນ​ຫລ​ວງ​ຄາ​ບູນ ໂດຍ​ມີ​ຜູ້​ເສຍ​ຊີ​ວິດ​ແລ້ວ 186 ຄົນ ແລະ ໄດ້​ຮັບ​ບາດ​ເຈັບ 100 ກ່​ວາ​ຄົນ ໂດຍ​ທາງ​ການ​ໃນ​ທ້ອງ​ຖິ່ນ ໄດ້​ພະ​ຍາ​ຍາມ​ເຂົ້າ​ໃຫ້​ການ​ຊ່ວຍ​ເຫລືອ ແລະ ທຳ​ການ​ອົບ​ພະ​ຍົບ​ປະ​ຊາ​ຊົນ​ຢູ່ ຈົນ​ເຖິງ​ຂະ​ນະ​ນີ້.