ກະສັດແຫ່ງຊາອຸດິອາຣະເບຍ ແຈກຈ່າຍເງິນກ່ວາ 525 ຕື້ກີບ ແກ່ປະຊາຊົນ ສະຫລອງການຂຶ້ນຄອງຣາຊະສົມບັດ.
ສຳນັກຂ່າວຕ່າງປະເທດ ລາຍງານໃນວັນທີ 26 ກຸມພາຜ່ານມານີ້ວ່າ ສົມເດັດພະຣາຊາທິບໍດີ ຊັນມານ ບິນ ອັບດຸນລາຊິດ ກະສັດແຫ່ງປະເທດຊາອຸດິອາຣະເບຍ ໄດ້ແຈກຈ່າຍເງິນຈຳນວນກ່ວາ 525 ຕື້ກີບ ໃຫ້ແກ່ປະຊາຊົນພາຍໃນປະເທດ ເພື່ອສະເຫລີມສະຫລອງການແຕ່ງຕັ້ງຂຶ້ນເປັນກະສັດອົງໃໝ່ ແຫ່ງຊາອຸດິອາຣະເບຍ.
ເນື່ອງຈາກ ສົມເດັດພະຣາຊາທິບໍດີ ຊັນມານ ບິນ ອັບດຸນລາຊິດ ອາຍຸ 79 ພັນສາ ໄດ້ຂຶ້ນຄອງຣາຊະສົມບັດ ແທນສົມເດັດພະຣາຊາທິບໍດີ ອັນດຸນເລາະ ບິນ ອັບເດນອາຊິດ ເຊິ່ງໄດ້ສະຫວັນນະຄົດໃນອາຍຸ 90 ພັນສາ ເມື່ອກ່ອນໜ້ານີ້, ເປັນທີ່ຮັບຮູ້ກັນວ່າ ກະສັດແຫ່ງຊາອຸດິອາຣະເບຍ ເປັນໜຶ່ງໃນຜູ້ທີ່ຮັ່ງມີທີ່ສຸດໃນໂລກ ເຊິ່ງລາຍໄດ້ຫລັກຂອງປະເທດ ແມ່ນມາຈາກການຄ້າຂາຍນ້ຳມັນ (ເປັນອັບດັບ 2 ຂອງໂລກ).
ພຽງແຕ່ພາຍໃນຊົ່ວໂມງດຽວເທົ່ານັ້ນ ພະອົງໄດ້ແຈກຈ່າຍສະມາດໂຟນ ແລະ ໂມງຫລູຫລາ ຕະຫລອດຮອດທົວວັນພັກພິເສດ ໃຫ້ແກ່ປະຊາຊົນ ເພື່ອສະເຫລີມສະຫລອງການຂຶ້ນຄອງຣາຊະສົມບັດຂອງພະອົງໃນຄັ້ງນີ້ ເຊິ່ງໃນນັ້ນເງິນໄດ້ແບ່ງອອກຈຳນວນ 750 ລ້ານກີບ ແຈກໃຫ້ເປັນຄ່າເງິນເດືອນແກ່ພະນັກງານຂອງລັດ, ທະຫານ, ນັກຮຽນ ແລະ ພະນັກງານບຳນານ ລວມທັງຍັງສົ່ງເສີມສະມາຄົມວິຊາຊີບ ແລະ ສະມາຄົມກິລາຕ່າງໆພາຍໃນປະເທດ ເຊິ່ງການແຈກດັ່ງກ່າວນີ້ ແມ່ນຖືເປັນປະເພນີຂອງປະເທດໂລກອາຫລັບ ເມື່ອໄດ້ຮັບການແຕ່ງຕັ້ງໃຫ້ຂຶ້ນເປັນກະສັດອົງໃໝ່.