ວັນທີ 23 ກຸມພາ 2015 ຜ່ານມາ ທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມຄະນະການນຳນະຄອນຫຼວງ ແລະ ຄອບຄົວການນຳ ບໍລິສັດ ນັກທຸລະກິດ ຜູ້ປະກອບການຕ່າງໆ ພະແນກການ ພະນັກງານ ພໍ່ແມ່ປະຊາຊົນ ອົງການປົກຄອງບ້ານທີ່ກ່ຽວຂ້ອງ ແລະ ນ້ອງນ້ອຍນັກຮຽນ ໄດ້ລົງມາຊຸກຍູ້ຊ່ວຍເຫຼືອໂຮງຮຽນມັດທະຍົມຕອນຕົ້ນບໍ່ໂອ ເມືອງຫາດຊາຍຟອງ ນະຄອນຫຼວງວຽງຈັນ ທີ່ຖືກຜົນກະທົບພະຍຸລະດູຮ້ອນພັດ ໃນວັນທີ 18 ກຸມພາທີ່ຜ່ານມາ.
ທ່ານ ແກ່ນ ວໍລະສານ ຮອງເຈົ້າເມືອງຫາດຊາຍຟອງ ໄດ້ລາຍງານສະພາບການທີ່ຖືກຜົນກະທົບມີເຂດບ້ານບໍ່ໂອ ບ້ານສາລາຄຳ ແລະ ບັນດາບ້ານໃກ້ຄຽງ ການນຳເມືອງຫາດຊາຍຟອງ ໄດ້ຈັດຕັ້ງຄະນະຮັບຜິດຊອບລົງກວດກາຕິດຕາມສະພາບຂໍ້ມູນຕ່າງໆ ຜ່ານການເກັບກຳຂໍ້ມູນແຕ່ວັນທີ 18-22 ສາມາດສະຫຼຸບໄດ້ ພື້ນຖານໂຄງລ່າງຈຳນວນໜຶ່ງແຕ່ລະບ້ານ ທີ່ຖືກຜົນກະທົບທັງໝົດ 25 ບ້ານ ມີ 1.483 ຫຼັງຄາເຮືອນ ໃນນັ້ນ ເສຍຫາຍຫຼາຍກວ່າໝູ່ແມ່ນ 74 ຫຼັງຄາເຮືອນ ເສຍຫາຍເລັກນ້ອຍ ແລະ ປານກາງມີ 1.409 ຄອບຄົວ ຄົນທີ່ຖືກບາດເຈັບມີຢູ່ 15 ຄົນ ເປັນຍິງ 7 ຄົນ ພາຫະນະເສຍຫາຍລົດໃຫຍ່ 7 ຄັນ ລົດຈັກ 3 ຄັນ ໂຮງຮຽນທີ່ຖືກກະທົບຫຼາຍກວ່າໝູ່ແມ່ນໂຮງຮຽນມັດທະຍົມຕົ້ນບໍ່ໂອ ນອກນັ້ນ ຍັງມີໂຮງຈັກໂຮງງານຈຳນວນໜຶ່ງ ແລະ ໄຟຟ້າຈຳນວນໜຶ່ງ ຜ່ານການແກ້ໄຂສະພາບການດັ່ງກ່າວນັ້ນ ແມ່ນໄດ້ສຸມໃສ່ເກັບກູ້ສາຍໄຟ ຫຼັກໄຟຟ້າ ສຳເລັດໂດຍພື້ນຖານ ແລະ ສາມາດຕັ້ງຫຼັກໄຟຟ້າ ແກ້ໄຂຄອບຄົວທີ່ຖືກຜົນກະທົບໄດ້ 100% ປັດຈຸບັນແມ່ນສຸມໃສ ມ ຕົ້ນ ບໍ່ໂອ ໄດ້ເລີ່ມລົງມື້ໄປແລ້ວ ພ້ອມກັນນັ້ນ ພະແນກໂຍທາທິການ ແລະ ຂົນສົ່ງ ນະຄອນຫຼວງ ຈະມາປູກໂຮງຮຽນຖາວອນຢູ່ໂຮງຮຽນມັດທະຍົມບໍ່ໂອ ປັດຈຸບັນນີ້ ໄດ້ເປີດການຮຽນ-ການສອນແລ້ວໃນຕໍ່ໜ້າ ຈະລົງຕິດຕາມເກັບກຳຂໍ້ມູນຕື່ມ ໃນແຕ່ລະຄອບຄົວແຕ່ລະບ້ານໃຫ້ສຳເລັດ ແລະ ໄດ້ຕັ້ງສູນບໍລິຈາກມີຢູ່ 3 ຈຸດ ຈຸດ 1 ຢູ່ອົງການປົກຄອງເມືອງ ຈຸດທີ 2 ຢູ່ຫ້ອງການບ້ານສົມສະໜຸກ ແລະ ຈຸດທີ 3 ຕັ້ງຢູ່ໂຮງຮຽນມັດທະຍົມຕອນຕົ້ນບໍ່ໂອ ມາຮອດປັດຈຸບັນ ການລະດົມທຶນແຕ່ມື້ເກີດເຫດໄດ້ທັງໝົດ 247.833.000 ກີບ ພ້ອມທັງໄດ້ມີພາກສ່ວນທີ່ມາແຈ້ງເຈດຈຳນົງໄວ້ແລ້ວ 66.850.000 ກີບ.
ແຫລ່ງຂ່າວ: ວຽງຈັນໃໝ່