ພິທີສົ່ງຮູບຫຼໍ່ບັນດາທ່ານຜູ້ນຳຮຸ່ນທຳອິດຂອງພັກ ແລະ ການປະຕິວັດລາວ ຊຸດທີ II ໄດ້ຈັດຂຶ້ນວັນທີ 23 ກຸມພາ 2015 ຢູ່ຫໍພິພິທະພັນປະທານ ໄກສອນ ພົມວິຫານ ໂດຍມີທ່ານນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ພ້ອມດ້ວຍບັນດາລັດຖະມົນຕີ ເຈົ້າຄອງ-ຮອງເຈົ້າຄອງນະຄອນຫຼວງວຽງຈັນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ສຸວັນດີ ສີສະຫວັດ ຮອງຫົວໜ້າຫ້ອງວ່າການສູນກາງພັກ ຫົວໜ້າຄະນະຮັບຜິດຊອບຫໍພິພິທະພັນ ໄກສອນ ພົມວິຫານ ໄດ້ກ່າວວ່າ: ໄລຍະຜ່ານມາ ຢູ່ສະຖານທີ່ແຫ່ງນີ້ ໄດ້ຈັດພິທີສົ່ງຮູບຫຼໍ່ຂອງທ່ານ ໜູຮັກ ພູມສະຫວັນ ໄປສະຖິດຢູ່ແຂວງສະຫວັນນະເຂດ ຮູບຫຼໍ່ຂອງທ່ານ ສີທົນ ກົມມະດຳ ໄປສະຖິດຢູ່ແຂວງຈຳປາສັກ ແລະ ມື້ນີ້ ພວກເຮົາຈັດຕັ້ງພິທີສົ່ງບັນດາຮູບຫຼໍ່ທ່ານຜູ້ນຳຮຸ່ນທຳອິດຂອງພັກ ແລະ ການປະຕິວັດລາວ ຈຳນວນ 5 ທ່ານໄປສະຖິດຢູ່ແຂວງຕ່າງໆຄື: ຮູບຫຼໍ່ທ່ານ ພູມີ ວົງວິຈິດ ທ່ານ ຕູ້ຢາ ໄຊຈູ ໄປຕິດຕັ້ງຢູ່ເທສະບານເມືອງແປກ ແລະ ຮູບຫຼໍ່ທ່ານ ໄຟດ່າງ ລໍເບຼຍຢາວ ໄປຕິດຕັ້ງຢູ່ເມືອງໜອງແຮດ ແຂວງຊຽງຂວາງ ຮູບຫຼໍ່ທ່ານ ສີສົມພອນ ລໍວັນໄຊ ໄປຕິດຕັ້ງຢູ່ເມືອງປາກຊັນ ແຂວງບໍລິຄຳໄຊ ແລະ ຮູບຫຼໍ່ທ່ານ ພູນ ສີປະເສີດ ໄປຕິດຕັ້ງຢູ່ເມືອງໄກສອນ ພົມວິຫານ ແຂວງສະຫວັນນະເຂດ.
ການສົ່ງຮູບຫຼໍ່ບັນດາຜູ້ນຳຄັ້ງນີ້ ແມ່ນມີຄວາມໝາຍສຳຄັນທາງປະຫວັດສາດການເມືອງຢ່າງເລິກເຊິ່ງ ເປັນການຈາລຶກຄຸນງາມຄວາມດີ ຜົນງານອັນໃຫຍ່ຫຼວງຂອງບັນດາທ່ານ ທີ່ໄດ້ອຸທິດເຫື່ອແຮງ ກຳລັງວັງຊາ ເສຍສະຫຼະຊີວິດເພື່ອປະເທດຊາດ ແລະ ການປະຕິວັດຍາດເອົາເອກະລາດ ອິດສະຫຼະພາບ ແລະ ຄວາມຮັ່ງມີຜາສຸກມາສູ່ປະຊາຊົນລາວບັນດາເຜົ່າ ບັນດາທ່ານຜູ້ນຳດັ່ງກ່າວ ແມ່ນນັກປະຕິວັດທີ່ອົງອາດກ້າຫານ ເດັດດ່ຽວໜຽວແໜ້ນ ມີມານະຈິດ ແລະ ອຸດົມການອັນສູງສົ່ງ ເດັດຂາດ ບໍ່ຍອມຈຳນົນຕໍ່ສັດຕູຜູ້ຮຸກຮານ ມີຄວາມເຊື່ອໝັ້ນຕໍ່ການນຳພາຂອງພັກ.
ໂຄງການກໍ່ສ້າງຕິດຕັ້ງ ແລະ ຕົບແຕ່ງເດີ່ນສວນອານຸສາວະລີຂອງບັນດາຜູ້ນຳຮຸ່ນທຳອິດຂອງພັກ ແລະ ການປະຕິວັດລາວ ມາເຖິງປັດຈຸບັນ ແມ່ນມີຜົນສຳເລັດເປັນໜ້າເພິ່ງພໍໃຈ ແລະ ຄາດວ່າຈະສຳເລັດສົມບູນ ໃນທ້າຍປີ 2015 ເພື່ອເປັນຜົນງານຄຳນັບຮັບຕ້ອນວັນສ້າງຕັ້ງພັກ ປະຊາຊົນປະຕິວັດລາວ ຄົບຮອບ 60 ປີ ວັນສະຖາປະນາ ສປປ ລາວ ຄົບຮອບ 40 ປີ ໃນປີ 2015 ກໍ່ຄືກອງປະຊຸມໃຫຍ່ ຄັ້ງທີ X ຂອງພັກປະຊາຊົນປະຕິວັດລາວ ໃນຕົ້ນປີ 2016.
ແຫລ່ງຂ່າວ: ວຽງຈັນໃໝ່