ຈຳ​ນວນ​ຜູ້​ເສຍ​ຊີ​ວິດ​ຈາກ​ເຫດ​ເຮືອ​ຂ້າມ​ຟາກ​ຫລົ້ມ​ກາງ​ແມ່​ນ້ຳ ໃນ​ພາກ​ກາງ​ຂອງ​ບັງ​ກະ​ລາ​ເທດ ເພີ່ມ​ຂຶ້ນ​ເປັນ 68 ຄົນ​ແລ້ວ ແລະ ເຊື່ອ​ວ່າ​ຈະ​ຍັງ​ມີ​ຜູ​້​ເສຍ​ຊີ​ວິດ​ເພີ່ມ​ຂຶ້ນ​ອີກ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 23 ກຸມ​ພາ​ຜ່ານ​ມາ​ນີ້​ວ່າ ຈຳ​ນວນ​ຜູ້​ເສຍ​ຊີ​ວິດ​ຈາກ​ເຫດ​ເຮືອ​ຂ້າມ​ຟາກ 2 ຊັ້ນ ເຊິ່ງ​ບັນ​ທຸກ​ຜູ້​ໂດຍ​ສານ​ຫລາຍ​ກ່​ວາ 100 ຄົນ ຫລົ້ມ​ກາງ​ແມ່​ນ້ຳ​ປັດ​ມາ ເຂດ​ມະ​ນີ​ຄະ​ກັນ​ຊະ ທາງ​ພາກ​ກາງ​ຂອງ​ປະ​ເທດ​ບັງ​ກະ​ລາ​ເທດ ຫລັງ​ຈາກ​ທີ່​ຕຳ​ເຂົ້າ​ກັບ​ເຮືອ​ຫາ​ປາ​ລຳ​ໜຶ່ງ ໃນ​ຕອນ​ບ່າຍ​ຂອງ​ມື້​ວັນ​ອາ​ທິດ​ທີ 22 ກຸມ​ພາ​ຜ່ານ​ມາ​ນີ້ ລ່າ​ສຸດ​ແມ່ນ​ໄດ້​ເພີ່ມ​ຂຶ້ນ​ເປັນ 69 ຄົນ​ແລ້ວ.

ທ່ານ ພິ​ທານ ໄຕ​ຣ​ປຸ​ຣະ ເຈົ້າ​ໜ້າ​ທີ່​ຕຳ​ຫລວດ​ທ້ອງ​ຖິ່ນ​ລະ​ບຸ​ວ່າ ໜ່ວຍ​ກູ້​ໄພ​ສາ​ມາດ​ຊ່ວຍ​ເຫລືອ​ຜູ້​ໂດຍ​ສານ​ໄດ້​ແລ້ວ ປະ​ມານ 50 ຄົນ ໂດຍ​ສ່ວນ​ໃຫຍ່​ເປັນ​ຜູ້​ໂດຍ​ສານ​ທີ່​ຢູ່​ຊັ້ນ​ເທິງ​ຂອງ​ເຮືອ ເຊິ່ງ​ໄດ້​ຕັດ​ສິນ​ໃຈ​ໂດດ​ລົງ​ແມ່​ນ້ຳ ແຕ່​ກໍ​ຍັງ​ເຊື່ອ​ວ່າ​ຍັງ​ຄົງມີ​ສົບ​ຂອງ​ຜູ້​ໂດຍ​ສານ​ທີ່ຕິດ​ຢູ່​ຊັ້ນ​ລຸ່ມຂອງ​ເຮືອ ​ເຊິ່ງ​ຕອນ​ນີ້​ສາ​ມາດ​ເກັບ​ກູ້​ຂຶ້ນ​ມາ​ໄດ້​ແລ້ວ.