ເກີດເຫດກອງກຳລັງຕິດອາວຸດຊາວມຸດສະລິມ ນິກາຍຊີອະ ໃນປະເທດເຢເມນ ບຸກກວາດຍິງເພື່ອສະຫລາຍການຊຸມນຸມປະທ້ວງ ຫລັງມີກຸ່ມຕິດອາວຸດບຸກເຂົ້າຍຶດນະຄອນຫລວງຊານ່າ ໃນຂະນະທີ່ສະຖານະການໃນປະເທດເຢເມນ ຍັງຢູ່ໃນຂັ້ນວິກິດການ.
ສຳນັກຂ່າວຕ່າງປະເທດ ລາຍງານໃນວັນທີ 26 ມັງກອນນີ້ວ່າ ຜູ້ປະທ້ວງຫລາຍຄົນ ທີ່ມາລວມຕົວກັນໃກ້ກັບມະຫາວຶທະຍາໄລຊານ່າ ຕ່າງກໍພາກັນໄດ້ຮັບບາດເຈັບ ໃນຂະນະທີ່ມີບາງຄົນຖືກກຸ່ມຕິດອາວຸດຈັບກຸມໄປ. ນອກຈາກນີ້, ສະມາຊິກກຸ່ມຕິດອາວຸດ ຍັງໄດ້ທຳຮ້າຍນັກຂ່າວ ແລະ ທຸບກ້ອງຂອງນັກຂ່າວຖິ້ມອີກດ້ວຍ ໂດຍກຸ່ມດັ່ງກ່າວ ເຊິ່ງໄດ້ບຸກເຂົ້າຍຶດພື້ນທີ່ເກືອບທັງໝົດຂອງນະຄອນຫລວງຊານ່າເອົາໄວ້ ຕັ້ງແຕ່ເດືອນກັນຍາປີ 2014 ທີ່ຜ່ານມາ ໂດຍໄດ້ບຸກເຂົ້າຍຶດທຳນຽບປະທານາທິບໍດີ ເມື່ອທ້າຍອາທິດຜ່ານມານີ້ ເຮັດໃຫ້ທ່ານປະທານາທິບໍດີ ອັບດຣາບູ ມັນຊູ ຮາດີ ໄດ້ປະກາດລາອອກ ໃນມື້ວັນພະຫັດທີ 22 ຜ່ານມາ.