ທ່ານ ສີຫຸນ ສິດທິລືໄຊ ຮອງເລຂາຄະນະພັກນະຄອນຫຼວງ (ນວ) ໄດ້ຕາງໜ້າໃຫ້ອົງຄະນະພັກ-ອົງການປົກຄອງ ນວ ລົງເຄື່ອນໄຫວຢ້ຽມຢາມ ແລະ ອວຍພອນ ນາຍ ແລະ ພົນທະຫານ ກອງ ຄ 511 ເມືອງສັງທອງ ນວ ວັນທີ 21 ມັງກອນ 2015 ເນື່ອງໃນໂອກາດສະເຫຼີມສະຫຼອງ ຄົບຮອບ 66 ປີ ວັນສ້າງຕັ້ງກອງທັບປະຊາຊົນລາວ ໂດຍໄດ້ຮັບການຕ້ອນຮັບຈາກທ່ານ ພັນໂທ ບົວລອຍ ໄຊຈະເລີນສຸກ ເລຂາຄະນະພັກຮາກຖານ ຫົວໜ້າການເມືອງ ກອງ ຄ 511 ມີທ່ານປະທານແນວລາວສ້າງຊາດ ນວ ທ່ານເຈົ້າເມືອງສັງທອງ ພ້ອມດ້ວຍ ນາຍ ແລະ ພົນທະຫານ ເຂົ້າຮ່ວມ.
ທ່ານ ພັນໂທ ບົວລອຍ ໄຊຈະເລີນສຸກ ໄດ້ລາຍງານສະພາບການຈັດຕັ້ງປະຕິບັດ ໜ້າທີ່ການເມືອງໃນໄລຍະຜ່ານມາ ເຊິ່ງກອງ ຄ 511 ໄດ້ສ້າງຕັ້ງວັນທີ 11 ພະຈິກ 1984 ພາຍໃຕ້ການຊີ້ນຳ-ບັນຊາໂດຍກົງຂອງກອງບັນຊາການທະຫານ ນວ ຮັບຜິດຊອບໜ້າທີ່ປ້ອງກັນຊາດ-ປ້ອງກັນຄວາມສະຫງົບຢູ່ທິດເໜືອຂອງ ນວ ປະສານສົມທົບກັບກອງ ເພື່ອນອຳນາດການປົກຄອງ ເຈົ້າໜ້າທີ່ທຸກຂັ້ນຂອງເມືອງສັງທອງ ເພື່ອຕ້ານສະກັດກັ້ນ ແລະ ແກ້ໄຂກຸ່ມຄົນບໍ່ດີ ຍູ້ແຮງຂະບວນການສ້າງບ້ານ ກົມກອງຕິດພັນກັບຂະບວນການຮັກຊາດ ແລະ ພັດທະນາ ຖືສຳຄັນຕໍ່ວຽກງານສຶກສາອົບຮົມການເມືອງ ນຳພາແນວຄິດໃຫ້ພະນັກງານ-ນັກຮົບ ມີແນວຄິດໜັກແໜ້ນເຂັ້ມແຂງ ຕິດພັນກັບວຽກງານແກ້ໄຂຊີວິດການເປັນຢູ່ ຕາມທິດເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ.
ຈາກນັ້ນ ທ່ານ ສີຫຸນ ສິດທິລືໄຊ ກໍ່ໄດ້ໂອ້ລົມ ເຊິ່ງກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຄະນະພັກ-ຄະນະບັນຊາ ພ້ອມດ້ວຍນາຍ ແລະ ພົນທະຫານ ກອງ ຄ 511 ຍາດມາໄດ້ ເຊິ່ງໄດ້ປະກອບສ່ວນອັນສຳຄັນ ເຮັດໃຫ້ເມືອງສັງທອງສາມາດຮັກສາໄດ້ສະຖຽນລະພາບທາງດ້ານການເມືອງ ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ ໂດຍສະເພາະວຽກງານປ້ອງກັນຊາດ-ປ້ອງກັນຄວາມສະຫງົບ ສະກັດກັ້ນ ແລະ ແກ້ໄຂກຸ່ມຄົນບໍ່ດີຍູ້ແຮງຂະບວນການຮັກຊາດ ແລະ ພັດທະນາ ເຝິກແອບ-ປັບປຸງກໍ່ສ້າງກຳລັງພາຍໃນກົມກອງ ໃຫ້ມີຄວາມເຂັ້ມແຂງໃນທຸກດ້ານ ເພື່ອເຮັດສຳເລັດທຸກໜ້າທີ່ໆປະເທດຊາດ ກໍ່ຄືປະຊາຊົນມອບໝາຍໃຫ້ຢ່າງມີປະສິດທິຜົນ.
ໂອກາດການໄປຢ້ຽມຢາມ ແລະ ອວຍພອນຄັ້ງນີ້ ທ່ານຮອງເລຂາຄະນະພັກ ນວ ຍັງໄດ້ນຳເອົາເຄື່ອງບໍລິໂພກ ແລະ ເງິນຈຳນວນໜຶ່ງ ມອບໃຫ້ກອງ ຄ 511 ອີກດ້ວຍ.
ໃນວັນດຽວກັນ ທ່ານ ສົມວັນດີ ນາຖາວົງ ຮອງເຈົ້າຄອງນະຄອນຫຼວງ ພ້ອມດ້ວຍຄະນະນຳ ອົງການຈັດຕັ້ງມະຫາຊົນນະຄອນຫຼວງ ໄດ້ໄປມອບເຄື່ອງໃຫ້ນາຍ ແລະ ພົນທະຫານຢູ່ກອງຮ້ອຍ 241 ທີ່ຂຶ້ນກັບກອງບັນຊາການທະຫານນະຄອນຫຼວງ ຢູ່ເມືອງສັງທອງ ໂດຍໃຫ້ກຽດຮັບແມ່ນຮ້ອຍເອກ ແສງ ພົມມະວົງ ຫົວໜ້າການທະຫານກອງຮ້ອຍ 241 ໂດຍຊ້ອງໜ້ານາຍ ແລະ ພົນທະຫານ.
ເຄື່ອງທີ່ໄດ້ນຳໄປມອບໃນຄັ້ງນີ້ ປະກອບມີເຄື່ອງອຸປະໂພກ-ບໍລິໂພກ ເປັນຕົ້ນແມ່ນເຄື່ອງອຸປະຖຳ ເຊັ່ນ: ໝີ່ສຳເລັດຮູບ ປາກະປ໋ອງ ກາເຟ ໂອວັນຕິນ ມູນຄ່າ 3 ລ້ານກີບ ພ້ອມເງິນສົດ 3 ລ້ານກີບ ບໍລິສັດ ເພັດບັນດິດກໍ່ສ້າງ ຈຳກັດຜູ້ດຽວອຸປະຖຳ 5 ລ້ານກີບ ລວມມູນຄ່າທັງໝົດ 11 ລ້ານກີບ ນອກຈາກນັ້ນ ຍັງມີບັນດາຫ້ອງການຕ່າງໆທີ່ໄດ້ນຳເອົາເຄື່ອງໄປມອບໃຫ້ ນາຍ ແລະ ພົນທະຫານ ຕື່ມອີກ ຮ້ອຍເອກ ແສງ ພົມມະວົງ ຫົວໜ້າການທະຫານກອງຮ້ອຍ 241 ໄດ້ສະແດງຄວາມຂອບໃຈມາຍັງຄະນະພັກ ຄະນະນຳນະຄອນຫຼວງ ທີ່ໄດ້ເປັນຫ່ວງເປັນໄຍອ້າຍນ້ອງທະຫານ ທີ່ຢູ່ຫ່າງໄກສອກຫຼີກ ແລະ ຫວັງວ່າຈະນຳໃຊ້ເຄື່ອງນີ້ ໃຫ້ເກີດປະໂຫຍດສູງສຸດ ທັງນີ້ ເພື່ອເປັນການຕ້ອນຮັບວັນສ້າງຕັ້ງກອງທັບ ຄົບຮອບ 66 ປີ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ ແລະ ວັນສະຖາປະນາ ສປປ ລາວ ຄົບຮອບ 40 ປີ.
ແຫລ່ງຂ່າວ: ວຽງຈັນໃໝ່