ໂດຍອີງຕາມຂ່າວຈາກຕ່າງປະເທດ ລາຍງານວ່າ ເມື່ອວັນທີ 18 ມັງກອນ 2015 ທີ່ຜ່ານມາ ເຈົ້າໜ້າທີ່ຄະດີພິເສດ ຮ່ວມກັບຕຳຫຼວດເມືອງເຂັມມະລາດ ຈັງຫວັດອຸບົນ ແລະດ່ານພາສີສາກົນເຂັມມະລາດ ຂອງໄທ ດຳເນີນການອາຍັດຕູ້ຄອນເທນເນີ 30 ກວ່າຕູ້ ທີ່ມີກາປະທັບຜ່ານຂັ້ນຕອນການກວດກາ ແລະອະນຸຍາດຈາກດ່ານພາສີຂອງລາວ ຂົນສົ່ງທາງບັກຂ້າມໄປຍັງຝັ່ງປະເທດໄທ ທີ່ທ່າບັກບ້ານນາຫິນໂງ່ນ ເມືອງນາຕານ ແຂວງອຸບົນ ເນື່ອງຈາກສົງໄສວ່າອາດຈະມີການ ເຊື່ອງໄມ້ຂະຍຸງທີ່ຖືກລັກຕັດໃນປະເທດໄທ ແລ້ວສົ່ງມາຂາຍຍັງຝັ່ງປະເທດລາວ ກ່ອນຈະຖືກຢ້ອນເຂົ້າໄປໃນປະເທດໄທ ເພື່ອສົ່ງໄປຂາຍຍັງປະເທດຈີນ ເຊິ່ງບໍລິສັດທີ່ຮັບຂົນຍ້າຍໄດ້ຍື່ນຄຳຮ້ອງ ຄັດຄ້ານການເປີດ ໂດຍອ້າງເຫດຜົນວ່າຕ້ອງຂໍອະນຸຍາດ ຜ່ານສະຖານທູດຕາມຂະບວນການ ຕາມຂໍ້ຕົກລົງບາເຊໂລນາ ເນື່ອງຈາກຕູ້ໄດ້ຜ່ານພິທີການ ຂອງດ່ານພາສີມາແລ້ວ ເຊິ່ງເປັນສິນຄ້າຜ່ານແດນ.

ໃນຂະນະທີ່ ເຈົ້າໜ້າທີ່ດ່ານພາສີເຂັມມະລາດ ຂອງໄທກ່າວວ່າ ບໍ່ຮູ້ວ່າກົມຄະດີພິເສດຂອງໄທໄດ້ຂໍ້ມູນ ມາຈາກແຫຼ່ງໃດ ຈຶ່ງຂໍກວດກາທັງທີ່ຍັງບໍ່ມີການຈັບກຸມ ຫຼືດຳເນີນການໃດໆກັບໃຜ ທີ່ຜ່ານມາເລື່ອງໄມ້ງຽບຫາຍໄປດົນແລ້ວ ແລະມີຂຶ້ນມາອີກຈຶ່ງອາດຈະເປັນທີ່ສັງເກດ ສຳລັບຕູ້ຄອນເທນເນີເປັນຕູ້ຂອງໄທ ທີ່ໄປບັນຈຸທີ່ປະເທດລາວ ແລະໄດ້ຜ່ານການເຊັນອະນຸຍາດຈາກຝັ່ງລາວ ເຊິ່ງພາສີເຂັມມະລາດເຮັດຕາມໜ້າທີ່ ອຳນວຍຄວາມສະດວກຕູ້ສິນຄ້າສູ່ປະເທດທີສາມ ເປັນສິນຄ້າຜ່ານແດນຕາມຂໍ້ຕົກລົງ ແລະຕູ້ຈຳນວນນີ້ເຈົ້າແຂວງສາລະວັນ ໄດ້ຂໍອຳນວຍຄວາມສະດວກເພື່ອສົ່ງສິນຄ້າ ຜ່ານແດນເຖິງ ເຈົ້າແຂວງອຸບົນ ເຊິ່ງການຂໍກວດສອບ ຂອງກົມຄະດີພິເສດຂອງໄທ ຜູ້ປະກອບການກໍໃຫ້ຄວາມຮ່ວມມື ໃນການກວດສອບເປັນຢ່າງດີ ແຕ່ຂໍໃຫ້ເປັນໄປຕາມຂໍ້ຕົກລົງບາເລໂລນາ.