ຊາວປະມົງອົດສະຕາລີ ລາກມອງຢູ່ທະເລຖືກປາສະຫລາມນ້ຳເລິກດຶກດຳບັນພັນຫາຍາກ ມີຮູບຮ່າງຄ້າຍກັບປາໄຫລໄຟຟ້າ ມີແຂ້ວຫລາຍເຖິງ 300 ເຫລັ້ມ.
ສຳນັກຂ່າວຕ່າງປະເທດ ລາຍງານໃນວັນທີ 22 ມັງກອນນີ້ວ່າ ຊາວປະມົງໃນລັດວິກຕໍເຣຍ ປະເທດອົດສະຕາລີ ສາມາດຈັບປາສະຫລາມຄຣຸຍ (Frilled Shark) ເຊິ່ງເປັນປາສະຫລາມນ້ຳເລິກພັນຫາຍາກ ໃນເຂດແຄມທະເລສາບກິບແລນ ໂດຍຕ້ອງໄດ້ໃຊ້ເຮືອລາກມອງຂະໜາດໃຫຍ່ ກ່ວາຈະສາມາດຈັບໄດ້ສຳເລັດ.
ຫລັງຈາກທີ່ມີປາຕິດໃນມອງ ຜູ້ກ່ຽວກໍຕ້ອງຕ້ອງຕະລຶງ ເມື່ອລຳຕົວຂອງປາສະຫລາມດັ່ງກ່າວ ມີຄວາມຍາວເຖິງ 2 ແມັດ ອີກທັງຮູບຮ່າງຂອງປາກໍຄ້າຍຄືກັນກັບປາໄຫລໄຟຟ້າ, ຕໍ່ມາພາຍຫລັງຈິ່ງຮູ້ວ່າມັນແມ່ນປາສະຫລາມຄຣຸຍ ເຊິ່ງເປັນປາສະຫລາມດຶກດຳບັນ ທີ່ບໍ່ມີການວິວັດທະນາການປ່ຽນແປງຮູບຮ່າງເລີຍ ນັບຕັ້ງແຕ່ເກີດຂຶ້ນເທິງໂລກ ເມື່ອໄລຍະ 80 ລ້ານປີກ່ອນ ໂດຍປາຊະນິດນີ້ຈະອາໄສຢູ່ໃນນ້ຳເລິກປະມານ 1,500 ແມັດ. ຢ່າງໃດກໍຕາມ, ສະຫລາມໂຕດັ່ງກ່າວນີ້ ແມ່ນສາມາດຈັບໄດ້ໃນຂະນະທີ່ມັນຢູ່ໃນນ້ຳເລິກພຽງແຕ່ 700 ແມັດເທົ່ານັ້ນ.
