ໃນຕອນຄ່ຳວັນທີ 14 ມັງກອນ 2015 ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ເປັນກຽດເຂົ້າຮ່ວມງານລ້ຽງອາຫານຄ່ຳທີ່ໂຮງແຮມແລນມາກ ແມ່ຂອງ ຣີເວີໄຊ ຈັດໂດຍເອກອັກຄະລັດຖະທູດແຫ່ງ ສ ຟີລິບປິນ ປະຈຳລາວ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ ຟີລິບປິນ ຄົບຮອບ 60 ປີ ໂດຍມີບັນດາທ່ານລັດຖະມົນຕີວ່າການ ຊ່ວຍວ່າການ ແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້ ທ່ານ ອາລຸນແກ້ວ ກິດຕິຄຸນ ລັດຖະມົນຕີຊ່ວຍວ່າການ ກະຊວງການຕ່າງປະເທດ ແລະ ທ່ານນາງ ມາເລຍ ລູມເມນ ປິ ອິດສາເລນຕາ (Maria Lumen B.Isleta) ເອກອັກຄະລັດຖະທູດແຫ່ງຟີລິບປິນ ປະຈຳ ສປປ ລາວ ໄດ້ຜັດປ່ຽນກັນຂຶ້ນປະກອບຄຳເຫັນ ເຊິ່ງທັງສອງຝ່າຍ ໄດ້ກ່າວເຖິງຜົນສຳເລັດແຫ່ງການພົວພັນຮ່ວມມືໃນໄລຍະ 60 ປີຜ່ານມາ ລະຫວ່າງສອງລັດຖະບານ ກໍ່ຄືປະຊາຊົນສອງຊາດລາວ-ຟີລິບປິນສອງປະເທດ ໄດ້ມີການພົວພັນຮັດແໜ້ນຮ່ວມມືຫຼາຍດ້ານທາງດ້ານການເມືອງ ເສດຖະກິດ ວັດທະນະທຳ ການສຶກສາ ກີລາ ລວມທັງການແລກປ່ຽນການຢ້ຽມຢາມຜູ້ແທນຂັ້ນສູງທັງສອງປະເທດ.
ຢູ່ໃນຂອບອາຊຽນ ຟີລິບປິນ ໄດ້ໃຫ້ການສະໜັບສະໜູນຢ່າງສະເໝີຕົ້ນສະເໝີປາຍຕໍ່ຂໍ້ລິເລີ່ມ ກ່ຽວກັບການເຊື່ອມໂຍງອາຊຽນສຳລັບ ກຳປູເຈຍ ລາວ ມຽນມາ ແລະ ຫວຽດນາມ ຫຼື ບັນດາປະເທດລຸ່ມແມ່ນ້ຳຂອງ ໂດຍສະເພາະແມ່ນ ໂຄງການຮັດແຄບຄວາມແຕກໂຕນດ້ານການພັດທະນາ ແລະ ໄດ້ໃຫ້ທຶນດຳເນີນຫຼາຍໂຄງການ ໃນການພັດທະນາວຽກງານຊັບພະຍາກອນມະນຸດ ໃນຂົງເຂດການສຶກສາ ສາທາລະນະສຸກ ເສດຖະກິດ ກະສິກຳ ແລະ ສິ່ງແວດລ້ອມ.
ໂອກາດດຽວກັນ ທັງສອງຝ່າຍກໍ່ໄດ້ສະແດງຄວາມຫວັງທີ່ຈະສືບຕໍ່ເສີມສ້າງ ແລະ ຮັດແໜ້ນສາຍພົວພັນຮ່ວມມືທີ່ດີໃນປັດຈຸບັນລະຫວ່າງສອງປະເທດ ໃຫ້ເຕີບໃຫຍ່ຂະຫຍາຍຕົວໄປສູ່ບາດກ້າວອັນໃໝ່ໃນຕໍ່ໜ້າ ຍິ່ງເພີ່ມທະວີເຮັດໃຫ້ງານໃນຄັ້ງນີ້ ເຕັມໄປດ້ວຍບັນຍາກາດແຫ່ງມິດຕະພາບອັນອົບອຸ່ນ.
ແຫລ່ງຂ່າວ: ວຽງຈັນໃໝ່