ຂປລ.ໃນ ຕອນແລງຂອງວັນທີ 14 ມັງກອນ 2015 ຢູ່ຫ້ອງວ່າການລັດຖະບານ ໄດ້ຈັດກອງປະຊຸມປືກສາຫາລື ຄຸ້ມຄອງອິນເຕີເນັດແຫ່ງຊາດ(ຄຄອຊ) ພາຍໃຕ້ການເປັນປະທານຂອງທ່ານ ດຣ. ບຸນປອນ ບຸດຕະນະວົງ ຮອງນາຍົກລັດຖະມົນຕີ, ຜູ້ຊີ້ນຳຂົງເຂດເສດຖະກິດມະຫາພາກ ແລະ ບໍລິການ ໂດຍມີບັນດາທ່ານລັດຖະມົນຕີວ່າການ, ຊ່ວຍວ່າການ, ຫົວໜ້າກົມ,ຮອງກົມ ຈາກບັນດາຂະແໜງການທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະຊຸມ ເພື່ອທົບທວນຄືນການຈັດຕັ້ງປະຕິບັດວຽກງານໃນໄລຍະຜ່ານມາ ໂດຍສະເພາະວຽກງານການກວດກາ ແລະ ການແກ້ໄຂບັນຫາປະກົດການຫຍໍ້ທໍ້ ທີ່ເກີດຂຶ້ນຢູ່ໃນສື່ສັງຄົມອອນລາຍ. ນອກນັ້ນ, ຄະນະກຳມະການຄຸ້ມຄອງອິນເຕີເນັດແຫ່ງຊາດ ຍັງໄດ້ພ້ອມກັນປືກສາຫາລື ແລະ ຖອດຖອນບາງບົດຮຽນໃນຕໍ່ໜ້າ. ໂດຍສະເພາະການເຄື່ອນໄຫວສະເພາະກິດທີ່ປະຕິບັດໄດ້ ເຊັ່ນ:ດ້ານນິຕິກຳ, ດ້ານເຕັກນິກ. ຫລັງຈາກນັ້ນ, ກອງປະຊຸມ ກໍຍັງໄດ້ຕີລາຄາດ້ານດີ-ດ້ານອ່ອນ, ຂໍ້ຄົງຄ້າງ ແລະ ແຜນການໃນຕໍ່ໜ້າ.
ຜ່ານການປະກອບຄຳຄິດຄໍາເຫັນ ແລະ ປືກສາຫາລືຢ່າງກົງໄປກົງມາແລ້ວ, ທ່ານ ປະທານ ກອງປະຊຸມກໍໄດ້ໃຫ້ທິດຊີ້ນຳ ແລະ ເນັ້ນໜັກຕື່ມອີກວ່າ: ໃນຕໍ່ໜ້າໃຫ້ຄະນະຄຸ້ມຄອງອິນເຕີເນັດແຫ່ງຊາດເອົາໃຈໃສ່ສືບຕໍ່ຈັດຕັ້ງປະຕິບັດ ໂຄສະນາເຜີຍແຜ່ດຳລັດວ່າດ້ວຍການຄຸ້ມຄອງອິນເຕີເນັດໃຫ້ທົ່ວເຖິງ, ຄຽງຄູ່ກັນນັ້ນ ກໍຈະຕ້ອງໄດ້ສືບຕໍ່ເຜີຍແຜ່ຜົນສຳເລັດການສ້າງສາພັດທະນາປະເທດຊາດ ແລະ ພັດທະນາເສດຖະກິດແຫ່ງຊາດ ໂດຍຜ່ານອິນເຕີເນັດ ຄຽງຄູ່ກັນນັ້ນ ຈະຕ້ອງໄດ້ສືບຕໍ່ເກັບກຳຂໍ້ມູນ ແລະ ສືບໃຫ້ຮູ້ໄວ ກັບຜູ້ທີ່ບໍ່ຫວັງດີຕໍ່ປະເທດຊາດ ໂດຍຜ່ານສື່ສັງຄົມອອນລາຍ.
ແຫລ່ງຂ່າວ: ສຳນັກຂ່າວສານປະເທດລາວ