ໃນວັນທີ 13 ມັງກອນຜ່ານມາ ສານປະຊາຊົນນະຄອນຫຼວງວຽງຈັນ ໄດ້ຕັດສີນລົງໂທດ ທ້າວ ຈັນທີ ອາຍຸ 36 ປີຢູ່ບ້ານໂຊກຄຳ ເມືອງໄຊເສດຖາ ແລະ ນາງ ພີມມະສອນ (ໄກ່) ອາຍຸ 18 ປີ ຢູ່ບ້ານໂພນສະຫວັນ ເມືອງສີສັດຕະນາກ ນະຄອນຫລວງວຽງຈັນ ຈຳຄຸກຄົນລະ 5 ປີພ້ອມປັບໃໝ 10 ລ້ານກີບ ໃນຂໍ້ຫາຮ່ວມ ກັນຄ້າຢາເສບຕິດ, ເຊິ່ງທັງສອງຖືກເຈົ້າໜ້າທີ່ຈັບຕົວ ເມື່ອເດືອນທັນວາ 2014 ຢູ່ເຮືອນພັກແຫ່ງໃນນະຄອນຫລວງວຽງຈັນ ພ້ອມຂອງກາງຢາບ້າ 72 ເມັດ ແລະ ຢາໄອ 8 ຫລອດ.
ເຈົ້າໜ້າທີ່ໃຫ້ຮູ້ວ່າ: ຜ່ານການສືບສວນ -ສອບສວນ ທ້າວ ຈັນທີ ຮັບສາລະພາບໄດ້ເລີ່ມເຄື່ອນໄຫວຄ້າຂາຍຢາເສບຕິດມາແຕ່ປີ 2013 ໂດຍຢາທີ່ເອົາມາຈຳໜ່າຍ ແມ່ນຮັບມາຈາກຂະບວນການຄ້າຢາເສບຕິດ ຢູ່ເມືອງໄຊເສດຖາ ເພື່ອຈຳໜ່າຍໃຫ້ກັບຊາວໜຸ່ມ ໃນເຂດບ້ານໂຊກຄຳ ວັງຊາຍ ໂພນສະຫວ່າງ ແລະ ບ້ານໃກ້ຄຽງ ໃນເມືອງໄຊເສດຖາ ແລະ ເມື່ອທ້າຍປີ 2013 ໄດ້ຮູ້ຈັກກັບ ນາງ ພິມມາສອນ ຈຶ່ງຮ່ວມກັນຄ້າຢາເສບຕິດ ເຊິ່ງມີທັງຢາບ້າ ແລະ ຢາໄອ ແລະ ຕົກມາຮອດທ້າຍປີ 2014 ຈຶ່ງຖືກເຈົ້າໜ້າທີ່ນຳຈັບຕົວມາດຳເນີນຄະດີຕາມລະບຽບກົດໝາຍ.
ແຫລ່ງຂ່າວ: ລາວພັດທະນາ