ກົມຄຸ້ມຄອງ ແລະ ພັດທະນາທີ່ດິນກະສິກຳ ກະຊວງກະສິກຳ ແລະ ປ່າໄມ້ ບໍ່ມີສິດທີ່ຈະແບ່ງປັນ ແລະ ຫ້າມບໍ່ໃຫ້ມີການແບ່ງປັນຕອນດິນໃຫ້ແກ່ບຸກຄົນ, ນິຕິບຸກຄົນ ແລະ ການຈັດຕັ້ງຕ່າງໆ ແຕ່ມີພາລະບົດບາດເປັນໃຈກາງ ໃນການຈັດຕັ້ງປະຕິບັດວຽກງານສຳຫຼວດ, ຈັດສັນ, ກຳນົດ, ແບ່ງເຂດທີ່ດິນກະສິກຳ, ຄຸ້ມຄອງການນຳໃຊ້ປົກປັກຮັກສາ, ບູລະນະ ແລະ ປັບປຸງດິນ, ການທົດລອງສາທິດ ແລະ ຖ່າຍທອດເຕັກໂນໂລຊີປັບປຸງດິນ ແລະ ນຳໃຊ້ດິນທີ່ເໝາະສົມ ແນໃສ່ຄຸ້ມຄອງ ແລະ ພັດທະນາທີ່ດິນກະສິກຳໃຫ້ມີປະສິດທິຜົນ ແລະ ຢືນຍົງ.
ທ່ານ ອານຸລາດ ຈັນທະວົງສາ ຮອງຫົວໜ້າກົມຄຸ້ມຄອງ ແລະ ພັດທະນາທີ່ດິນກະສິກຳ ໄດ້ຕອບຂໍ້ຊັກຖາມສາຍດ່ວນຂອງສະພາແຫ່ງຊາດ ໃນວັນທີ 13 ມັງກອນ 2015 ທີ່ສະພາແຫ່ງຊາດ ຕໍ່ກັບບັນຫາທີ່ພະນັກງານບຳນານຢູ່ແຂວງຊຽງຂວາງ ສະເໜີວ່າ “ທີ່ດິນທຳການຜະລິດໃນປັດຈຸບັນ ສ່ວນຫຼາຍມີແຕ່ພະນັກງານຂັ້ນສູງ ໄດ້ດິນເປັນຈຳນວນຫຼວງຫຼາຍແຕ່ທີ່ດິນທີ່ປະຊາຊົນທຳການຜະລິດກະສິກຳ ແມ່ນຕ້ອງໄດ້ຊື້ໃນລາຄາແພງ”. ຕໍ່ບັນຫາດັ່ງກ່າວ ເຫັນວ່າການສະເໜີຜ່ານສາຍດ່ວນນັ້ນ ມີລັກສະນະກວມລວມ, ບໍ່ສະເພາະເຈາະຈົງວ່າຢູ່ຈຸດໃດ, ບ້ານໃດ ແລະ ເມືອງໃດ ເພື່ອທີ່ຈະໃຫ້ວິຊາການກ່ຽວຂ້ອງລົງໄປຕິດຕາມກວດກາ ເພື່ອຈະໄດ້ຕອບຂໍ້ຂ້ອງໃຈໃຫ້ຊັດເຈນ ແຕ່ຢ່າງໃດກໍ່ຕາມ ກົມຄຸ້ມຄອງ ແລະ ພັດທະນາທີ່ດິນກະສິກຳ ກໍ່ໄດ້ປະສານໄປຕາມສາຍຕັ້ງຢູ່ຂັ້ນທ້ອງຖິ່ນ ແຕ່ຍັງບໍ່ຮູ້ວ່າ ຢູ່ຈຸດໃດຂອງແຂວງຊຽງຂວາງ, ສະນັ້ນຈິ່ງບໍ່ທັນໃຫ້ຄຳກະຈ່າງແຈ້ງໄດ້ເທົ່າທີ່ຄວນ.
ທ່ານ ອານຸລາດ ຈັນທະວົງສາ ກ່າວອີກວ່າ: ອີງໃສ່ພາລະບົດບາດ ແລະ ໜ້າທີ່ຂອງກົມຄຸ້ມຄອງ ແລະ ພັດທະນາທີ່ດິນກະສິກຳ ແມ່ນບໍ່ມີສິດທີ່ຈະແບ່ງປັນ ແລະ ຫ້າມບໍ່ໃຫ້ມີການແບ່ງປັນຕອນດິນໃຫ້ແກ່ບຸກຄົນ, ນິຕິບຸກຄົນ ແລະ ການຈັດຕັ້ງຕ່າງໆ. ນອກຈາກອຳນາດການປົກຄອງທີ່ກ່ຽວຂ້ອງ ບົນພື້ນຖານກົດໝາຍ ແລະ ລະບຽບການທີ່ກຳນົດໄວ້ ເພາະວ່າທີ່ດິນແຕ່ລະປະເພດ ແມ່ນຂຶ້ນກັບການຄຸ້ມຄອງຂອງອຳນາດການປົກຄອງທ້ອງຖິ່ນ ບ່ອນທີ່ດິນດັ່ງກ່າວຕັ້ງຢູ່ວ່າຈະຈັດແບ່ງແນວໃດ. ສຳລັບກົມຄຸ້ມຄອງ ແລະ ພັດທະນາທີ່ດິນກະສິກຳ ແມ່ນມີໜ້າທີ່ທາງດ້ານວິຊາການ, ຕອບສະໜອງຂໍ້ມູນກ່ຽວກັບແຕ່ລະປະເພດດິນ ທີ່ມີຄວາມຕ້ອງການຈະປູກພືດຊະນິດໃດ ຈຶ່ງມີຄວາມເໝາະສົມ ແລະ ໃຫ້ຂໍ້ແນະນຳໃນການໃຊ້ຝຸ່ນຊະນິດໃດ, ໃນອັດຕາສ່ວນເທົ່າໃດ ເພື່ອໃຫ້ມີຜົນຜະລິດສູງ.
ໃນໂອກາດນີ້, ທ່ານຮອງຫົວໜ້າກົມຄຸ້ມຄອງ ແລະ ພັດທະນາທີ່ດິນກະສິກຳ ຍັງໄດ້ຮຽກຮ້ອງມາຍັງທຸກພາກສ່ວນ ທີ່ມີຂໍ້ສະເໜີຜ່ານໂທລະສັບສາຍດ່ວນຂອງສະພາແຫ່ງຊາດ ຄວນລະບຸລາຍລະອຽດກ່ຽວກັບບັນຫາ ທີ່ຈະສະເໜີໃຫ້ຈະແຈ້ງວ່າບັນຫານັ້ນເກີດຂຶ້ນຢູ່ໃສ່, ຂົງເຂດໃດ ເພື່ອຈະໃຫ້ພາກສ່ວນກ່ຽວຂ້ອງລົງຕິດຕາມກວດກາຄືນ ວ່າບັນຫາດັ່ງກ່າວແມ່ນຖືກຕ້ອງກັບຄວາມເປັນຈິງແທ້ ຫຼື ບໍ່.
ແຫລ່ງຂ່າວ: ວຽງຈັນໃໝ່