ຖ້າເວົ້າເຖິງເມນູອາຫານທີ່ສະດວກ ກິນງ່າຍ ແຖມລົດຊາດແຊບ ໜຶ່ງໃນນັ້ນມີເມນູ ເຝີ ເຂົ້າປຽກ ຢ່າງແນ່ນອນ ນັ້ນເພາະເລືອກສັ່ງໄດ້ຕາມມັກໃຈ ທັງແບບ ແກງ ຫລື ແຫ້ງກໍມີໃຫ້ເລືອກ ແຖມຍັງມີເສັ້ນໃຫ້ເລືອກຫລວງຫລາຍ ທັງ ເສັ້ນເຂົ້າປຽກເສັ້ນໃຫຍ່ເສັ້ນນ້ອຍ ເສັ້ນເຂົ້າຊອຍ ເສັ້ນເຝີ ເສັ້ນໝີ່ ເສັ້ນລ້ອນ ແຕ່ຮູ້ຫລືບໍ່ວ່າ ສາລະພັດເສັ້ນທີ່ເປັນສ່ວນປະກອບຫລັກໃນຄາບອາຫານແຊບໃຫ້ພະລັງງານເທົ່າໃດ ຢາກຮູ້ແລ້ວແມ່ນບໍ່ວ່າໃນບັນດາອາຫານເສັ້ນໆ ເຫລົ່ານີ້ ເຈົ້າຄວນຈະເລືອກທານເສັ້ນໃດດີ
ລ້ອນ ໃຫ້ພະລັງງານ 330 ກິໂລແຄລໍລີ ເຫັນຕົວເລກພະລັງງານຫລາຍຂະໜາດນີ້ ຢ່າຟ້າວຕົກໃຈ ເພາະເສັ້ນລ້ອນມີນ້ຳໜັກເບົາຫລາຍ 1 ຖົງປະມານ 50 ກຣາມເທົ່ານັ້ນ ປົກກະຕິທີ່ກິນກໍບໍ່ເຖິງ 100 ກຣາມ ແຕ່ມີຫລາຍຄົນເຂົ້າໃຈຜິດວ່າ ເສັ້ນລ້ອນເປັນໂປຕີນ ແມ່ນຢູ່ວ່າ ເສັ້ນຊະນິດນີ້ເຮັດມາຈາກຖົ່ວຂຽວ ແຕ່ໃນກະບວນການຜະລິດຖົ່ວຈະຖືກແຍກໂປຕີນອອກໄປຈົນເຫລືອແຕ່ແປ້ງ ແລະ ຍັງມີການປະສົມແປ້ງມັນລົງໄປເພື່ອເປັນການຫລຸດຕົ້ນທຶນນໍາອີກ ເມື່ອກິນແລ້ວຈະບໍ່ໜຽວເທົ່າເສັ້ນລ້ອນຈາກຖົ່ວຂຽວ 100%
ເສັ້ນໝີ່ ໃຫ້ພະລັງງານ 300 ກິໂລແຄລໍລີ ໂດຍເສັ້ນໝີ່ສີເຫລືອງເຮັດມາຈາກແປ້ງສາລີ ຊຶ່ງເປັນແປ້ງທີ່ມີໂປຕີນ ສູງພໍສົມຄວນ ແຖມຍັງໄດ້ປະໂຫຍດຈາກ ແຄໂລທີນອຍ ແລະ ຟະລາໂວນອຍ ຊຶ່ງເປັນສານຕ້ານອານຸມູນອິດສະຫລະໃນກຸ່ມ ວິຕາມິນເອ ນໍາອີກ ສ່ວນໝີ່ເຄິ່ງສຳເລັດຮູບ ເຖິງແມ່ນຈະມີສີເຫລືອງຄືກັນ ແຕ່ກໍຜ່ານການຈືນ ແລະ ປຸງລົດຈົນມີໄຂມັນ ແລະ ໂຊດຽມສູງ ປະລິມານ 1 ຖົງ (60 ກຣາມ) ກໍໃຫ້ພະລັງງານເຖິງ 280 ກິໂລແຄລໍລີ ແລະ ຍັງເປັນພະລັງງານຈາກໄຂມັນເກືອບເຄິ່ງໜຶ່ງ ຖ້າຢາກກິນ ໝີ່ເຄິ່ງສຳເລັດຮູບ ຄວນຊື້ຊະນິດທີ່ມີການເຕີມສານອາຫານ ເຊັ່ນ ໄອໂອດີນ ທາດເຫລັກ ຫລືວິຕາມິນເອເພີ່ມເຂົ້າໄປ ເພື່ອເພີ່ມຄຸນຄ່າທາງໂພສະນາການໃຫ້ຫລາຍຂຶ້ນ
ເສັ້ນເຝີ ໃຫ້ພະລັງງານ 150 – 220 ກິໂລແຄລໍລີ ເຝີເສັ້ນຂາວໆ ທັງເສັ້ນໃຫຍ່ ເສັ້ນນ້ອຍ ແລະ ເສັ້ນໝີ່ ລ້ວນເຮັດມາຈາກແປ້ງເຂົ້າເຈົ້າຄືກັນ ແຕ່ໃຫ້ພະລັງງານທີ່ຕ່າງກັນຂຶ້ນຢູ່ກັບຄວາມຊຸ່ມຂອງເສັ້ນ ໂດຍເສັ້ນໃຫຍ່ຈະມີແຄລໍລີສູງທີ່ສຸດ ເພາະມັກຈະເຄືອບນ້ຳມັນ ເຮັດໃຫ້ໃນປະລິມານ 100 ກຣາມ ໃຫ້ພະລັງງານສູງເຖິງ 220 ກິໂລແຄລໍລີ ໃນຂະນະທີ່ເສັ້ນນ້ອຍໃຫ້ພະລັງງານປະມານ 180 ກິໂລແຄລໍລີ ແລະ ເສັ້ນໝີ່ໃຫ້ພະລັງງານປະມານ 150 ກິໂລແຄລໍລີເທົ່ານັ້ນ
ເສັ້ນເຂົ້າປຸ້ນ ໃຫ້ພະລັງງານ 80 ກິໂລແຄລໍລີ ເສັ້ນເຂົ້າປຸ້ນເຖິງແມ່ນຈະເຮັດຈາກແປ້ງສາລີຄືກັບເສັ້ນເຝີ ແຕ່ແປ້ງສຳລັບເສັ້ນເຂົ້າປຸ້ນຈະໝັກແຊ່ນ້ຳໄວ້ກ່ອນ ຈຶ່ງນຳໄປຜ່ານຂະບວນການຕ່າງໆ ແລະ ມັກເປັນເສັ້ນສົດໃໝ່ທີ່ເຮັດມື້ຕໍ່ມື້ ເສັ້ນຈຶ່ງມີອົງປະກອບຂອງນ້ຳຫລາຍ ແລະ ໃຫ້ພະລັງງານຕ່ຳກວ່າເສັ້ນເຝີ ແຕ່ຂໍ້ເສຍຢ່າງໜຶ່ງຂອງເສັ້ນທີ່ມີຄວາມຊຸ່ມສູງແບບນີ້ກໍຄື ກິນແລ້ວຮູ້ສຶກວ່າ ບໍ່ຢູ່ທ້ອງ ວິທີການເລືອກຊື້ຄວນເລືອກແບບທີ່ເປັນສີທຳມະຊາດ ບໍ່ມີການແຕ່ງສີເພີ່ມເຕີມ ແລະ ຖ້າຊື້ມາແລ້ວຍັງບໍ່ກິນຄວນແຊ່ ຕູ້ເຢັນເອົາໄວ້ ແມ່ນຈະເປັນແປ້ງໝັກແຕ່ກໍບໍ່ຄວນຖິ້ມໄວ້ຂ້າມມື້
ຮູ້ແບບນີ້ແລ້ວ ການອາຫານປະເພດທີ່ມີເສັ້ນເປັນສ່ວນປະກອບໃນມື້ ຕໍ່ໄປ ເຮັດໃຫ້ຕັດສິນໃຈງ່າຍຂຶ້ນວ່າ ຄວນກິນເສັ້ນແບບໃດໃນມື້ໃດ ເພື່ອໃຫ້ໄດ້ພະລັງງານພຽງພໍໃນແຕ່ລະມື້