ເມື່ອປີກາຍ ມີອົງກອນທຸລະກິດທາງດ້ານການເງິນ ແຫ່ງໜຶ່ງໄດ້ຖວາຍປັດໄຈອຸປະຖຳແກ່ ອພສ ສູນກາງຈຳນວນ 10,000 ໂດລາສະຫະລັດ ແຕ່ຕອນນັ້ນຍັງບໍ່ໄດ້ຂໍພະພຸດທະຮູບ ແລະມີການພົວພັນ ອຸປະຖຳຕໍ່ມາ ຈົນມື້ໜຶ່ງໄດ້ຂໍເອົາພະພຸດທະຮູບອົງດັ່ງກ່າວ ຈາກເຈົ້າອະທິການວັດອົງຕື້ ແຕ່ເຈົ້າອະທິການວັດໄດ້ໃຫ້ພາກສ່ວນ ດັ່ງກ່າວນັ້ນແລ່ນເອກະສານກ່ອນ ແລ້ວເມື່ອເອກະສານໄປເຖິງກະຊວງ ຖະແຫຼງຂ່າວ-ວັດທະນະທຳ ແລະທ່ອງທ່ຽວ ປະກອບກັບຫາງສຽງຄັດຄ້ານຂອງປະຊາຊົນ ແລະພະສົງຈຳນວນໜຶ່ງ ຈຶ່ງເຮັດໃຫ້ເປັນຂ່າວໂດ່ງດັງ ແລະແລ້ວເອກະສານດັ່ງກ່າວຈຶ່ງບໍ່ຜ່ານໃນລະດັບກະຊວງ.
ຕົກມາມື້ນີ້ ວັນທີ 9 ມັງກອນ 2015 ພາກສ່ວນທີ່ມາຂໍພະພຸດທະຮູບ ຄົງຈະໄດ້ເອກະສານເຊັນຜ່ານຮຽບຮ້ອຍ ຈຶ່ງມານິມົນເອົາພະພຸດທະຮູບອົງດັ່ງກ່າວ ຂຶ້ນລົດໃນຕອນທ່ຽງ ເພື່ອເດິນທາງໄປຍັງປະເທດຫວຽດນາມ ດ້ວຍຄວາມອາໄລອາວອນ ສຸດແສນເດຍດາຍຂອງພະສົງ ແລະຍາດໂຍມເກືອບທຸກຄົນທີ່ຮູ້ຂ່າວ.
ແລະໃນທີ່ສຸດຕອນ 16:30 ຂອງວັນດຽວກັນນີ້ ພະພຸດທະຮູບອົງດັ່ງກ່າວຖືກ ນິມົນກັບຄືນມາປະດິດສະຖານຢູ່ວັດອົງຕື້ ແຫ່ງນີ້ຄືນອີກ ໂດຍມີຂ່າວວ່າໄດ້ເກີດອະພິນິຫານຂຶ້ນ ຈົນເຮັດໃຫ້ບໍ່ສາມາດນິມົນ ພະອົງອອກນອກປະເທດໄດ້ ແຕ່ຂ່າວກໍຍັງບໍ່ຈະແຈ້ງວ່າອະພິນິຫານ ທີ່ເກີດຂຶ້ນນັ້ນແມ່ນເກີດຫຍັງຂຶ້ນແທ້ ແຕ່ທີ່ພະສົງແລະປະຊາຊົນລາວ ສ່ວນຫຼາຍດີໃຈນັ້ນແມ່ນ ພະພຸດທະຮູບອົງດັ່ງກ່າວຖືກນິມົນມາປະດິດສະຖານ ຢູ່ວັດອົງຕື້ຄືເກົ່າແລ້ວ.
ແຕ່ແນວໃດກໍຕາມ ພະສົງແລະປະຊາຊົນລາວ ທີ່ຮູ້ຂ່າວກໍຍັງບໍ່ສະບາຍໃຈເຕັມຮ້ອຍ ວ່າພະພຸດທະຮູບອົງດັ່ງກ່າວຈະບໍ່ຖືກນິມົນ ໄປປະດິດສະຖານຢູ່ຕ່າງປະເທດອີກ ຖ້າຫາກວ່າພາກສ່ວນທີ່ກ່ຽວຂ້ອງ ຍັງບໍ່ອອກມາຖະແຫຼງຂ່າວ ຢືນຢັນຢ່າງເປັນທາງການ.
ພະພຸດທະຮູບອົງນີ້ ເປັນພຸດທະຮູບໂລຫະທອງ ມີຂະໜາດໃຫຍ່ ມີຄວາມສູງປະມານ 1 ແມັດ ສັນນິຖານວ່າຖືກສ້າງຂຶ້ນໃນສະໄໝ ພະເຈົ້າໄຊເສດຖາ ຫຼືກ່ອນໜ້ານັ້ນ ແລະມີຄວາມຄ້າຍຄືກັນກັບ ພະພຸດທະຮູບສາມສີ ວັດຫຼິ່ງຊັນ ເມືອງທຸລະຄົມ. ພະພຸດທະຮູບອົງນີ້ ຖືກປະດິດສະຖານຢູ່ວັດອົງຕື້ ມະຫາວິຫານມາໄດ້ຫຼາຍເຊັ່ນຄົນ (ຍັງບໍ່ມີຂໍ້ມູນແນ່ນອນ) ແລະມີຂໍ້ມູນວ່າ ອາດຈະເປັນຕົ້ນແບບໃຫ້ແກ່ ການຫຼໍ່ພະອົງຕື້ ພະພຸດທະຮູບປະທານຢູ່ສິມວັດອົງຕື້ ໃນປັດຈຸບັນນີ້.
ຜູ້ອ່ານຂ່າວທ່ານໃດມີຂໍ້ມູນກ່ຽວກັບເລື່ອງນີ້ ຢ່າລືມປະກອບຄຳເຫັນແລກປ່ຽນແດ່ເດີ ເພື່ອຜູ້ອ່ານຫຼາຍທ່າຈະໄດ້ຄວາມກະຈ່າງແຈ້ງ ຂຶ້ນຕື່ມອີກ.