ອິນແຕ່ງ ແກ້ວບົວລາ ສາວຜິວກາເຟນົມ ແຕ່ນ້ຳສຽງໃສ ຍິ້ມງ່າຍ ແມ່ນລູກສາວຂອງ ບຸນທອງ ແກ້ວບົວລາໝໍລຳສີພັນດອນ ແລະ ບຸນເພັງ ແກ້ວບົວລາ ນາງເອກໝໍລຳເລື່ອງຕໍ່ກອນ ເຊິ່ງຕ່າງກໍເປັນໝໍລຳດັງໃນເຂດພາກໃຕ້.
ໝໍລຳອິນແຕ່ງ ເກີດຢູ່ໃນທ່າມກາງສຽງລຳ ກໍເລີຍມີຄວາມຮັກທາງດ້ານນີ້ມາຕັ້ງແຕ່ນ້ອຍໆ ເລິ່ມອ່ານໜັງສືໄດ້ກໍໄດ້ເລິ່ມຮຽນລຳມາຕັ້ງແຕ່ອາຍຸ 9 ປີ, ມີໂອກາດໄດ້ເລິ່ມຮັບງານຕັ້ງແຕ່ອາຍຸ 14 ປີ ແລະຕັ້ງແຕ່ເລິ່ມລຳມາຮອດປັດຈຸບັນກໍເປັນເວລາ 14 ປີແລ້ວ, ໄດ້ອັດຜົນງານອອກວາງຈຳໜ່າຍແລ້ວ 4 ຊຸດ(ຮ່ວມກັບໝູ່) ຖືວ່າເປັນຜູ້ມີປະສົບການ ທາງດ້ານການລຳມາຢ່າງຫຼວງຫຼາຍ.
ອິນແຕ່ງ ມີເຈົ້າພາບງານບຸນມາຕິດຕໍ່ ໄປລຳງັນກອງບຸນເກືອບທຸກມື້ ໄລຍະໃດທີ່ບໍ່ໄດ້ງານແທ້ໆ ກໍອາທິດລະ 2-3 ງານ, ເວົ້າໄດ້ວ່າເກືອບບໍ່ໄດ້ພັກຜ່ອນເລີຍ ມີແຕ່ເດິນທາງໄປລຳຕາມງານບຸນຕ່າງໆ ຕ້ອງອາໄສນອນໃນເວລາເດິນທາງແທນ ເພາະສ່ວນຫຼາຍແລ້ວແຕ່ລະງານກໍຕ້ອງລຳແຕ່ຫົວຄ່ຳຈົນຂ້ອນແຈ້ງ.
ຕົກມາທ້າຍປີ 2014 ຕໍ່ໃສ່ 2015 ຄິວລຳໜາແໜ້ນ ຫຼ້າສຸດທີ່ຮູ້ຂ່າວແມ່ນໄດ້ໄປລຳຢູ່ກຳປູເຈຍ ເຊິ່ງກໍໄດ້ຮັບຄວາມນິຍົມຊົມຊອບຈາກສັງຄົມ ມີພໍ່ແມ່ປະຊາຊົນເຂົ້າຮ່ວມຊົມຮ່ວມຟັງ ຢ່າງຫຼວງຫຼາຍ.
