ໃນຕອນເຊົ້າວັນທີ 12 ສິງຫາ 2026 ທີ່ນະຄອນຫຼວງວຽງຈັນ, ທ່ານ ສອນໄຊ ສີພັນດອນ, ນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມ ແລະ ຊີ້ນຳ ຕໍ່ກອງປະຊຸມວຽກງານສົ່ງເສີມ ແລະ ຄຸ້ມຄອງການລົງທຶນ ຄັ້ງທີ I; ມີທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ຜູ້ປະຈໍາການ, ປະທານຄະນະກຳມະການສົ່ງເສີມ ແລະ ຄຸ້ມຄອງການລົງທຶນ, ບັນດາທ່ານ ລັດຖະມົນຕີ, ປະທານຄະນະກຳມະການປົກຄອງ ນະຄອນຫຼວງວຽງຈັນ ແລະ ບັນດາແຂວງ, ພ້ອມດ້ວຍຜູ້ຕາງໜ້າຂະແໜງການຂັ້ນສູນກາງ, ທ້ອງຖິ່ນ ແລະ ພາກທຸລະກິດ ເຂົ້າຮ່ວມ.
ກອງປະຊຸມ ໄດ້ຮັບຟັງການສະຫຼຸບຕີລາຄາ ສະພາບການສົ່ງເສີມ-ຄຸ້ມຄອງການລົງທຶນ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ; ຜົນການປະເມີນການຈັດຕັ້ງປະຕິບັດດຳລັດ ວ່າດວ້ຍການຈັດຕັ້ງ ແລະ ເຄື່ອນໄຫວຂອງ ຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ສະບັບເລກທີ 530/ນຍ, ລົງວັນທີ 11 ສິງຫາ 2025; ການປະກອບຄໍາເຫັນຂອງບັນດາ ຂະແໜງການຂັ້ນສູນກາງ, ແຂວງ-ນະຄອນຫຼວງວຽງຈັນ ແລະ ພາກທຸລະກິດ ທີ່ຕິດພັນກັບນະໂຍບາຍ ກໍຄືການເຄື່ອນໄຫວວຽກງານສົ່ງເສີມ ແລະ ຄຸ້ມຄອງການລົງທຶນ. ນັບແຕ່ປີ 1989 ຮອດປະຈຸບັນ ການລົງທຶນເອກະຊົນພາຍໃນ ແລະ ຕ່າງປະເທດ ບັນລຸ 5,394 ໂຄງການ, ມູນຄ່າ 65.5 ຕື້ໂດລາສະຫະລັດ. ໃນນັ້ນ, ການລົງທຶນພາຍໃນ ສະເພາະກິດຈະການຄວບຄຸມ ແລະ ສໍາປະທານ ກວມເອົາ 23% ຂອງການອະນຸມັດລົງທຶນທັງໝົດ.
ຜູ້ລົງທຶນຕ່າງປະເທດ ທີ່ມາລົງທຶນຫຼາຍກວ່າໝູ່ ແມ່ນຈາກ ສປ ຈີນ ມີ 970 ໂຄງການ, ມູນຄ່າ 15 ຕື້ກວ່າໂດລາສະຫະລັດ, ຮອງລົງມາແມ່ນຈາກ ສສ ຫວຽດນາມ ມີ 441 ໂຄງການ, ມູນຄ່າ 12.7 ຕື້ກວ່າໂດລາສະຫະລັດ ແລະ ຣາຊະອານາຈັກໄທ ມີ 686 ໂຄງການ, ມູນຄ່າ 6.9 ຕື້ກວ່າໂດລາສະຫະລັດ. ສະເພາະໃນ 7 ເດືອນຕົ້ນປີ 2026 ໄດ້ອະນຸມັດການລົງທຶນ ໃນກິດຈະການສໍາປະທານ ແລະ ບັນຊີກິດຈະການຄວບຄຸມ ທັງໝົດ 34 ໂຄງການ, ມູນຄ່າ 8.5 ຕື້ກວ່າໂດລາສະຫະລັດ ເມື່ອທຽບໃສ່ໄລຍະດຽວກັນຂອງປີ 2025 ເຫັນວ່າ ເພີ່ມຂື້ນ 68% ແລະ ການນໍາເຂົ້າທຶນຕົວຈິງບັນລຸ 1 ຕື້ກວ່າໂດລາສະຫະລັດ.
ໃນໂອກາດດັ່ງກ່າວ, ທ່ານ ນາຍົກລັດຖະມົນຕີ ໄດ້ມີຄຳເຫັນຊີ້ນຳຕື່ມບາງຈຸດ ເປັນຕົ້ນ ພ້ອມກັນສຸມໃສ່ຈັດຕັ້ງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X ຕາມ 7 ທິດທາງລວມ ແລະ 6 ເປົ້າໝາຍ; ສ້າງເສດຖະກິດເອກະລາດ ເປັນເຈົ້າຕົນເອງ ໃນໄລຍະໃໝ່ ໃຫ້ມີຄວາມໜັກແໜ້ນ, ເຂັ້ມແຂງ ຕາມ 5 ແນວຄິດຊີ້ນໍາ, 4 ທິດທາງລວມ, 3 ເປົ້າໝາຍສູ້ຊົນ ແລະ 4 ແຜນນະໂຍບາຍ; ປັບປຸງສະພາບແວດລ້ອມການລົງທຶນໃຫ້ສະດວກ, ໂປ່ງໃສ, ສາມາດຄາດຄະເນໄດ້ ແລະ ມີຕົ້ນທຶນ ທີ່ສາມາດແຂ່ງຂັນ; ຫັນປ່ຽນຈາກດຶງດູດການລົງທຶນໄດ້ປະລິມານ ໄປສູ່ຄຸນນະພາບ, ສ້າງມູນຄ່າເພີ່ມ, ສ້າງວຽກເຮັດງານທຳ, ມີທັກສະ, ມີອາຊີບ, ຖ່າຍທອດເຕັກໂນໂລຊີນະວັດຕະກຳ, ປັນຍາປະດິດ ແລະ ຫັນໄປສູ່ດີຈິຕອນ; ສາມາດເຊື່ອມໂຍງທຸລະກິດພາຍໃນ ກັບຕ່າງປະເທດ; ປະຕິບັດນະໂຍບາຍສົ່ງເສີມການລົງທຶນ ທີ່ເຂັ້ມແຂງ, ສີຂຽວ ແລະ ຍືນຍົງ ເປັນຕົ້ນ ພະລັງງານທົດແທນ, ກະສິກຳທີ່ຍືນຍົງ, ໂຄງລ່າງພື້ນຖານທີ່ໝັ້ນຄົງ ແລະ ການຜະລິດ-ປຸງແຕ່ງ ຕາມທິດສີຂຽວ-ຍືນຍົງ ແລະ ສາມາດປັບຕົວກັບການປ່ຽນແປງດິນຟ້າອາກາດ; ປະຕິບັດ 3 ວຽກບູລິມະສິດ ຄື:
ແກ້ໄຂການຂາດແຄນແຮງງານ, ສ້າງໃຫ້ແຮງງານມີທັກສະ ແລະ ມີລະບຽບວິໄນ; ປັບປຸງລະບຽບການ, ຂັ້ນຕອນ ແລະ ອຳນວຍຄວາມສະດວກ ໃຫ້ແກ່ການລົງທຶນ ໂດຍຫັນປ່ຽນຈາກຫຼາຍຂອດ ສູ່ຜ່ານປະຕູດຽວ; ປັບປຸງລະບຽບການ ແລະ ມາດຕະການ ທີ່ບໍ່ແມ່ນພາສີຕໍ່ສິນຄ້ານຳເຂົ້າ-ໂຄງລ່າງພື້ນຖານ ແລະ ການບໍລິການຂອງລັດ ເພື່ອຄວາມສາມາດແຂ່ງຂັນ ດ້ານໂລຈິສຕິກ ແລະ ການເຊື່ອມໂຍງ; ສຸມໃສ່ 8 ວຽກຈຸດສຸມທົ່ວໄປ ຄື:
ຮັບປະກັນສິນເຊື່ອ ໂດຍມີຫຼັກຊັບຄໍ້າປະກັນທີ່ຍືດຍຸນ; ຮັກສາສະຖຽນລະພາບເງິນຕາ; ຍົກລະດັບການບໍລິຫານປະຕູດຽວ ເພື່ອເຊື່ອມຂໍ້ມູນເຖິງປາຍທາງ; ພັດທະນາລະບົບຖານຂໍ້ມູນທີ່ດິນແບບດີຈິຕອນ (ຂັ້ນຕອນຮັບ, ຄົ້ນຄວ້າ, ອະນຸມັດ ທີ່ເປັນມາດຕະຖານສາກົນ, ມີກໍານົດເວລາແຕ່ລະຂອດ, ຮັບປະກັນຄວາມປອດໄພ, ບໍ່ໃຫ້ມີຜົນກະທົບຕໍ່ສັງຄົມ ແລະ ສິ່ງແວດລ້ອມ); ພັດທະນາການຈົດທະບຽນທີ່ສະດວກ ແລະ ງ່າຍດາຍ, ແກ້ໄຂການຄ້າ-ການດຳເນີນທຸລະກິດນອກລະບົບ ຕາມກົດໝາຍຢ່າງເຂັ້ມງວດ-ສະເໝີພາບ; ສ້າງຖານຂໍ້ມູນ ແລະ ແຜນງານພັດທະນາຜູ້ສະໜອງພາຍໃນ ແລະ ກົນໄກຈັບຄູ່ທຸລະກິດ; ສ້າງ-ຍົກລະດັບກົນໄກຕິດຕາມ, ກວດກາ, ຊ່ວຍເຫຼືອນັກລົງທຶນ ພາຍຫຼັງອະນຸມັດໂຄງການແລ້ວ; ສືບຕໍ່ປັບປຸງກົງຈັກການຈັດຕັ້ງ ຂອງຄະນະສົ່ງເສີມ ແລະ ຄຸ້ມຄອງການລົງທຶນ ແຕ່ລະຂັ້ນ ໃຫ້ມີຄວາມເຂັ້ມແຂງ, ໜັກແໜ້ນຫຼາຍຂຶ້ນ.
ອ້າງອີງຈາກ: ຫ້ອງວ່າການສໍານັກງານນາຍົກລັດຖະມົນຕີ