ພາບຊ້າງປ່າທີ່ປ່າສະຫງວນແຫ່ງຊາດນໍ້າປຸຍ ແຂວງໄຊຍະບູລີ ເຊິ່ງຖ່າຍໄດ້ຈາກທີມງານໂຄງການ ແລະ ເຈົ້າໜ້າທີ່ປ່າສະຫງວນ ໃນຂະນະລົງປະຕິບັດກິດຈະກໍາໂຄງການ ໃນວັນທີ 10/06/2026 ທີ່ຜ່ານມາ.
ປ່າສະຫງວນແຫ່ງຊາດນໍ້າປຸຍ ແຂວງໄຊຍະບູລີ ເປັນຖິ່ນອາໄສອັນດັບຕົ້ນໆຂອງປະເທດລາວ ທີ່ມີຊ້າງປ່າອາຊີ ອາໄສຢູ່, ແລະ ຍັງໄດ້ຮັບການສະໜັບສະໜູນຈາກ ອົງການ WWF-Laos ໃນຫຼາຍກວ່າ 10 ປີ ທີ່ຜ່ານມາ ເພື່ອອະນຸລັກຊ້າງປ່າ ລວມເຖິງການຕິດຕາມ ແລະ ສໍາຫຼວດຊີວະນາໆພັນສັດປ່າອື່ນໆ ຄຽງຄູ່ກັບການສະໜັບສະໜູນວຽກງານຄຸ້ມຄອງປ່າສະຫງວນ.
ຊ້າງອາຊີ ມີປະຊາກອນອາໄສຢູ່ປະມານ 13 ປະເທດ ໃນອາຊີ, ແລະ ຈຳນວນຂອງພວກມັນກຳລັງຫຼຸດລົງ ໂດຍສະເພາະໃນເຂດອາຊີຕາເວັນອອກສ່ຽງໃຕ້ ທີ່ມີຊ້າງປ່າເຫຼືອຢູ່ພຽງ 8,000–11,000 ໂຕເທົ່ານັ້ນ. ຊ້າງອາຊີຕາເວັນອອກສ່ຽງໃຕ້ ມີຜົນກະທົບຫຼາຍກວ່າຊ້າງໃນເຂດອື່ນໆ, ເປັນຕົ້ນແມ່ນ ຈາກການສູນເສຍທີ່ຢູ່ອາໄສ ແລະ ການເຊື່ອມໂຊມຂອງທໍາມະຊາດ, ຄວາມຂັດແຍ່ງ ລະຫວ່າງຄົນກັບຊ້າງ, ການລັກລອບລ່າຊ້າງເພື່ອເອົາງາ, ແລະ ອື່ນໆ.
ໃນແຕ່ລະປີ ທົ່ວໂລກ ມີຊ້າງປ່າຢ່າງໜ້ອຍ ຈໍານວນ 20,000 ໂຕ ຕ້ອງຕາຍ ເພາະຖືກຂ້າ ເພື່ອເອົາຊິ້ນສ່ວນຂອງມັນ ໂດຍສະເພາະ ງາ, ໜັງ ຫຼື ອະໄວຍະວະອື່ນໆ ຂອງຊ້າງ ມາຜະລິດເປັນວັດຖຸ ຫຼື ຜະລິດຕະພັນຕ່າງໆ ຕາມຄວາມມັກ ແລະ ຕ້ອງການຂອງຄົນບາງກຸ່ມ ທີ່ຢາກມີໄວ້ຄອບຄອງ.
ຂໍ້ມູນ: WWF-Laos