ພາຍຸລະດູຮ້ອນ ກໍຄືພາຍຸໝາກເຫັບ ໄດ້ພັດຖະຫຼົ່ມເຂົ້າຫຼາຍບ້ານ ເຂດເມືອງສີໂຄດຄະບອງ ນະຄອນຫຼວງວຽງຈັນ ໃນວັນທີ 22 ມີນາ 2026 .ໃນນັ້ນ, ມີ ບ້ານວຽງຄໍາ ໄດ້ຮັບຜົນເສຍຫາຍຢ່າງໜັກໜ່ວງ ເຮັດໃຫ້ເຮືອນ, ໂຮງຮຽນ, ຮ້ານຄ້າ, ພາຫະນະ, ຕະຫຼາດ, ວັດວາອາຮາມ ແລະ ຊັບສິນອື່ນໆຂອງພໍ່-ແມ່ປະຊາຊົນເປ່ເພເສຍຫາຍຫຼາຍກວ່າ 1,500 ຫຼັງຄາເຮືອນ.
ທ່ານ ປໍວ່າງ ໄຊຢ້າວວົງ ເລຂາພັກບ້ານ ນາຍບ້ານວຽງຄໍາ ໃຫ້ສໍາພາດຕໍ່ທີມຂ່າວສື່ມວນຊົນ ປກສ ໃນວັນທີ 23 ມີນາ 2026 ວ່າ: ບ້ານວຽງຄໍາ ເປັນບ້ານໜຶ່ງທີ່ຂຶ້ນກັບເມືອງສີໂຄດຕະບອງ ນະຄອນຫຼວງວຽງຈັນ ໄດ້ຮັບຜົນກະທົບຈາກພາຍຸລະດູຮ້ອນ ເກີດມີລົມ ແລະ ໝາກເຫັບຕົກກະ ທັນຢ່າງຮ້າຍແຮງ ໃນເວລາປະມານ 16:00-17:00 ຂອງວັນທີ 22 ມີນາຜ່ານມາ,ສົ່ງຜົນໃຫ້ມີເຮືອນເປ່ເພເສຍຫາຍຢ່າງໜັກໜ່ວງ ຈໍານວນ 1,593 ຫຼັງຄາເຮືອນ, ໂຮງຮຽນ 3 ຫຼັງ, ມີຄົນໄດ້ຮັບບາດເຈັບ 8 ຄົນ (ບາດເຈັບເລັກໜ້ອຍ 5 ຄົນ, ບາດເຈັບສົມຄວນ 3 ຄົນ), ມີພາຫະນະເປ່ເພ ປະເພດລົດໃຫຍ່-ລົດ ຈັກ, ຕະຫຼາດ, ຮ້ານຄ້າ, ວັດວາອາຮາມ, ບ່ອນທໍາຜະລິດ ແລະ ຊັບສິນຕ່າງໆຂອງພໍ່-ແມ່ປະຊາຊົນ ທົ່ວບ້ານອີກຈໍານວນຫຼາຍ, ເຊິ່ງຍັງບໍ່ສາມາດເມີນມູນຄ່າເສຍຫາຍໄດ້.
ທ່ານນາຍບ້ານວຽງຄໍາ ຍັງກ່າວອີກວ່າ: ນອກຈາກບ້ານວຽງຄໍາ ທີ່ໄດ້ຮັບຜົນກະທົບແລ້ວ ຍັງມີບ້ານອ້ອມຂ້າງທີ່ມີຊາຍແດນຕິດຈອດກັນ ກໍໄດ້ຮັບຜົນກະທົບຢ່າງໜັກເຊັ່ນດຽວກັນ ກໍຄື ບ້ານໜອງແຕ່ງເໜືອ, ບ້ານຈັນສະຫວ່າງ, ບ້ານຕາດທອງ ແລະ ບ້ານຈໍາປາ ເມືອງສີໂຄດຕະບອງ ນະຄອນຫຼວງວຽງຈັນ.
ແຫຼ່ງຂໍ້ມູນ: ຄວາມສະຫງົບ