ອີງຕາມແຈ້ງການຂອງສະຖານເອກອັກຄະລັດຖະທູດແຫ່ງ ສປປ ລາວ-ວໍຊິງຕັນ ດີ,ຊີ ເຖິງ ພົນລະເມືອງຕ່າງປະເທດ ແລະ ພີ່ນ້ອງຄົນເຊື້ອຊາດລາວ ກ່ຽວກັບ ການຂໍວິຊາເດີນທາງເຂົ້າ ສປປ ລາວ ອີງຕາມຂ່າວທີ່ເຜີຍແຜ່ຜ່ານສື່ສັງຄົມອອນລາຍຈໍານວນໜຶ່ງ ກ່ຽວກັບການປະຕິເສດບໍ່ໃຫ້ຂຶ້ນຍົນ ຂອງບາງສາຍບິນ ທີ່ເກີດຂຶ້ນກັບພີ່ນ້ອງຄົນເຊື້ອຊາດລາວ ໃນຜ່ານມາ.

ສະຖານເອກອັກຄະລັດຖະທູດແຫ່ງ ສປປ ລາວ ທີ່ນະຄອນຫຼວງວໍຊິງຕັນ ດີ.ຊີ, ສະຫະລັດອາເມລິກາ ໄດ້ຕິດຕາມ ແລະ ຮັບຊາບ ກ່ຽວກັບ ກໍລະນີທີ່ມີສາຍການບິນ ແລະ ເຈົ້າຫນ້າທີ່ ປະຈໍາສະຫນາມບິນ ປະຕິເສດ ບໍ່ໃຫ້ພີ່ນ້ອງຄົນເຊື້ອຊາດລາວ ເດີນທາງໄປ ສປປ ລາວ ຕາມທີ່ເປັນຂ່າວໃນສື່ສັງຄົມອອນລາຍ ທີ່ກໍາລັງເປັນ ກະແສໃນປັດຈຸບັນນີ້ ຈົນເຮັດໃຫ້ພີ່ນ້ອງຄົນເຊື້ອຊາດລາວ ໄດ້ຕິດຕໍ່ມາຍັງສະຖານທູດ ເປັນຈໍານວນຫຼາຍ ເພື່ອ ສອບຖາມ ກ່ຽວກັບ ສາຍເຫດໃນການປະຕິເສດດັ່ງກ່າວ. ຕໍ່ບັນຫານີ້, ສະຖານທູດ ຂໍຢືນຢັນວ່າ ລັດຖະບານ ລາວ ຍັງຢຶດໝັ້ນນະໂຍບາຍເປີດກວ້າງຕ້ອນຮັບພົນລະເມືອງຕ່າງປະເທດ ໂດຍສະເພາະພີ່ນ້ອງຄົນເຊື້ອຊາດ ລາວ ເດີນທາງເຂົ້າ ສປປ ລາວ ດັ່ງທີ່ປະຕິບັດຜ່ານມາ ຊຶ່ງສາມາດຂໍວິຊາໄດ້ດ້ວຍຫຼາຍຊ່ອງທາງຄື:

1) ສາມາດຂໍວິຊາກັບສະຖານທູດລາວ ທີ່ ນະຄອນຫຼວງວໍຊິງຕັນ ດີ.ຊີ ປົກກະຕິ ໂດຍສາມາດເຂົ້າມາ ຂໍວິຊາແບບເຊິ່ງຫນ້າ ( in person) ຫຼື ຝາກຜ່ານໄປສະນີ ( Mail postal ) ມາຍັງສະຖານທູດຕາມ ທີ່ຢູ່ 2222 S, Street NW, Washington, D.C 20008.

2) ສາມາດຂໍວິຊາກັບດ່ານສາກົນ ( Visa on Arrival) ທີ່ມີການໃຫ້ບໍລິການ ເມື່ອທ່ານເດີນທາງໄປເຖິງ ໂດຍສາມາດຍື່ນຂໍວິຊາກັບຫນ່ວຍງານກົງສຸນທີ່ໃຫ້ບໍລິການຢູ່ສະຖານທີ່ນັ້ນໆ.

3) ສາມາດຍື່ນຂໍວິຊາອອນລາຍ (Evisa) ຜ່ານລິ້ງທາງການ: https://laoevisa.gov.la/info, ຊຶ່ງ ທ່ານສາມາດດໍາເນີນການໄດ້ດ້ວຍຕົນເອງ ກ່ອນຈະອອກເດີນທາງ ຊ້າສຸດ 02 ອາທິດ ແລະ ປະຕິບັດຄໍາເເນະໃນເວບໄຊ.

ມາຮອດປັດຈຸບັນ, ສະຖານທູດ ຂໍຢືນຢັນຄືນຕື່ມວ່າ ສະຖານທູດຍັງບໍ່ໄດ້ຮັບແຈ້ງການໃດຈາກປະເທດ ເຈົ້າພາບ ( ສະຫະລັດອາເມລິກາ) ຫຼື ສາຍການບິນໃດ ທີ່ແນະນໍາວ່າໃຫ້ເອົາວິຊານໍາສະຖານທູດລາວ ທີ່ ວໍຊິງ ຕັນ ດີ.ຊີ ກ່ອນການເດີນທາງ ຫຼື ຂຶ້ນຍົນ. ການເກີດເຫດການກັບພີ່ນ້ອງຄົນເຊື້ອຊາດລາວ ທີ່ຖືກປະຕິເສດບໍ່ໃຫ້ຂຶ້ນຍົນນັ້ນ ອາດຈະແມ່ນຄວາມຮູ້ເທົ່າບໍ່ເຖິງການຂອງບາງສາຍການບິນ ທີ່ມີຄວາມເປັນຫ່ວງວ່າລັດຖະບານ ລາວ ຈະບໍ່ໃຫ້ເຂົ້າປະເທດ. ແຕ່ໃນຄວາມເປັນຈິງ, ລັດຖະບານລາວ ບໍ່ມີການປ່ຽນແປງນະໂຍບາຍໃດໆເທື່ອ, ຍັງເປີດກວ້າງຕ້ອນຮັບພົນລະເມືອງຂອງທຸກປະເທດ ລວມທັງພີ່ນ້ອງຄົນເຊື້ອຊາດລາວຢູ່ຕ່າງປະເທດ.

ດັ່ງນັ້ນ, ຈຶ່ງແຈ້ງມາຍັງທຸກທ່ານເພື່ອຊາບຕາມທາງຄວນດ້ວຍ