ໃນງານບຸນນະມັດສະການຜາສາດຫີນວັດພູ ປະຈຳປີ 2026 ນີ້, ນອກຈາກຄວາມສະຫງ່າງາມຂອງສະຖານທີ່ມໍລະດົກໂລກ ແລະ ຄວາມເບີກບານມ່ວນຊື່ນຂອງແຂກທີ່ມາທ່ຽວຊົມແລ້ວ, ສິ່ງທີ່ພົ້ນເດັ່ນແມ່ນ “ການບໍລິຫານຈັດການດ້ານສິ່ງແວດລ້ອມ” ທີ່ຄະນະຮັບຜິດຊອບໄດ້ເອົາໃຈໃສ່ເປັນພິເສດ ເພື່ອເຮັດໃຫ້ງານມີຄວາມສະອາດ ແລະ ຈົບງາມຕະຫຼອດໄລຍະການຈັດງານ.
- ການວາງແຜນ ແລະ ກຽມຄວາມພ້ອມກ່ອນເລີ່ມງານ
- ການອະນາໄມພື້ນທີ່ທົ່ວບໍລິເວນຈັດງານໃຫ້ມີຄວາມພ້ອມ.
- ການກຳນົດຈຸດວາງຖັງຂີ້ເຫຍື້ອ ແລະ ຖົງດຳ ຕາມຈຸດຕ່າງໆທີ່ໄດ້ຄຳນວນໄວ້ຢ່າງທົ່ວເຖິງ.
- ຕິດຕັ້ງຫ້ອງນໍ້າເຄື່ອນທີ່ຕາມຈຸດຍຸດທະສາດ ເພື່ອອຳນວຍຄວາມສະດວກໃຫ້ແກ່ຜູ້ມາຮ່ວມງານ.
- ມີການຕິດປ້າຍປະກາດເຕືອນສະຕິ ດ້ວຍຂໍ້ຄວາມທີ່ເຂົ້າໃຈງ່າຍ ແລະ ກິນໃຈ ເຊັ່ນ: “ຂີ້ເຫຍື້ອເປັນພິດໄພ ຈົ່ງໃສ່ໃຈຖິ້ມໃສ່ຖັງ!”
- ການຮັກສາຄວາມສະອາດແບບຕໍ່ເນື່ອງ
- ໃນໄລຍະທີ່ງານພວມດຳເນີນໄປ, ທີມງານອາສາສະໝັກ ແລະ ເຈົ້າໜ້າທີ່ໄດ້ເຮັດວຽກຢ່າງໜັກ ໂດຍສະເພາະໃນຕອນເດິກຂອງທຸກມື້
- ໄດ້ມີການອອກປັດກວາດ ແລະ ເກັບຂີ້ເຫຍື້ອທີ່ຍັງຕົກຄ້າງຕາມບໍລິເວນຕ່າງໆ ເພື່ອໃຫ້ສະຖານທີ່ສະອາດໃນຕອນເຊົ້າຂອງມື້ຖັດໄປ. ມີການຫົດນໍ້າຕາມເສັ້ນທາງຍ່າງ ເພື່ອຫຼຸດຜ່ອນຂີ້ຝຸ່ນ, ເຮັດໃຫ້ອາກາດພາຍໃນງານສົດຊື່ນ ແລະ ເໝາະແກ່ການຍ່າງທ່ຽວຊົມ.
- ກິດຈະກຳສ້າງສ່ວນຮ່ວມ: “ຂີ້ເຫຍື້ອແລກລາງວັນ”
ສິ່ງທີ່ສ້າງຄວາມຄຶກຄື້ນ ແລະ ໄດ້ຮັບການຍ້ອງຍໍຈາກສັງຄົມຢ່າງຫຼວງຫຼາຍ ແມ່ນການຈັດກິດຈະກຳສ້າງສ່ວນຮ່ວມກັບແຂກທີ່ມາທ່ຽວງານ. ໂດຍຄະນະຮັບຜິດຊອບໄດ້ປະກາດກິດຈະກຳພິເສດ: “ໃຜເກັບຂີ້ເຫຍື້ອໃສ່ຖົງມາສົ່ງຕາມຈຸດທີ່ກຳນົດ, ຈະໄດ້ຮັບເງິນລາງວັນທັນທີ 50,000 ກີບ ຕໍ່ 1 ຖົງ!”
ກິດຈະກຳນີ້ ບໍ່ພຽງແຕ່ຊ່ວຍໃຫ້ຂີ້ເຫຍື້ອຖືກເກັບກູ້ໄດ້ຢ່າງວ່ອງໄວເທົ່ານັ້ນ, ແຕ່ຍັງເປັນການປູກຝັງຈິດສຳນຶກໃຫ້ທຸກຄົນຮູ້ຈັກຮັກສາສິ່ງແວດລ້ອມ ແລະ ຮັກສາຄຸນຄ່າຂອງມໍລະດົກໂລກວັດພູໃຫ້ຍືນຍົງຕະຫຼອດໄປ.
ແຫຼ່ງຂໍ້ມູນ: ໜັງສືພິມຈໍາປາໃໝ່