ມິຕິໃໝ່ຂອງການເອົາຄືນ! ຖ້າເຈົ້າລ້ຽງໝາ ຂ້ອຍຈະລ້ຽງງູ.
ເປັນອີກໜຶ່ງເລື່ອງລາວທີ່ເປັນກະແສຢູ່ທີ່ປະເທດໄທໃນຕອນນີ້ ເມື່ອມີຜູ້ໃຊ້ບັນຊີເຟສບຸກລາຍໜຶ່ງ ອອກມາໂພສໃນວັນທີ 19 ພຶດສະພາ 2025 ຜ່ານມາ, ພ້ອມພາບ ຄົນມາປ່ອຍງູໃຫຍ່ 2 ໂຕຢູ່ທາງຍ່າງຂອງຫ້ອງເຊົ່າແຫ່ງໜຶ່ງ ເຂດຣັດຊະດາ, ກຸງເທບມະຫານະຄອນ ເພື່ອເປັນການເອົາຄືນຂ້າງຫ້ອງທີ່ລັກລ້ຽງໝາ ເຫົ່າສົ່ງສຽງລົບກວນ ລວມໄປເຖິງມີກິ່ນເໝັນ ແລະ ມີເຫັບມັດ ສ້າງຄວາມເດືອດຮ້ອນໃຫ້ກັບຄົນທີ່ຢູ່ຂ້າງຫ້ອງ.
ຕາມການລາຍງານກ່ອນໜ້ານີ້, ທັງ 2 ຫ້ອງເຄີຍຜິດຖຽງກັນ ເນື່ອງຈາກທາງຫ້ອງເຊົ່າກໍໄດ້ມີກົດບໍ່ອະນຸຍາດໃຫ້ນຳສັດລ້ຽງຂຶ້ນມາລ້ຽງຢ່າງເດັດຂາດ, ແຕ່ກໍບໍ່ໄດ້ຮັບການແກ້ໄຂຫຍັງ ຈຶ່ງໄດ້ທຳການເອົາຄືນ (ແກ້ເຜັດ) ໂດຍການ “ເຈົ້າລ້ຽງໝາ ຂ້ອຍກະລ້ຽງງູ” ເຮັດໃຫ້ຜູ້ເຊົ່າຄົນອື່ນທີ່ອາໃສຢູ່ຫ້ອງເຊົ່າບໍລິເວນດັ່ງກ່າວເຖິງກັບຕົກໃຈ ແລະ ຢ້ານກົວ.
ເມື່ອເກີດເຫດການດັ່ງກ່າວທາງເຈົ້າໜ້າທີ່ຮັບຜິດຊອບຫ້ອງເຊົ່າໄດ້ທຳການໄກ່ເກ່ຍ ແລະ ແຈ້ງເຈົ້າຂອງທີ່ລ້ຽງໝາ ໃຫ້ນຳໝາໄປລ້ຽຽຢູ່ບ່ອນອື່ນ ແລະ ໄດ້ປັບໄໝເງິນຈຳນວນ 10,000 ບາດ ຫຼື ປະມານ 6,500,000 ກີບ, ສ່ວນເຈົ້າຂອງງູແມ່ນໄດ້ຮັບໃບຕັກເຕືອນ ແລະ ໄດ້ຍ້າຍງູອອກຈາກພຶ້ນທີ່ຫ້ອງເຊົ່າດັ່ງກ່າວ.
ຢ່າງໃດກໍຕາມ ໃນເຂດທີ່ເປັນທີ່ພັກອາໄສ ໂດຍສະເພາະມີຫຼາຍໆຄົນຢູ່ຮ່ວມກັນ ຕ່າງກໍມີຂໍ້ກຳນົດ ຫຼື ກົດລະບຽບຂອງສະຖານທີ່ນັ້ນໆ ເພື່ອເປັນການໃຫ້ກຽດ ແລະ ບໍ່ລົບກວນກັນແລະກັນ. ຖ້າຫາກມີການລະເມີດກໍຕ້ອງໄດ້ຮັບການຕັກເຕືອນ ແລະ ປັບໄໝ ເພື່ອບໍ່ໃຫ້ປະຕິບັດອີກ.