ສະຫະລັດອາເມຣິກາ ແລະ ສປປ ລາວ ສະເຫຼີມສະຫຼອງ ພິທີວາງ ສີລາລຶກ ການກໍ່ສ້າງສໍານັກງານໃຫຍ່ ແລະ ສະຖານທີ່ຝຶກອົບຮົມ ແຫ່ງໃໝ່ຂອງພາສີລາວ
ນະຄອນຫຼວງວຽງຈັນ, ສປປ ລາວ, ວັນທີ 14 ພຶດສະພານີ້, ກະຊວງການເງິນ ແລະ ກົມພາສີລາວ ໄດ້ສົມທົບກັບ ຫ້ອງການຕ້ານຢາເສບຕິດ ແລະ ປະຕິບັດກົດໝາຍສາກົນ (INL), ກະຊວງການຕ່າງປະເທດອາເມລິກາ ແລະ ອົງການສະຫະປະຊາຊາດເພື່ອບໍລິຫານໂຄງການ (UNOPS), ໄດ້ຈັດພິທີວາງສີລາລຶກ ເພື່ອເປັນຂີດໝາຍການເລີ່ມລົງມືກໍ່ສ້າງສຳນັກງານໃຫຍ່ ແລະ ສະຖານທີ່ຝຶກອົບຮົມແຫ່ງໃໝ່ຂອງ ກົມພາສີລາວ.
ໂຄງການມູນຄ່າ 8 ລ້ານໂດລາສະຫະລັດ ທີ່ໄດ້ຮັບທຶນຈາກສະຫະລັດອາເມຣິກາ ແລະ ຈັດຕັ້ງປະຕິບັດໂດຍ ອົງການສະຫະປະຊາຊາດເພື່ອບໍລິຫານໂຄງການ, ເປັນຂີດໝາຍອັນຫລ້າສຸດຂອງການຮ່ວມມືອັນຍາວນານລະຫວ່າງ ສປປ ລາວ ແລະ ສະຫະລັດອາເມຣິກາ ເພື່ອສ້າງຄວາມເຂັ້ມແຂງດ້ານການບັງຄັບໃຊ້ກົດໝາຍ ແລະ ສະກັດກັ້ນອາດຊະຍາກຳຂ້າມຊາຍແດນ.
ພິທີໄດ້ຖືກໃຫ້ກຽດເຂົ້າຮ່ວມໂດຍ ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ; ຫົວໜ້າກົມພາສີ ທ່ານ ພູເຂົາຄໍາ ວັນນະວົງໄຊ; ເອກອັກຄະລັດຖະທູດສະຫະລັດ ປະຈໍາ ສປປ ລາວ ທ່ານນາງ ແຮັດເຕີ ວາເຣຍອາວາ (Heather Variava); ທ່ານ ບັກໂຄເດຍ ເບີຄານອບ (Bakhodir Burkhanov), ຜູ້ປະສານງານ ອົງການສະຫະປະຊາຊາດ ປະຈຳ ສປປ ລາວ; ທ່ານນາງ ຊາມີນາ ຄາດວານິ (Samina Kadwani) ຜູ້ອໍານວຍການພາກພື້ນຂອງ UNOPS, ແລະ ເຈົ້າຫນ້າທີ່ອື່ນໆ.
ທ່ານເອກອັກຄະລັດຖະທູດ ວາເຣຍອາວາ ກ່າວວ່າ “ໂຄງການນີ້ໄດ້ຖືກສ້າງຂຶ້ນມາຫຼາຍປີແລ້ວ ແລະ ຂ້າພະເຈົ້າຮູ້ສຶກຍິນດີທີ່ໄດ້ມາຊ່ວຍເປີດພິທີການກໍ່ສ້າງຢ່າງເປັນທາງການ.” “ການຮ່ວມມືລະຫວ່າງ ສະຖານທູດສະຫະລັດອາເມຣິກາ ແລະ ກົມພາສີລາວເປັນຫນຶ່ງໃນການຮ່ວມມືທີ່ເຂັ້ມແຂງທີ່ສຸດຂອງພວກເຮົາ, ແລະ ມື້ນີ້ເປັນຕົວຢ່າງທີ່ຊັດເຈນທີ່ພວກເຮົາສາມາດບັນລຸໄດ້ຮ່ວມກັນ.”
ສະຖານທີ່ໃໝ່ນີ້ຈະຊ່ວຍເພີ່ມຂີດຄວາມສາມາດຂອງ ກົມພາສີລາວໃນການປະຕິບັດງານ ແລະ ການຝຶກອົບຮົມ, ເຮັດໃຫ້ເຈົ້າໜ້າທີ່ສາມາດຮັບມືກັບອາຊະຍາກຳຂ້າມຊາດໄດ້ດີຂຶ້ນ, ລວມທັງການລັກລອບຂົນສົ່ງຢາເສບຕິດ, ການລັກລອບສັດປ່າ, ການຂົນຍ້າຍເງິນຈຳນວນຫຼາຍ, ແລະ ການລັກລອບສານຕັ້ງຕົ້ນ.
ສະຖານທີ່ໃໝ່ແຫ່ງນີ້ ແມ່ນສືບເນື່ອງຈາກ ການສຳເລັດການກໍ່ສ້າງສາງພາສີ ສອງແຫ່ງ ຢູ່ ນະຄອນຫຼວງວຽງຈັນ ແລະ ແຂວງຫລວງນໍ້າທາ, ທີ່ຈະຊ່ວຍໃຫ້ແນ່ໃຈວ່າຂອງກາງຜິດກົດໝາຍທີ່ຖືກຍຶດໄດ້ ແມ່ນຖືກເກັບຮັກສາຢ່າງປອດໄພ ແລະ ຈັດການຢ່າງຖືກຕ້ອງ.
ທ່ານເອກອັກຄະລັດຖະທູດ ວາເຣຍອາວາ ໄດ້ເນັ້ນອິກວ່າ ສະຖານທີ່ດັ່ງກ່າວບໍ່ພຽງແຕ່ເປັນບັນທັດຖານອັນສຳຄັນໃນການບັງຄັບໃຊ້ວຽກງານຕົວຈິງເທົ່ານັ້ນ, ແຕ່ຍັງແມ່ນສັນຍາລັກຂອງສາຍພົວພັນການຮ່ວມມື ລະຫວ່າງ ສະຫະລັດອາເມຣິກາ ແລະ ສປປ ລາວ. ທ່ານ ເອກອັກຄະລັດທະທູດກ່າວວ່າ “ການຮ່ວມມືໃນຄັ້ງນີ້ມີຄວາມສຳຄັນຫຼາຍທີ່ສຸດ, ເພາະພວກເຮົາເຮັດວຽກຮ່ວມກັນເພື່ອຮັບມືກັບການດຳເນີນການອັນສະຫລັບສັບຊ້ອນຂອງອາດຊະຍາກຳຂ້າມຊາຍແດນ ແລະ ນຳໃຊ້ເຕັກໂນໂລຊີທີ່ທັນສະໄໝ.”
ຈຸດສຸມທີ່ສຳຄັນຂອງ ການຮ່ວມມືໃນຂະແໜງການຍຸຕິທຳລະຫວ່າງ ສະຫະລັດອາເມຣິກາ ແລະ ສປປ ລາວ ແມ່ນການເສີມຂະຫຍາຍຄວາມອາດສາມາດໃຫ້ແກ່ ສປປ ລາວ ໃນວຽກງານຕ້ານການຟອກເງິນ ເພື່ອເປັນການສົ່ງເສີມຄວາມພະຍາຍາມໃນການປະຕິບັດຕາມຄຳແນະນຳຂອງອົງການຕ້ານການຟອກເງິນສາກົນ (FATF) ແລະ ເພື່ອໃຫ້ຫຼຸດພົ້ນອອກຈາກບັນຊີສີເທົາ ຂອງ FATF. ທ່ານເອກອັກຄະລັດຖະທູດ ໄດ້ກ່າວຕື່ມອິກວ່າ “ການປັບປຸງການຄວບຄຸມການຕ້ານການຟອກເງິນແມ່ນມີຄວາມຈໍາເປັນ ບໍ່ພຽງແຕ່ໃຫ້ສອດຄ່ອງກັບ FATF ເທົ່ານັ້ນ, ແຕ່ເພື່ອຍັງເປັນການເພີ່ມທະວີລະບົບການເງິນຂອງ ສປປ ລາວ ໃຫ້ສົມບູນແບບຍິ່ງຂື້ນເພື່ອທີ່ຈະດຶງດູດນັກລົງທຶນທີ່ໂປ່ງໃສຈາກຕ່າງປະເທດ ແລະ ສ້າງຄວາມເຊື່ອຫມັ້ນໃຫ້ແກ່ມວນຊົນ.
ເຈົ້າຫນ້າທີພາສີໄດ້ເຮັດບົດບາດອັນສຳຄັນໃນການລະບຸຊອກຫາການລັກລອບທາງດ້ານການໄຫຼວຽນທີ່ຜິດກົດໝາຍທາງດ້ານການເງິນ ແລະ ສະໜັບສະໜູນວຽກງານການສຶບສວນສອບສວນ. ສຳນັກງານໃຫມ່ແຫ່ງນີ້ ແລະ ການຂະຫຍາຍໂອກາດດ້ານການຝຶກອົບຮົມຈະຊ່ວຍປະກອບສ່ວນເຂົ້າໃນການສ້າງຄວາມເຂັ້ມແຂງໃນຕໍ່ຫນ້າໃຫ້ແກ່ອົງກອນເພື່ອໃຫ້ບັນລຸເປົ້າໝາຍຕໍ່ກັບຫນ້າທີ່ຮັບຜິດທີ່ໄດ້ກຳນົດໄວ້.
ທ່ານເອກອັກຄະລັດຖະທູດ ວາເຣຍອາວາ ຍັງໄດ້ຍົກໃຫ້ເຫັນຄວາມຮີບດ່ວນຮ່ວມກັນໃນການປາບປາມຂະບວນການໂຈນລະກຳ ຂ້າມຊາດທາງອິນເຕີເນັດ, ເຊິ່ງໄດ້ຫຼອກລວງພົນລະເມືອງອາເມຣິກາໄປແລ້ວຫຼາຍກວ່າ 10 ຕື້ ໂດລາສະຫະລັດ ພາຍໃນປີ 2024. “ການແກ້ໄຂບັນຫາຕໍ່ກັບສູນໂຈນລະກຳທາງອິນເຕີເນັດຢ່າງຈິງຈັງແມ່ນເພື່ອຜົນປະໂຫຍດຮ່ວມກັນຂອງທັງສອງປະເທດຂອງພວກເຮົາ. ຍັງເປັນການຊ່ວຍປົກປ້ອງອະທິປະໄຕຂອງ ສປປ ລາວ, ປົກປ້ອງສິດທິມະນຸດ ແລະ ຍັງເປັນການປ້ອງກັນອາດຊະຍາກຳທາງການເງິນທີ່ສົ່ງຜົນກະທົບໂດຍກົງຕໍ່ພົນລະເມືອງ, ຄອບຄົວ ໃນສະຫະລັດອາເມລິກາ ແລະ ໃນທົ່ວໂລກນຳອິກ.”
ໃນຕອນທ້າຍ, ທ່ານເອກອັກຄະລັດຖະທູດ ວາເຣຍອາວາ ໄດ້ເນັ້ນເຖິງຄວາມສຳຄັນຂອງການຮ່ວມມືດ້ານການບັງຄັບໃຊ້ກົດໝາຍ ຂອງ ສປປ ລາວ ແລະ ສະຫະລັດອາເມຣິກາ. “ການຮ່ວມມືໃນຄັ້ງນີ້ຖືເປັນຂີດໝາຍສຳຄັນຂອງສາຍພົວພັນສອງຝ່າຍ ລະຫວ່າງ ສະຫະລັດອາເມຣິກາ ແລະ ສປປ ລາວ. ພວກເຮົາຫວັງຢ່າງຍິ່ງທີ່ຈະສ້າງຂີດໝາຍອັນສຳຄັນຂອງມື້ນີ້ ແລະ ສືບຕໍ່ປະຕິບັດຫນ້າໃນອະນາຄົດທີ່ປອດໄພ ແລະ ໝັ້ນຄົງສຳລັບທຸກໆຄົນ.”