ນັກບິນຂອງສາຍການບິນ ຍູໄນເຕັດ ແອລາຍ ລືມພາສປອດຕ້ອງບິນວົນກັບໄປເອົາພາຍຫຼັງເດີນທາງໄດ້ 2 ຊົ່ວໂມງ
ສຳນັກຂ່າວ CNN ລາຍງານໃນວັນທີ 25 ມີນາ 2025, ເຮືອບິນໂດຍສານຂອງສາຍການບິນ ຍູໄນເຕັດ ແອລາຍ (United Airlines) ທີ່ກຳລັງເດີນທາງຈາກ ນະຄອນລອສແອນເຈີລິສ ຂອງສະຫະລັດ ໄປ ນະຄອນຊຽງໄຮ້ ຂອງຈີນ ຕ້ອງໄດ້ບິນວົນກັບໄປລົງຈອດທີ່ສະໜາມບິນຊານຟານຊິສໂກ ຫຼັງຈາກບິນໄດ້ປະມານ 2 ຊົ່ວໂມງແລ້ວພົບວ່ານັກບິນຄົນໜຶ່ງລືມພາສປອດ.
ຂໍ້ມູນຈາກເວັບໄຊ້ FlightAware ລະບຸວ່າ: ຖ້ຽວບິນທີ 198 ອອກເດີນທາງຈາກສະໜາມບິນນາໆຊາດ ລອສແອນເຈີລິສ ເມື່ອເວລາປະມານ 14:00 ໂມງຂອງວັນເສົາທີ 22 ມີນາ 2025 ຜ່ານມາ, ເຊິ່ງຖ້ຽວບິນດັ່ງກ່າວມີຜູ້ໂດຍສານ 257 ຄົນ ແລະ ລູກເຮືອ 13 ຄົນມຸ່ງໜ້າເດີນທາງໄປ ສປ ຈີນ ຫຼັງຈາກໄດ້ປະມານ 2 ຊົ່ວໂມງ ເຮັດໃຫ້ຖ້ຽວບິນຕ້ອງປ່ຽນເສັ້ນທາງກັບ ແລະ ລົງຈອດທີ່ສະນາມບິນຊານຟານຊີສໂກ ໃນເວລາ 17:00 ໂມງ.
ສາຍການບິນ ຍູໄນເຕັດ ແອລາຍ ອອກຖະແຫຼງການລະບຸວ່າ ນັກບິນບໍ່ມີພາສສປອດຢູ່ເທິງເຮືອບິນເຮັດໃຫ້ທາງສາຍການບິນຕ້ອງໄດ້ກັບໄປຈັດກຽມລູກເຮືອຊຸດໃໝ່ເພື່ອພາຜູ້ໂດຍເດີນທາງໄປຫາຈຸດໝາຍປາຍທາງໃນຄືນນັ້ນ ພ້ອມທັງມອບຄູປ໋ອງອາຫານ ແລະ ຄ່າຊົດເຊີຍໃຫ້ກັບລູກຄ້າ ແຕ່ສຸດທ້າຍກໍສາມາດເດີນທາງເຖິງທີ່ໝາຍໄດ້ຢ່າງປອດໄພ.
ແຫຼ່ງຂ່າວ: ໄທລັດ