ເຈົ້າໜ້າທີ່ຕຳຫຼວດໄທ ບຸກຈັບຜູ້ຖືກຫາ ຊາວລາວ 3 ຄົນ ລັກລອບຂົນຢາເສບຕິດຂ້າມປະເທດພ້ອມຂອງກາງຈຳນວນຫຼາຍ.

ສຳນັກຂ່າວຕ່າງປະເທດລາຍງານໃນວັນທີ 12 ກຸມພາ 2025 ນີ້ວ່າ ເຈົ້າໜ້າທີ່ໜ່ວຍງານສະກັດກັ້ນ ແລະ ປາບປາມຢາເສບຕິດໄທ ໄດ້ເປີດປະຕິບັດການຈັບກຸມຜູ້ຄ້າຢາເສບຕິດຊາວລາວ 3 ຄົນ ພ້ອມຂອງກາງ ຢາໄອ້ 658 ກິໂລກຣາມ ແລະ ຢາບ້າກວ່າ 1.1 ແສນເມັດ ທີ່ຈະນຳຂ້າມມາຍັງຝັ່ງໄທໃນພຶ້ນທີ່ ບໍລິເວນແຄມຂອງ ບ້ານແພງໃຕ້ ອຳເພີ ບ້ານແພງ ຈັງຫວັດນະຄອນພະນົມ ໃນເວລາ 11:00 ໂມງ ຂອງວັນທີ 11 ກຸມພາ 2025 ຜ່ານມາ.

ຕາມການລາຍງານຂອງເຈົ້າໜ້າທີ່: ໄດ້ຮັບແຈ້ງວ່າຈະມີການລັກລອບນຳຢາເສບຕິດຈາກຝັ່ງລາວເຂົ້າມາໃນພຶ້ນທີ່ ຈຶ່ງໄດ້ຈັດກອງກຳລັງເຝົ້າກວດຈຸດທີ່ຄາດວ່າຜູ້ຕ້ອງຫາຈະລັກລອບນຳຢາເສບຕິດເຂົ້າມາໃນປະເທດໄທ ສຸດທ້າຍກໍພົບເຮືອ ຈຳນວນ 2 ລຳ ແລະ ລົດຕູ້ 1 ຄັນ, ຈຶ່ງໄດ້ທຳການສະແດງໂຕ ແລະ ເຂົ້າຈັບກຸມຜູ້ຖືກຫາໄດ້ 3 ຄົນ.

ໃນນັ້ນ, ຜູ້ຖືກຫາ 3 ຄົນເປັນຊາຍຊາວລາວອາຍຸລະຫວ່າງ 16-17 ປີ: ຜູ້ທີ 1 ຊື່ທ້າວດຳ (ບໍ່ມີນາມສະກຸມ) ອາຍຸ 16 ປີ, ຜູ້ທີ 2 ຊື່ທ້າວ ລີ (ບໍ່ມີນາມສະກຸນ) ອາຍຸ 17 ປີ, ຜູ້ທີ 3 ຊື່ທ້າວ ພົງ ອາໄພໂສ ອາຍຸ 30 ປີ ພ້ອມຍຶດຂອງກາງ ຢາໄອ້ 16 ເປົາ ນ້ຳໜັກລວມ 658 ກິໂລກຣາມ ແລະ ຢາບ້າ 58 ມັດ ຈຳນວນປະມານ 116,000 ເມັດ ຈາກນັ້ນເຈົ້າໜ້າທີ່ຈຶ່ງໄດ້ນຳຂອງກາງເພື່ອກວດສອບ ແລະ ນຳສົ່ງຜູ້ຖືກຫາເພື່ອດຳເນີນຄະດີຕາມກົດໝາຍຕໍ່ໄປ.