ວັນທີ 16 ມັງກອນ 2025 ຜ່ານມາ, ເຈົ້າໜ້າທີ່ ສືບສວນ-ສອບສວນ ປກສ ແຂວງ ບໍລິຄຳໄຊ ຮ່ວມກັບເຈົ້າໜ້າທີ່ວິຊາສະເພາະສືບສວນ-ສອບສວນ, ນິຕິວິທະຍາ, ກອງບັນຊາການ ປກສ ເມືອງ ຄຳເກີດ ໄດ້ນໍາຕົວສອງຜູ້ຖືກຫາຄະດີລັກຊັບ ຢູ່ບ້ານ ໂພນເມືອງນ້ອຍ ເມືອງຄໍາເກີດ ແຂວງບໍລິຄໍາໄຊ ໄປທົດສະກໍາທົດສອບຂໍ້ມູມຄືນໃໝ່.
ຕາມການລາຍງານຂອງເຈົ້າໜ້າທີ່ລະບຸວ່າ: ເຫດການດັ່ງກ່າວໄດ້ເກີດຂຶ້ນໃນວັນທີ 13 ກໍລະກົດ ຫາ ວັນທີ 7 ພະຈິກ 2024 ທີ່ຜ່ານມາ ໂດຍໄດ້ຮັບແຈ້ງຄວາມຈາກຜູ້ຖືກເສຍຫາຍວ່າ: ມີຄົນຮ້າຍໄດ້ງັດເຂົ້າເຮືອນຂອງຕົນແລ້ວລັກຊັບສິນ ຈາກນັ້ນ, ເຈົ້າໜ້າທີ່ ປກສ ເມືອງຄຳເກີດ ຈຶ່ງໄດ້ປະສານສົມທົບກັບຫ້ອງຕໍາຫຼວດ ປກສ ແຂວງ ດໍາເນີນການສືບສວນ-ສອບສວນ ຕາມຫຼັກການວິຊາສະເພາະ ພ້ອມທັງຂຶ້ນບັນຊີເປົ້າໝາຍ ຢູ່ໃນພື້ນທີ່ຈໍານວນຫຼາຍເປົ້າໝາຍ ຈົນມາຮອດວັນທີ 8 ທັນວາ 2024 ສາມາດກັກຕົວຜູ້ຖືກຫາ ໄດ້ 2 ຄົນ ຊື່ ທ້າວ ເຊັ່ງຊົ່ງ ອາຍຸ 20 ປີ ແລະ ທ້າວ ຢາໂຊວ່າງ ອາຍຸ 23 ປີ, ທັງສອງເປັນກໍາມະກອນ, ຢູ່ບ້ານ ໂພນເມືອງນ້ອຍ ເມືອງ ຄໍາເກີດ ແຂວງ ບໍລິຄໍາໄຊ.
ຜ່ານການສອບສວນ ພວກກ່ຽວທັງສອງໄດ້ຮັບສາລະພາບວ່າ: ໄດ້ລົງມືລັກຊັບແທ້ ໂດຍການງັດເຮືອນຂອງປະຊາຊົນ ພາຍໃນເມືອງຄຳເກີດ ໄດ້ຊັບສິນມີ: ເງິນ ຈຳນວນ 21,000,000 ກີບ, ກັບ 4,000 ບາດ (ສະກຸນເງິນໄທ) ແລະ ຄໍາຮູບປະພັນຈໍານວນ 18 ບາດ ລວມມູນຄ່າຜົນເສຍຫາຍທັງໝົດ ປະມານ 523.800.000 ກີບ.
ການທົດສະກຳໃນຄັ້ງນີ້ ຈະໄດ້ປະກອບໃສ່ສຳນວນ-ສຳເນົາຄະດີດັ່ງກ່າວ ເພື່ອສະຫຼຸບສົ່ງໃຫ້ອົງການໄອຍະການດຳເນີນຄະດີ ພວກກ່ຽວຕາມຂັ້ນຕອນທີ່ກົດໝາຍກຳນົດໄວ້ຢ່າງເຂັ້ມງວດ.
ແຫຼ່ງຂ່າວ: ຄວາມສະຫງົບ