ນັກເທັນນິສເຍົາວະຊົນລາວ ຮ່ວມຊີງແຊ້ມລະດັບນາໆຊາດ ລາຍການ ITF Asia 14 and Under Development Championships 2025 ໃນລະຫ່ວາງວັນທີ 13-25 ມັງກອນ 2025 ທີ່ນະຄອນໂຄລົມໂບ້ ປະເທດສີລັງກາ ໂດຍມີນັກກິລາຈາກ 13 ປະເທດໃນຂົງເຂດອາຊີ ເຂົ້າຮ່ວມຄື: ສປປ ລາວ, ບັງກະລາເທດ, ບູຖານ, ບຣູໄນ, ກຳປູເຈຍ, ມາເກົ້າ, ມົງໂກລີ, ເນປານ, ປາກິສຖານ, ຟີລິບປິນ, ສິງກະໂປ, ຕີມໍເລັສເຕ້ ແລະ ສີລັງກາ ເຈົ້າພາບ.
ສຳລັບ ສປປ ລາວ ສົ່ງນັກກິລາເຂົ້າຮ່ວມໃນຮຸ່ນອາຍຸ 14 ປີ ຈຳນວນ 2 ຄົນ ກໍຄື ທ້າວ ພູຜາ ຈັນທະວົງ ແລະ ທ້າວ ສີປະເສີດ ຕັ້ງຕະກຸນ ຊຶ່ງທັງສອງມີອາຍຸພຽງ 11 ປີ ແລະ 12 ປີ.
ຜົນການແຂ່ງຂັນປະເພດຊາຍດ່ຽວ ຮອບທຳອິດ ພູຜາ ຈັນທະວົງ ເອົາຊະນະ Haziq KHAIRUL ຈາກບຣູໄນ 2-0 ເຊັດ: 6-2 ແລະ 6-0 ຮອບທີ 2 ຫລື ຮອບ 16 ຄົນສຸດທ້າຍ ໄປພົບກັບ Khabbo GAYEN ມືວາງອັນດັບທີ 5 ຂອງລາຍການ ຈາກບັງກະລາເທດ ທີ່ໄດ້ Bye (ບໍ່ໄດ້ອອກແຮງໃນຮອບທຳອິດ ໄດ້ສີດເຂົ້າຮອບ 2).
ຂະນະທີ່ ສີປະເສີດ ຕັ້ງຕະກຸນ ຮອບທຳອິດ ເສຍໃຫ້ Sangay ROKAYA ຈາກເນປານ 0-2 ເຊັດ: 2-6 ແລະ 0-6. ປະເພດຊາຍດ່ຽວ U14 ມີນັກກິລາເຂົ້າຮ່ວມ 21 ຄົນ.
ສ່ວນປະເພດຄູ່ຊາຍ: ພູຜາ ຈັນທະວົງ ແລະ ສີປະເສີດ ຕັ້ງຕະກຸນ ຕົກຮອບທຳອິດ ເສຍໃຫ້ ນັກກິລາຈາກສິງກະໂປ ຄູ່ມື 1 ລາຍການ 0-2 ເຊັດ: 1-6, 0-6.