ທ່ານ ສອນໄຊ ສີພັນດອນ ນາຍົກລັດຖະມົນຕີ ໃຫ້ຮູ້ໃນໂອກາດຊີ້ແຈງຕໍ່ກອງປະຊຸມ ສະໄໝສາມັນເທື່ອທີ 8 ຂອງສະ ພາແຫ່ງຊາດ ຊຸດທີ IX ໃນວັນທີ 26 ພະຈິກ 2024 ວ່າ: ລັດຖະບານຖືສໍາຄັນ ແລະ ເປັນບູລິມະສິດໃນການປັບປຸງເງິນເດືອນ, ເງິນນະໂຍບາຍຕ່າງໆ ຂອງພະນັກງານ, ລັດຖະກອນ, ທະຫານ, ຕໍາຫຼວດ ແລະ ພະນັກງານບໍານານ ໂດຍໄດ້ເພີ່ມດັດສະນີ, ເພີ່ມເງິນຄ່າຄອງຊີບເປັນແຕ່ລະໄລຍະ.
ສຳລັບ ໃນປີ 2025, ລັດຖະບານ ໄດ້ປັບປຸງເພີ່ມເງິນອຸດໜູນພະນັກງານ-ລັດຖະກອນ ໂດຍສະເພາະການເພີ່ມນະໂຍບາຍອຸດໜຸນຄ່າຄອງຊີບ, ປັບປຸງນະໂຍບາຍອຸດຫນູນ ຕໍາແຫນ່ງບໍລິຫານໂດຍໂຮມເອົາເງິນອຸດຫນູນຕໍາແຫນ່ງບໍລິຫານ ແລະ ນະໂຍບາຍນໍ້າມັນບຸກຄົນໃຫ້ເປັນດຽວກັນ, ປັບປຸງເງິນອຸດໜຸນອາຍຸການເພີ່ມຂຶ້ນ 100% ຂອງທຸກໄລຍະ, ປັບປຸງເພີ່ມເງິນນະໂຍບາຍລູກ ແລະ ເມຍຂຶ້ນ, ຄາດຫມາຍ ແມ່ນຈະເລີ່ມຈັດຕັ້ງປະຕິບັດໃນງວດ I ປີ 2025 ເຊິ່ງຈະເຮັດໃຫ້ເງິນເດືອນຂັ້ນຕໍ່າ ຂອງພະນັກງານ-ລັດຖະກອນ ຈະຢູ່ໃນລະດັບ 2,200,000 ກີບ/ຄົນ/ເດືອນ.
ຂ່າວ: ວສລ