ຮູ້ບໍ່ວ່າອຸປະກອນສຳນັກງານຫລາຍຢ່າງປ່ອຍລັງສີ UVA ຕົວການທີ່ເຮັດໃຫ້ຜິວເບິ່ງແກ່ກ່ອນໄວ ຂະນະທີ່ບາງຢ່າງເຮັດໃຫ້ຜິວແຫ້ງເສຍ ແລະ ໂຊມໄວ ກວ່າທີ່ຄວນ ຜູ້ຍິງຄືເຮົານອກຈາກຕ້ອງເຮັດວຽກແລ້ວກໍຄວນຫາວິທີປ້ອງກັນເພື່ອຜິວຈະໄດ້ງາມໄປອີກດົນໆ
1. ເຄື່ອງຖ່າຍເອກສານ
– ຫລອດໄຟພະລັງງານສູງໃນເຄື່ອງຖ່າຍເອກະສານປ່ອຍລັງສີຍູວີໄດ້
– ຄວາມຮ້ອນຈາກເຄື່ອງຖ່າຍເອກະສານເຮັດໃຫ້ສ່ຽງຕໍ່ການ ເກິດຝ້າ ແລະ ເມັນ
– ແສງສະຫວ່າງວາບລະຫວ່າງຖ່າຍເອກະສານອາດເຮັດໃຫ້ປວດຕາ ແລະ ປວດຫົວ ອາຍໝຶກທີ່ລະເຫຍອອກມາເຮັດໃຫ້ວຽນຫົວໄດ້
ການປ້ອງກັນ
– ປິດຝາອັດໃຫ້ສະນິດຂະນະຖ່າຍເອກະສານທຸກເທື່ອ
– ບໍ່ວາງເຄື່ອງຖ່າຍເອກະສານໃນທີ່ ທີ່ບໍ່ມີອາກາດຖ່າຍເທ
– ຢ່າຍືນໃກ້ເຄື່ອງຖ່າຍເອກະສານຫລາຍເກີນໄປ
2. ຫລອດໄຟອ່ານໜັງສື
ຫລອດທັງສະເຕນມີຄວາມຮ້ອນສູງຈາກລັງສີອິນຟາເລດມີສ່ວນກະຕຸ້ນການສ້າງເມລານິນ ເຮັດໃຫ້ເກີດຝ້າ ສ່ວນຫລອດຟຣູອໍເລດເຊນຕ໌ ແມ່ນມີລັງສີ UVA ຢູ່ໃນລະດັບທີ່ປອດໄພແຕ່ຫາກເຂົ້າໃກ້ຫລາຍກວ່າ 1 ແມັດກໍເຮັດໃຫ້ເກີດຝ້າ ແລະ ເມັນໄດ້
ການປ້ອງກັນ
– ສ່ອງໄຟໄປເທິງຝາສີຂາວ ແລ້ວໃຊ້ແສງທີ່ສະທ້ອນກັບມາໃນການອ່ານຫນັງສືແທນ ຊ່ວຍຖະໜອມສາຍຕາລຸດຄວາມຮ້ອນໃນການສຳຜັດຜິວໜ້າ ນອກຈາກນີ້ຄວນປັບຄວາມເຂັ້ມຂອງແສງໃຫ້ ເໝາະກັບງານ
3. ຈໍຄອມພິວເຕີ
ດ້ານຂ້າງ ແລະ ດ້ານຫລັງຈໍຄອມພິວເຕີມີການປົດປ່ອຍຄື້ນແມ່ເຫລັກໄຟຟ້າອອກມາ ຫລາຍກວ່າດ້ານໜ້າຈໍ ນອກຈາກນີ້ຈໍຄອມພິວເຕີຍັງມີແສງຈ້າຫລາຍກວ່າປົກກະຕິ ຊຶ່ງສາມາດທຳລາຍເສັ້ນປະສາດພາຍໃນດວງຕາ ແລະ ທໍາລາຍເຊວຜິວໄດ້
ການປ້ອງກັນ
– ນັ່ງຫ່າງຈາກໜ້າຈໍຄອມພິວເຕີ 14 – 24 ນິ້ວ ຫລື ປ່ຽນມາໃຊ້ຈໍແບບແອນຊີດີຫລືໂນ້ດບຸກ
– ປັບຄ່າຄວາມສະຫວ່າງຂອງໜ້າຈໍໃຫ້ເປັນສູນ ຊ່ວຍລຸດຄວາມເຂັ້ມຂອງແສງທີ່ເຮັດໃຫ້ຜິວຄ້ຳເສຍໄດ້ເຖິງ 80 ເປີເຊັນ
- 4. ເຄື່ອງປັບອາກາດ
ອາກາດເຢັນໆ ຈາກເຄື່ອງປັບອາກາດເຮັດໃຫ້ຜິວແຫ້ງເສຍຫລາຍ ເພາະເຄື່ອງປັບອາກາດຈະປັບສະເພາະອຸນຫະພູມ ບໍ່ໄດ້ປັບຄວາມຊຸ່ມຊື່ນຄອບຄູ່ກັນ ເມື່ອບໍ່ມີຄວາມຊຸ່ມຊື່ນໃນອາກາດ ຜິວຈຶ່ງດຶງຄວາມຊຸ່ມຊື່ນມາຈາກຜິວຊັ້ນໃນແທນ
ການປ້ອງກັນ
– ຕື່ມຄວາມຊຸ່ມຊື່ນໃຫ້ອາກາດຮອບຕົວໂດຍປູກຕົ້ນໄມ້ ມີຕູ້ລ້ຽງປານ້ອຍໆ ຫລື ວາງພາຊະນະບັນຈຸນ້ຳໄວ້ຫລາຍໆຈຸດ ນອກຈາກນີ້ກໍຄວນທາມອຍສ໌ເຈີໄລເຊີລະຫວ່າງວັນ ແລະ ກິນນ້ຳເລື້ອຍໆ
ສະມາດໂຟນ ແລະ ແທັບເລັດ
ແທັບເລັດ ແລະ ສະມາດໂຟນເຮັດໃຫ້ຫລັບບໍ່ສະນິດ!! ແລນດີ ເນນສັນ ສາດສະດາຈານດ້ານປະສາດວິທະຍາມະຫາວິທະຍາໄລລັດໂອໄຮໂອ ສະຫະລັດອະເມລິກາ ທົດລອງກັບໜູແຮມົດເຕີພົບວ່າ ຄື້ນແສງສີຟ້າຈາກໜ້າຈໍຈະໄປຢຸດຍັ້ງການເຮັດວຽກງານຂອງສານເມລາໂທນິນໃນສະຫມອງ ເຮັດໃຫ້ສະຫມອງຄິດວ່າຍັງເປັນເວລາກາງເວັນຢູ່ຈຶ່ງນອນຫລັບບໍ່ສະນິດ ເຮັດໃຫ້ສ່ຽງຕໍ່ອາການຊຶມເສົ້າ ພະຍາດຕຸ້ຍ ແລະ ມະເຮັງເຕົ້ານົມ ການຈຶ້ງເບິ່ງໜ້າຈໍແທັບເລັດ ຫລື ສະມາດໂຟນເກີນມື້ລະ 2 ຊົ່ວໂມງ ສົ່ງຜົນກະທົບຕໍ່ການຫລັ່ງສານເມລາ ໂທນິນໃນສະຫມອງ ແລະ ສົ່ງຜົນໃຫ້ນອນບໍ່ຫລັບ ເຊັ່ນກັນ
ການປ້ອງກັນ
– ຫລີ່ແສງໜ້າຈໍໃຫ້ສະຫວ່າງພໍເບິ່ງເຫັນ ຈຳກັດເວລາໃຊ້ສະມາດໂຟນ ແລະ ແທັບເລັດໃຫ້ນ້ອຍລົງ ແລະ ຖືອຸປະກອນໃຫ້ຫ່າງຈາກສາຍຕາໄກກວ່າ 10 ນິ້ວ