ອີງຕາມແຫຼ່ງຂ່າວຈາກແຂວງຫຼວງພະບາງລາຍງານ: ເມືອງໂພນທອງ ແຈ້ງເຕືອນພໍ່ແມ່ປະຊາຊົນໃນທົ່ວເທດສະບານເມືອງ ໃຫ້ກຽມພ້ອມຮັບມືກັບອຸທົບກະໄພນໍ້າຖ້ວມ ທີ່ອາດຈະເກີດຂື້ນ, ເຊິ່ງປະຈຸບັນລະດັບນໍ້າແຕ່ລະສາຍເປັນຕົ້ນ: ແມ່ນໍ້າແຫມນ, ແມ່ນໍ້າມັດ ແລະ ແມ່ນໍ້າແຊງເຫັນວ່າ ມີແນວໂນມເພີ່ມຂື້ນຢ່າງໄວວາ, ເນື່ອງຈາກວ່າມີຝົນຕົກໜັກຫຼາຍວັນຕິດຕໍ່ກັນຜ່ານມາເລີ່ມຕັ້ງແຕ່ວັນທີ 23-25 ກໍລະກົດ 2024 ສະພາບອາກາດແມ່ນມີຝົນຕົກໜັກບໍ່ຂາດສາຍຕະຫຼອດເວັນ, ຕະຫຼອດຄືນຈົນຮອດຕອນເຊົ້າຂອງວັນທີ 25 ກໍລະກົດ 2024 ໄດ້ມີມວນນໍ້າຢ່າງມະຫາສານຈາກແມ່ນໍ້າຫ້ວຍ, ຮ່ອງ, ຫຼາຍສາຍຕ່າງໆລັ່ງໄຫຼໂຮມກັນເຮັດໃຫ້ແມ່ນໍ້າແຕ່ລະສາຍເພີ່ມປະລິມານຂຶ້ນຢ່າງຕໍ່ເນື່ອງຈົນເຖິງປະຈຸບັນເຫັນວ່າລະດັບນໍ້າຍັງມີປະລິມານເພີ່ນຂຶ້ນເລື້ອຍໆ.
ຈາກເຫດການດັ່ງກ່າວໄດ້ສ້າງຄວາມເສຍຫາຍຕໍ່ກັບຜົນລະປູກ, ທີ່ທຳການຜະລິດ ແລະ ທີ່ຢູ່ອາໄສຂອງພໍ່ແມ່ປະຊາຊົນຈຳນວນໜຶ່ງ, ໂດຍອິງຕາມລາຍງານຂອງການປະຕິບັດການຊ່ວຍເຫຼືອຂອງ 2 ກອງກຳລັງ ປກຊ ແລະ ປກສ ເມືອງ ໄດ້ນຳພາພະນັກງານທັງ 2 ກອງກຳລັງລົງຊ່ວຍເຫຼືອປະຊາຊົນບ້ານດອນເງິນທີ່ເປັນບ້ານອາໄສຢູ່ແຄມແມ່ນນໍ້າແຊງເປັນບ້ານທຳອິດທີ່ໄດ້ຮັບຜົນກະທົບຈາກເຫດການຄັ້ງນີ້, ປະຈຸບັນບັນດາຂະແໜງການທີ່ກ່ຽວຂ້ອງຂອງເມືອງພວມລົງກວດກາຜົນເສຍຫາຍຕ່າງໆເພື່ອລາຍງານຂັ້ນເທິງ ແລະ ໃຫ້ຄວາມຊ່ວຍເຫຼືອໃນເບື້ອງຕົ້ນໃຫ້ແກ່ປະຊາຊົນຜູ້ທີ່ໄດ້ຮັບຜົນກະທົບເສຍຫາຍຈາກເຫດການດັ່ງກ່າວໃນຄັ້ງນີ້.