ສຳນັກຂ່າວຕ່າງປະເທດລາຍງານໃນວັນທີ 15 ພຶດສະພາ 2024 ນີ້ກ່ຽວກັບເຫດການສະຫຼົດ ເມື່ອຍິງສາວຊື່ວ່າ ນີລາ ອາຍຸ 31 ປີ ຊາວອິນໂດເນເຊຍ ໄດ້ໄປພົບໝໍແຂ້ວຢູ່ຄີນິກແຫ່ງໜຶ່ງ ເນື່ອງຈາກຕົນມີອາການເຈັບຕັ້ງແຕ່ເດືອນທັນວາປີ 2023 ເຊິ່ງໝໍກໍໄດ້ກວດພົບວ່າແຂ້ວຊາວຂອງ ນີລາ ມີອາການອ່ຽງຈຶ່ງແນະນຳໃຫ້ຕົນເຂົ້າຮັບການຜ່າຕັດຖອນແຂ້ວຊາວອອກ.
ຫຼັງຈາກນີລາໄດ້ຖອນແຂ້ວອອກ ເຫືອກຂອງນີລາກັບມີອາການບວມຮຸນແຮງ ເຊິ່ງທາງຜົວຂອງລາວກໍໄດ້ຮີບພາໄປກວດຢູ່ໂຮງໝໍອື່ນຈຶ່ງຮູ້ວ່າ: ຄໍຂອງນີລາມີອາການຕິດເຊື້ອ ແລ້ວຈຶ່ງສົ່ງໄປຮັກສາຢູ່ໂຮງໝໍໃຫຍ່ ຕໍ່ມາອາການກໍດີຂຶ້ນຫຼັງຈາກເຂົ້າການຮັກສາ ແຕ່ບໍ່ພໍເທົ່າມື້ຫຼັງຈາກກັບບ້ານອາການເຈັບຄໍກໍຮຸນແຮງຂຶ້ນເລື້ອຍໆຈົນເຮັດໃຫ້ເວົ້າບໍ່ໄດ້.
ພາຍຫຼັງໜຶ່ງອາທິດຫຼັງຈາກຖອນແຂ້ວ ອາການນີລາ ກໍບໍ່ດີຂຶ້ນຈົນຕ້ອງໄດ້ໄປພົບໝໍຄັ້ງທີ 3 ທາງແພດກໍໄດ້ຢືນຢັນວ່າຄໍຂອງນີລາ ຕິດເຊື້ອແບັກທີເຣຍ ຈົນຕ້ອງໄດ້ໃຊ້ເຄື່ອງຊ່ວຍຫາຍໃຈ ຈົນໃນທີ່ສຸດກໍໄດ້ຍ້າຍໄປຍູຫ້ອງໄອຊີຍູ ແລະ ໄດ້ອອກຈາກໂຮງໝໍ ແຕ່ນີລາບໍ່ສາມາດເວົ້າໄດ້ອີກຕໍໄປ ກິນອາຫານໄດ້ແຕ່ທາງສາຍຢາງ ແລະ ບໍ່ສາມາດຍ່າງໄດ້ຈົນນ້ຳໜັກຂອງນີລາຫຼຸດລົງ 27 ກິໂລກຼາມ.
ຈົນມາຮອດວັນທີ 17 ເມສາ 2024 ຜ່ານມາ, ນີລາກໍໄດ້ເສຍຊີວິດດ້ວຍອາການປ່ວຍຕິດເຊື້ອແບັກທີເຣຍຢ່າງຮຸນແຮງ ເຊິ່ງເຫດການດັ່ງກ່າວທາງດ້ານຜົວຂອງນີລາຕັດສິນໃຈດຳເນີນການທາງກົດໝາຍກັບໝໍແຂ້ວຜູ້ຮັບຜິດຊອບການຜ່າຕັດ ໂດຍຫວັງວ່າຈະໄດ້ຮັບຄວາມຍຸດຕິທຳ.