ຈາກກໍລະນີ້ທີ່ຜູ້ນຳໃຊ້ເຟດບຸກທ່ານໜຶ່ງໄດ້ໂພສພາບໂຕຄຸ່ງ ເປັນສັດປ່າໃກ້ຈະສູນພັນ ລົງໃນສື່ສັງຄົມອອນລາຍ ພ້ອມມີເນື້ອໃນວ່າ: “ບຸນປາກແລ້ວມື້ນີ້ ສ່ຽວໄດ້ໂຕຄຸ່ງ” ,ຫຼັງຈາກທີ່ໂພສດັ່ງກ່າວເຜີຍແຜ່ອອກໄປກໍມີກຸ່ມຄົນເຂົ້າມາສະແດງຄວາມຄິດເຫັນວິພາກວິຈານຢ່າງຫຼວງຫຼາຍ.
ຫຼ້າສຸດ, ທ່ານ ອິນທີ ເດືອນສະຫວັນ ຜູ້ບຸກເບີກການທ່ອງທ່ຽວແບບຜະຈົນໄພ ,ການທ່ອງທ່ຽວອະນຸລັກ ແລະ ປຸກລະດົມການປົກປັກຮັກສາສິ່ງແວດລ້ອມ ໄດ້ອອກມາໂພສ ສະແດງຄວາມຄິດເຫັນຕໍ່ເຫດການດັ່ງກ່າວວ່າ: ເປັນພາບທີ່ຜິດຫວັງທີ່ສຸດແຫ່ງປີ, ພວກເຮົາທີມງານພູຜາມ່ານ, ຫ້ອງການກະສິກຳເມືອງຄູນຄຳ, ອາສາສະມັກຈາກສີ່ບ້ານ (ບ້ານຄູນເງິນ, ບ້ານ ພູໝາກແໜ່ງ, ບ້ານຄູນແກ້ວ, ບ້ານຄູນຄຳ) ເຮັດວຽກອະນຸລັກ (ລາດຕາເວນ, ເຜີຍແຜ່ກົດໝາຍ, ປູກຈິດສຳນຶກ… ສ້າງກິດຈະກຳເພື່ອສົ່ງເສີມຄວາມເຂັ້ມແຂງໃນການສ້າງເສດທະກິດບ້ານ) ການຊ່ວຍດຶງດູດນັກທ່ອງທ່ຽວ, ບໍ່ວ່າຈະເປັນການໃຫ້ວຽກເຮັດງານທຳແກ່ລູກຫຼານ, ການອຸດໜູນຜະລິດທະພັນຈາກບ້ານ, ການສ້າງໂອກາດທາງສ້າງເສດຖະກິດ ແລະ ທີ່ແນ່ໆ ການທີ່ພວກເຮົາຊ່ວຍກັນອະນຸລັກ ແມ່ນຈະສາມາດສ້າງຜົນປະໂຫຍດໄລຍະຍາວໃຫ້ແກ່ລູກຫຼານ).ແຕ່ມີຄົນກຸ່ມໜຶ່ງທີ່ບໍ່ໄດ້ສົນໃຈໃນການທີ່ຈະລະເມີດກົດຫມາຍໃນການລ່າ, ຂ້າ, ຂາຍ, ບໍລິໂພກ… ເຫັນແລ້ວທໍ້ໃຈອີ່ຫຼີ.
ຈາກເຫດການກະທຳຜິດຕໍ່ກັບການລ່າ ແລະ ບໍລິໂພກສັດປ່າທີ່ເກີດຂຶ້ນ ອີງຕາມກົດໝາຍອາຍາ ມາດຕາ331 ໄດ້ລະບຸວ່າ: ບຸກຄົນໃດ ຫາກໄດ້ລ່າສັດໂດຍບໍ່ຖືກຕ້ອງຕາມລະບຽບການກ່ຽວກັບການລ່າສັດ ເຊັ່ນ ລ່າສັດ ປະເພດຫວງຫ້າມ, ລ່າສັດຖືພາມານ, ລ່າສັດໃນລະດູ ຫຼື ໃນເຂດທີ່ຫວງຫ້າມ ຫຼື ດ້ວຍເຄື່ອງມືທີ່ເກືອດຫ້າມ ແລະ ອື່ນໆ ຈະຖືກລົງໂທດຕັດອິດສະລະພາບ ແຕ່ ສາມເດືອນ ຫາ ສອງປີ ແລະ ຈະຖືກປັບໄໝແຕ່3.000.000 ກີບ – 10.000.000 ກີບ.ໃນກໍລະນີ ການກະທຳຜິດ ເປັນອາຈີນ, ມີການຈັດຕັ້ງເປັນກຸ່ມ ຫຼື ກໍ່ຄວາມເສຍຫາຍທີ່ມີມູນຄ່າ ແຕ່ 50.000.000 ກີບ ຂຶ້ນໄປ ຈະຖືກລົງໂທດຕັດອິດສະລະພາບ ແຕ່ ສອງປີ ຫາ ຫ້າປີ ແລະ ຈະຖືກປັບ ໄໝ ສອງເທົ່າ ຂອງມູນຄ່າຄວາມເສຍຫາຍ.