ກອງບັນຊາການ ປກສ ເມືອງຄູນຄໍາ, ແຂວງຄຳມ່ວນ ໄດ້ໃຫ້ຮູ້ວ່າ ໃນວັນທີ 14 ພະຈິກ 2023 ໄດ້ຮັບແຈ້ງຄວາມຈາກ ນາງ ດົນຕາ ພະນັກງານຂາຍໂທສະສັບ ຕັ້ງຢູ່ບ້ານຄູນຄໍາ, ເມືອງຄູນຄໍາ, ແຂວງຄໍາມ່ວນ ໄດ້ມີຄົນຮ້າຍເຂົ້າໄປລັກເອົາຊັບສິນຢູ່ພາຍໃນຮ້ານ, ເຊິ່ງມີໂທລະສັບ 70 ໜ່ວຍ, ຄອມພີວເຕີໂນດບຸກ ແລະ ວັດຖຸມີຄ່າຈໍານວນໜຶ່ງ, ລວມມູນຄ່າເສຍຫາຍເປັນເງິນທັງໝົດ 154.950.000 ກີບ; ຈາກນັ້ນ, ເຈົ້າໜ້າທີ່ວິຊາສະເພາະ ຈຶ່ງໄດ້ລົງກວດກາສະຖານທີ່ເກີດເຫດ ແລະ ເກັບກໍາຂໍ້ມູນເບື້ອງຕົ້ນ ເຫັນວ່າມີມູນຄວາມຈິງແທ້ ພ້ອມລົງເຄື່ອນໄຫວຕິດຕາມເປົ້າໝາຍສົງໄສ ຕົກມາຮອດວັນທີ 2 ກຸມພາທີ່ຜ່ານມາ, ຈຶ່ງສາມາດກັກຕົວເປົ້າໝາຍ ຊື່ ທ້າວ ແຕກຊິໂລ່ (ໂລ່) ອາຍຸ 28 ປີ, ອາຊີບ ກຳມະກອນ ຢູ່ບ້ານພູຊາດ, ເມືອງຄູນຄໍາ, ແຂວງຄໍາມ່ວນ.

ຜ່ານການສືບສວນ-ສອບສວນຂອງ ຜູ້ກ່ຽວຮັບສາລະພາບວ່າ: ໃນເວລາ 24 ໂມງ 00 ນາທີ ຂອງວັນ 13 ພະຈິກ 2023 ຕົນໄດ້ກໍ່ເຫດລັກຊັບຢູ່ຮ້ານດັ່ງກ່າວແທ້, ໂດຍແມ່ນຕົນໄດ້ໄປຄົນດຽວ,ເຫັນວ່າບໍ່ມີຄົນຜ່ານໄປມາເຂດນັ້ນ ຈຶ່ງໄດ້ປີນເຂົ້າທາງໜ້າຮ້ານ ຂຶ້ນເທິງເພດານ ເພື່ອຖອດສາຍກ້ອງວົງຈອນປິດໃຫ້ໝົດ, ແລ້ວງັດເພດານລົງເຂົ້າໃນຮ້ານ, ພໍເຂົ້າໄປໄດ້ ຈຶ່ງຊອກເອົາກຸນແຈຕູ້ໄປໄຂເອົາໂທລະສັບ ຈໍານວນ 70 ໜ່ວຍ, ເປັນສະມາດໂພນ 60 ໜ່ວຍ, ຄອມພີວເຕີໂນດບຸກ 1 ເຄື່ອງ, ບັດ ແລະ ເບີໂທລະສັບ ອີກຈຳນວນໜຶ່ງ ແລ້ວຫຼົບໜີອອກຫຼັງຮ້ານ ແລ້ວເອົາໄປເຊື່ອງໄວ້ຢູ່ເຮືອນຂອງຕົນ, ເຄື່ອງທີ່ລັກມາ ໄດ້ເອົາໄປຂາຍໃຫ້ກັບໝູ່ຄົນຮູ້ຈັກຢູ່ຕ່າງເມືອງ, ຕ່າງແຂວງ ແລະ ຄົນຮູ້ຈັກຢູ່ເຂດເມືອງຄູນຄໍາ. ຜູ້ກ່ຽວຍັງໄດ້ຮັບສາລະພາບຕື່ມອີກວ່າ: ຜ່ານມາໄດ້ເຄີຍຕ້ອງໂທດ, ພາຍຫຼັງພົ້ນໂທດ ໃນທ້າຍປີ 2022 ໄດ້ມາຢູ່ນໍາຄອບຄົວ ທີ່ບ້ານພູຊາດ, ເມືອງຄູນຄໍາ, ແຂວງຄໍາມ່ວນ ແລະ ໄດ້ເຄື່ອນໄຫວກໍ່ເຫດລັກຊັບຂອງປະຊາຊົນ ຢູ່ເຂດເມືອງຄູນຄຳ ຈໍານວນຫຼາຍຄັ້ງ.

• ວັນທີ 28 ມີຖຸນາ 2023 ເວລາ 24 : 00 ນາທີ ໄດ້ກໍ່ເຫດປີນກໍາແພງເຂົ້າໄປລັກຊັບຢູ່ເຮືອນປະຊາຊົນ ບ້ານມ່ວງນໍ້າສາງ, ເມືອງຄູນຄໍາ ແລ້ວລັກເອົານໍ້າມັນ ກາຊວນ 2 ຕຸກ ຕຸກລະ 20 ລິດ, ໝໍ້ໄຟໃຫຍ່ໃສ່ໂຊລ່າເຊວ 2 ໜ່ວຍ.
• ວັນ 14 ຕຸລາ 2023 ເວລາ ປະມານ 23 : 00 ນາທີ ໄປລັກລົດຈັກຮອນດາເວບ 100 ສີຟ້າດຳ ບໍ່ຕິດແຜ່ນປ້າຍທະບຽນ ແລະ ເຂົ້າເປືອກຈຳນວນ 2 ເປົາ ຢູ່ເຮືອນປະຊາຊົນບ້ານພູຊາດ, ເມືອງຄູນຄໍາ.
• ວັນທີ 15 ມັງກອນ 2024 ໄປລັກນໍ້າມັນກາຊວນ 3 ຕຸກ ຕຸກລະ 20 ລິດ, ຕູ້ຈອດເຫຼັກ 1 ໜ່ວຍ ແລະ ຈັກຕັດຫຍ້າ 1 ເຄື່ອງ ຢູ່ເຮືອນປະຊາຊົນບ້ານຄູນແກ້ວ, ເມືອງຄູນຄໍາ ເຊິ່ງການລັກຊັບແຕ່ລະຄັ້ງແມ່ນໄດ້ໃສ່ໝວກວອມເພື່ອປິດປັງໃບໜ້າ, ພາຍຫຼັງລັກມາໄດ້ແຕ່ລະຄັ້ງ ໄດ້ໄປຂາຍໃຫ້ກັບໝູ່ຄົນຮູ້ຈັກຢູ່ຕ່າງເມືອງ, ຕ່າງແຂວງ ແລະ ຄົນຮູ້ຈັກຢູ່ເຂດເມືອງຄູນຄໍາ ແລ້ວນຳເງິນມາຊື້ຢາບ້າເສບ ແລະ ຫຼິ້ນກິນຟຸມເຟືອຍຈົນໝົດ, ແລ້ວກໄປຊອກຫາລັກຊັບອີກ ແຕ່ໜີບໍ່ລອດ ໄດ້ຖືກເຈົ້າໜ້າທີ່ກັກຕົວມາດຳເນີນຄະດີ.

ປະຈຸບັນ, ເຈົ້າໜ້າທີ່ ປກສ ເມືອງຄູນຄຳ, ແຂວງຄຳມ່ວນ ສາມາດເກັບກູ້ເຄື່ອງທີ່ຜູ້ກ່ຽວລັກໄປກັບຄືນມາໄດ້ ລວມມີ ໂທລະສັບມືຖື 63 ໜ່ວຍ (ເປັນສະມາດໂພນ 53 ໜ່ວຍ), ຄອມພີວເຕີໂນດບຸກ 1 ເຄື່ອງ, ເບີໂທລະສັບ 49 ເບີ, ລົດຈັກຮອນດ້າເວບຮ້ອຍ 1 ຄັນ, ຕູ້ຈອດ 1 ເຄື່ອງ, ຈັກຕັດຫຍ້າ 1 ເຄື່ອງ, ນໍ້າມັນ 2 ຕຸກ, ຕໍ່ເກັບເຄື່ອງຂອງກາງທີ່ເກັບກູ້ມານັ້ນແມ່ນໄດ້ມອບຄືນໃຫ້ກັບເຈົ້າຂອງເດີມ. ຕໍ່ກັບຄະດີ ທ້າວ ແຕກຊິໂລ່, ທາງເຈົ້າໜ້າທີ່ວິຊາສະເພາະ ໄດ້ສະຫຼຸບສໍານວນຄະດີ ສົ່ງໃຫ້ ກອງບັນຊາການ ປກສ ແຂວງຄໍາມ່ວນ ເພື່ອດຳເນີນຄະດີຕາມຂັ້ນຕອນຂອງກົດໝາຍ.

ພາບ-ຂ່າວ : ນີວອນ