ດ່ານພາສີສາກົນ ນາເພົ້າ ເກັບລາຍຮັບໄດ້ 99,06%

0
228

ທ່ານ ສຸພັດ ສຸແສງໄທ ຫົວໜ້າດ່ານພາສີ ສາກົນນາເພົ້າ, ແຂວງຄຳມ່ວນ ໄດ້ໃຫ້ສໍາພາດຕໍ່ສື່ມວນຊົນໃນວັນທີ 21 ກຸມພາ ທີ່ຜ່ານມາວ່າ: ປີ 2023 ດ່ານພາສີສາກົນນາເພົ້າ ໄດ້ຮັບການມອບໝາຍເກັບລາຍຮັບເຂົ້າງົບປະມານທັງໝົດ 162,4 ຕື້ກີບ ຜ່ານການຈັດຕັ້ງປະຕິບັດ ສາມາດຈັດເກັບຮັບໄດ້ທັງໝົດ 160,8 ຕື້ກີບ ເທົ່າກັບ 99,06% ຂອງແຜນການປີ, ທຽບໃສ່ປີ 2022 ການເກັບລາຍຮັບເພີ່ມຂຶ້ນ 66,1 ຕື້ກີບ ຫຼື ເທົ່າກັບ 69,82%, ການເກັບລາຍຮັບສ່ວນຫຼາຍແມ່ນໄດ້ຈາກຄ່າທຳນຽມຕ່າງໆ, ນໍ້າມັນເຊື້ອໄຟ, ສິນຄ້າຕາມສັນຍາອາຊຽນ, ຄ່າສັກພິເສດ ປະເພດແຮ່ທາດຕ່າງໆ (ປະເພດໄມ້ແປຮູບ, ອຸປະກອນກໍ່ສ້າງ, ອຸປະກອນໄຟຟ້າ ແລະ ອື່ນໆ ) .

May be an image of 1 person and text

ສາເຫດທີ່ພາໃຫ້ການຈັດເກັບລາຍຮັບບໍ່ບັນລຸຕາມແຜນແມ່ນມີຫຼາຍປັດໄຈ ເປັນຕົ້ນແຜນການຈັດເກັບລາຍຮັບເພີ່ມຂຶ້ນສູງ ຖ້າທຽບໃສ່ປີທີ່ຜ່ານມາ, ການນໍາເຂົ້າສິນຄ້າຈໍານວນໜຶ່ງ ແມ່ນນຳເຂົ້າຕາມກອບຂອງອາຊຽນ, ເຊິ່ງໄດ້ຮັບບຸລິມະສິດໃນການຍົກເວັ້ນ ແລະ ຫຼຸດຜ່ອນອັດຕາພາສີນຳເຂົ້າ, ການນຳເຂົ້າສິນຄ້າຕາມໂຄງການການລົງທຶນກໍ່ໄດ້ຮັບການຍົກເວັ້ນອາກອນມູນຄ່າເພີ່ມຕາມກົດໝາຍອາກອນ ແລະ ກົດໝາຍສົ່ງເສີມການລົງທຶນ.

May be an image of lumberyardສໍາລັບໃນປີ 2024 ດ່ານພາສີສາກົນນາເພົ້າ ແມ່ນໄດ້ຮັບໂຕເລກມອບໝາຍຈັດເກັບລາຍຮັບທັງໝົດ ຈໍານວນ 305 ຕື້ກີບ ທຽບໃສ່ປີ 2023 ເພີ່ມຂຶ້ນ 142,6 ຕື້ກີບ ຫຼື ເພີ່ມຂຶ້ນ 87,80 % ເຊິ່ງເປັນຕົວເລກທີ່ເພີ່ມຂຶ້ນສູງພໍສົມຄວນ . ສະນັ້ນ ເພື່ອເຮັດໃຫ້ຕົວເລກລາຍຮັບປະຕິບັດໄດ້ຕາມແຜນການທີ່ໄດ້ວາງໄວ້ ດ່ານພາສີສາກົນນາເພົ້າຈຶ່ງໄດ້ກຳນົດມາດຕະການຈຳນວນໜຶ່ງ ເປັນວຽກງານຈຸດສຸມໃນຕໍ່ໜ້າ ເປັນຕົ້ນເອົາໃຈໃສ່ສຶກສາອົບຮົມດ້ານການເມືອງ-ແນວຄິດໃຫ້ອ້າຍນ້ອງພະນັກງານຢ່າງເປັນປົກກະຕິ, ຈັດວາງໜ້າວຽກແບ່ງຄວາມຮັບຜິດຊອບໃຫ້ພະນັກງານໃນໜ້າວຽກແຕ່ລະບ່ອນໃຫ້ແທດເໝາະກັບຄວາມຮູ້ – ຄວາມສາມາດຂອງແຕ່ລະຄົນ, ເພີ່ມທະວີການປະຕິບັດໜ້າທີ່ວຽກງານວິຊາສະເພາະໃຫ້ເຂັ້ມງວດຕາມກົດໝາຍພາສີ ແລະ ລະບຽບການອື່ນໆທີ່ກ່ຽວຂ້ອງ, ສືບຕໍ່ປະຕິບັດການອຳນວຍຄວາມສະດວກໃຫ້ແກ່ການນຳເຂົ້າ-ສົ່ງອອກ, ການນຳເຂົ້າຊົ່ວຄາວ, ການຜ່ານແດນ ແລະ ການເຄື່ອນຍ້າຍສິນຄ້າຢູ່ ສປປ ລາວ, ສືບຕໍ່ການເພີ່ມທະວີຄວາມເຂັ້ມງວດການການເຄື່ອນຍ້າຍໄມ້ ແລະ ທຸລະກິດໄມ້, ເພີ່ມທະວີວຽກງານປະສານສົມທົບກັບອໍານາດການປົກຄອງ ແລະ ພາກສ່ວນຂະແໜງການທີ່ກ່ຽວຂ້ອງ ເພື່ອສ້າງສິ່ງອຳນວຍຄວາມສະດວກໃນການຈັດຕັ້ງປະຕິບັດ.

ຂ່າວ: Media Laos