ໃນວັນທີ 25 ທັນວາ 2023 ເວລາປະມານ 16 ໂມງຜ່ານມາ, ໄດ້ເກີດເຫດເດັກນັກຮຽນຍິງ 4 ຄົນຫາຍໂຕ ຢູ່ບ້ານຫົວຊຽງ ເມືອງໄຊທານີ ນະຄອນຫຼວງວຽງຈັນ ຕາມການບອກເລົ່າຜູ້ເຫັນເຫດການໄດ້ບອກວ່າ: ມີລົດແທກຊີ້ ເຂົ້າມາຮັບເອົາໄປເດັກນັກຮຽນຍິງທັງ 4 ຄົນ ແລະ ພາກັນຂຽນຈົດໝາຍໄວ້ເປັນລັກສະນະດຽວກັນ ເຊິ່ງລະບຸວ່າ: ຈະອອກໄປຫາເງິນອີກ2-3ປີ ຈະກັບມາຢາມ.
ເຊິ່ງໃນວັນດຽວກັນ, ທາງຜູ້ປົກຄອງຂອງເດັກນ້ອຍ ກໍໄດ້ເຂົ້າໄປເຮັດບົດບັນທຶກແຈ້ງຄວາມນຳນາຍບ້ານຫົວຊຽງ ເມືອງໄຊທານີ ນະຄອນວຽງຈັນ ແລະ ແຈ້ງຕໍ່ເຈົ້າໜ້າທີ ປກສ ເມືອງໄຊທານີ ວ່າ: ເກີດເຫດການເດັກນ້ອຍຍິງ 4 ຄົນ ອາຍຸລະຫວ່າງ 13-14 ປີ ຢູ່ບ້ານຫົວຊຽງ ເມືອງໄຊທານີ ນະຄອນຫລວງວຽງຈັນ ຫາຍຕົວໄປ ພາຍຫລັງເດັກນ້ອຍເລີກໂຮງຮຽນເວລາປະມານ 15:45 ນາທີ ຂອງວັນທີ ວັນທີ 25 ທັນວາ 2023 ເຊິ່ງ ເດັກນ້ອຍທັງສີ່ໄດ້ຍ່າງໄປຂຶ້ນລົດໃຫຍ່ຄັນໜຶ່ງມາຈອດລໍຖ້າຮັບໄປ. ຈາກນັ້ນ ກໍບໍ່ສາມາດຕິດຕໍ່ຫາໄດ້ເລີຍ.
ຫຼ້າສຸດໃນຕອນເຊົ້າວັນທີ 26 ທັນວາ 2023 ເຈົ້າໜ້າທີ່ ປກສ ເມືອງ ໄຊທານີ ສາມາດຈັບຕົວກຸ່ມກໍ່ເຫດພາເດັກຍິງ ທັງ 4 ຄົນໄດ້ແລ້ວ ແລະ ເດັກຍິງທັງ 4 ປອດໄພ ເຊິ່ງມອບໃຫ້ຜູ້ປົກຄອງແລ້ວ ສ່ວນລາຍລະອຽດຍັງຢູ່ໃນຂັ້ນຕອນຂອງການສອບສວນ; ລາຍລະອຽດຈະລາຍງານຕາມຫຼັງ.
ທີ່ມາ:ຄວາມສະຫງົບ