ທີ່ປະເທດຈີນມີເດັກຊາຍຄົນໜຶ່ງ ອາຍຸ 5 ປີ ລາວມັກບອກແມ່ວ່າ ຮູ້ສຶກບໍ່ມີຄວາມສຸກເມື່ອຢູ່ໂຮງຮຽນ ທາງພໍ່ແມ່ເລີຍແປກໃຈເລີຍໄປໂຮງຮຽນເພື່ອໂອ້ລົມກັບຄູອະນຸບານຂອງລູກຊາຍ ຂໍໃຫ້ຄູເບິ່ງລູກ ແລະ ເພີ່ມປະລິມານເຂົ້າໃນແຕ່ລະມື້ຕື່ມອີກ.
ເມື່ອຄູໄດ້ຍິນຄຳແນະນຳຈາກຜູ້ປົກຄອງແນວນັ້ນກໍຮູ້ສຶກແປກໃຈ ພ້ອມກັບອະທິບາຍວ່າ ເມື່ອທຽບນັກຮຽນຄົນອື່ນໃນຊັ້ນຮຽນ ເດັກຊາຍມັກຈະບອກວ່າບໍ່ອີ່ມ ແລ້ວກໍໃຫ້ອາຫານຫຼາຍກວ່າຄົນອື່ນເຖິງ 2 ເທົ່າອີກດ້ວຍ.
ຢ່າງໃດກໍຕາມ ເນື່ອງຈາກກັງວົນວ່ານັກຮຽນຈະກິນໄວ ແລະ ຫຼາຍເກີນໄປ ກະເພາະຂອງເຂົາອາດຈະບໍ່ຍ່ອຍໄດ້ທັນເວລາ ສິ່ງສຳຄັນຄືປະລິມານທີ່ຮ່າງກາຍເດັກນ້ອຍຄວນໄດ້ຮັບຢ່າງພຽງພໍ ເພື່ອຫຼີກລ່ຽງໂຣກຕຸ້ຍ ນັ້ນຈຶ່ງເປັນສາເຫດທີ່ຄູບໍ່ກ້າໃຫ້ອາຫານຫຼາຍກວ່ານີ້ອີກ.
ດັ່ງນັ້ນ ຜູ້ເປັນແມ່ຈຶ່ງຕັດສິນໃຈຖ່າຍຮູບວ່າລູກກິນເຂົ້າຢູ່ບ້ານໃຫ້ຄູໄດ້ເບິ່ງ ເພື່ອທີ່ຈະໃຫ້ຄູໄດ້ເຂົ້າໃຈຕື່ມເຖິງປະລິມານການກິນຂອງລູກຕົນເອງ ແຕ່ເມື່ອຄູໄດ້ເຫັນຮູບພາບກໍບໍ່ເຫັນດີກັບພໍ່ແມ່ທີ່ລ້ຽງລູກແບບນີ້.
ເຊິ່ງໃນພາບກໍສະແດງໃຫ້ເຫັນວ່າ ເດັກຊາຍກິນອາຫານໃນປະລິມານຫຼາຍ ບາງເທື່ອກໍໃຊ້ຊາມ ຈານໃຫຍ່ ແຕ່ລະຄັ້ງທີ່ກິນອາຫານກໍຈະເປັນກອງພູນຂຶ້ນມາ ແລະ ເບິ່ງວ່າເດັກຊາຍຈະມັກກິນອາຫານທີ່ບໍ່ເປັນປໂຫຍດຕໍ່ຮ່າງກາຍເຊັ່ນ ຜັດໝີ່ ໄສ້ກອກ ໂດນັດ ແລະ ອື່ນໆ ອາຫານເຫຼົ່ານີ້ລ້ວນແຕ່ເປັນອັນຕະລາຍຖ້າກິນເປັນປະຈຳ.
ເຖິງວ່າຮູບຮ່າງຂອງເດັກນ້ອຍຈະບໍ່ຕຸ້ຍກໍຕາມ ແຕ່ຖ້າຍັງບໍ່ມີການປ່ຽນພຶດຕິກຳໃນການກິນກໍຈະສົ່ງຜົນຕໍ່ຮ່າງກາຍຂອງເດັກຊາຍໃນອະນາຄົດ.
