ອິນຟູເອນເຊີສາວຈາກຣັດເຊຍ ເສຍຊີວິດຈາກການຂາດສານອາຫານ ເນື່ອງຈາກກິນແຕ່ໝາກໄມ້ ຜັກດິບ ແລະ ບໍ່ດື່ມນ້ຳເປັນເວລາຫຼາຍປີ.
ອິນຟູເອນເຊີສາວ ຊື່ ຊານນາ (Zhanna Samsonova) ເຊິ່ງເປັນຜູ້ມີສື່ສຽງໃນສັງຄົມອອນລາຍ ໄດ້ເສຍຊີວິດໃນປະເທດມາເລເຊຍ ໃນວັນທີ 21 ກໍລະກົດ 2023 ຫຼັງຈາກໝູ່ ແລະ ຄອບຄົວຂອງລາວຂໍຮ້ອງໃຫ້ລາວໄປຫາໝໍ.
ເຊິ່ງຜູ້ເປັນແມ່ຂອງ ຊານນາ ໄດ້ບອກກັບສື່ຂອງຣັດເຊຍວ່າ: ລູກສາວ ມີອາຍຸ 39 ປີ ຕິດເຊື້ອພະຍາດທີ່ເຮັດໃຫ້ມີອາການຄ້າຍຄືຜູ້ປ່ວຍໂຣກອະຫິວາ ແລະ ລູກສາວກຳລັງຈະຕາຍ ແຕ່ກໍບໍ່ສາມາດຊ່ວຍຫຍັງລູກສາວໄດ້ ເຊິ່ງຕົນກໍຂໍຮ້ອງໃຫ້ລູກສາວກັບບ້ານທີ່ມົດສະກູ.
ນອກຈາກການກິນຜັກ ແລະ ໝາກໄມ້ດິບໆແລ້ວ ຍັງໄດ້ກິນຖົ່ວລຽນ ແລະ ໝາກມີ້, ຊານນາ ຍັງໄດ້ລະບຸວ່າ ລາວບໍ່ໄດ້ດື່ມນ້ຳມາ 6 ປີແລ້ວ ເພາະລາວບໍ່ຕ້ອງການມັນ ແລະ ນີ້ເປັນເລື່ອງປົກກະຕິຂອງຄົນທີ່ດື່ມນ້ຳໝາກໄມ້.
ທາງດ້ານຜູ້ຊ່ຽວຊານກ່າວວ່າ ນ້ຳເປັນສິ່ງຈຳເປັນໃນການເຮັດໃຫ້ຮ່າງກາຍຂອງເຮົາເຮັດວຽກໄດ້ຢ່າງຖືກຕ້ອງ ແລະ ລະບົບສ່ວນຫຼາຍຂອງຮ່າງກາຍເຮົາກໍຕ້ອງການນ້ຳເພື່ອຢູ່ລອດ.
ການກິນອາຫານທີ່ຫຼາກຫຼາຍ ແລະ ເໝາະສົມ ເປັນສິ່ງຈຳເປັນສຳລັບການເຮັດວຽກທີ່ດີຂອງສຸຂະພາບ ເຖິງວ່າຈະເປັນໄປໄດ້ທີ່ເຮົາຈະໄດ້ຮັບອາຫານຄົບໝູ່ຈາກການບໍ່ກິນຊີ້ນ ແຕ່ຜູ້ຊ່ຽວຊານໄດ້ພິສູດແລ້ວວ່າການກິນມັງສະວີລັດແບບດິບ (ໝາຍເຖິງການບໍ່ກິນຊີ້ນ) ມັນບໍ່ດີຕໍ່ສຸຂະພາບ.
ແຫຼ່ງຂ່າວ Sky News