ຈາກການແຊຣຕໍ່ໆກັນມາ ພ້ອມການສະແດງຄວາມຄິດເຫັນຈາກສັງຄົມອອນລາຍເລື່ອງ ຄຣິບເດັກນ້ອຍຖືກຊັກຊວນ, ຍົວະໃຫ້ດື່ມສິ່ງມຶນເມົາກ່ອນແລ້ວຈະຊື້ເຄື່ອງຊ່ວຍ, ເຊິ່ງເລື່ອງເກີດຂຶ້ນຢູ່ຮ້ານອາຫານແຫ່ງໜຶ່ງ ໃນຄ່ຳຄືນວັນທີ 11 ກໍລະກົດ 2023 ທີ່ຜ່ານມາ, ມີເດັກນ້ອຍມາເລາະຂາຍແກ່ນຕາເວັນ. ຈາກນັ້ນ, ມີຜູ້ໃຫຍ່ໄດ້ຖາມຊື້ ແລະ ບອກໃຫ້ເດັກດື່ມເບຍແລ້ວຈະຊື້ຊ່ວຍ ເຊິ່ງທ່າທີ່ຂອງເດັກນ້ອຍແມ່ນບໍ່ຢາກດື່ມ ແຕ່ກໍຈຳເປັນເພາະຢາກຂາຍເຄື່ອງ ເຊິ່ງຜູ້ໃຫຍ່ທີ່ຢູ່ໃນຄຣິບກໍຍົວະ ແລະ ເວົ້າກັບເດັກນ້ອຍເພື່ອໃຫ້ດື່ມ ພ້ອມສະແດງອອກດ້ວຍທ່າທີ່ມ່ວນຊື່ນ.
ຈາກການກະທຳດັ່ງກ່າວ, ເຫັນວ່າບໍ່ເໝາະສົມ ເຊິ່ງເບິ່ງເດັກນ້ອຍແລ້ວແມ່ນອາຍຸຍັງບໍ່ຮອດ 18 ປີ ແລະ ເປັນການກະທຳທີ່ບັງຄັບ ເຊິ່ງບໍ່ຄວນເກີດໃນສະຖານທີ່ໃດກໍຕາມ.
ຫວັງວ່າອົງການຈັດຕັ້ງ ແລະ ພາກສ່ວນກ່ຽວຂ້ອງຈະເບິ່ງກ່ຽວກັບເລື່ອງນີ້ໃຫ້ໜັກແໜ້ນຕື່ມ.