Homeຂ່າວພາຍ​ໃນກອງປະຊຸມສະຫຼຸບວຽກງານປະຈໍາປີ 2022

ກອງປະຊຸມສະຫຼຸບວຽກງານປະຈໍາປີ 2022

Published on

ກະຊວງກະສິກໍາ ແລະ ປ່າໄມ້ (ກປ) ໄດ້ຈັດກອງປະຊຸມສະຫຼຸບວຽກງານ ກປ ແລະພັດທະນາຊົນນະບົດ ປະຈໍາປີ 2022 ແລະທິດທາງແຜນການປະຈໍາປີ 2023 ຈັດຂຶ້ນໃນລະຫວ່າງວັນທີ 7-8 ກຸມພາ 2023 ທີ່ສູນການຮ່ວມມືສາກົນ ແລະການຝຶກອົບຮົມ (ICTC)ນະຄອນຫຼວງວຽງຈັນພາຍໃຕ້ການເປັນປະທານຂອງທ່ານ ເພັດ ພົມພິພັກ ລັດຖະມົນຕີກະຊວງ ກປ, ມີບັນດາຮອງປະທານກໍາມາທິການຈາກສະພາແຫ່ງຊາດ, ຮອງລັດຖະມົນຕີ, ຮອງຫົວຫນ້າອົງການ ແລະທຽບເທົ່າ ພ້ອມດ້ວຍບັນດາຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ ແລະພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້ທ່ານ ເພັດ ພົມພິພັກ ໄດ້ກ່າວເປີດກອງປະຊຸມວ່າ: ກອງປະຊຸມຄັ້ງນີ້ເປີດຂຶ້ນຢູ່ຈຸດເວລາທີ່ຂະແຫນງ ກປ ແລະພັດທະນາຊົນນະບົດກໍຄືທົ່ວປະເທດພົບ ກັບບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ລາຄານໍ້າມັນ, ລາຄາປັດໄຈການຜະລິດແພງຂຶ້ນ, ໄພເງິນເຟີ້, ການລະບາດຂອງພະຍາດ, ການ ປ່ຽນແປງດິນຟ້າອາກາດ ຊຶ່ງໄດ້ສົ່ງຜົນກະທົບໂດຍກົງ ແລະ ເປັນສິ່ງທ້າທາຍ ຕໍ່ການຜະລິດ, ຕໍ່ຄວາມຫມັ້ນຄົງດ້ານສະບຽງອາຫານຂອງຊາດ. ດັ່ງນັ້ນ, ກອງປະຊຸມ ໃນຄັ້ງນີ້ຈຶ່ງມີຄວາມສໍາຄັນຫຼາຍຊຶ່ງຈະໄດ້ດໍາເນີນເປັນເວລາ 2 ມື້ເຕັມ. ໃນກອງປະຊຸມຈະໄດ້ຮັບຟັງບົດສະຫຼຸບຕີລາຄາ ການຈັດຕັ້ງປະຕິບັດວຽກງານ ກປ ແລະ ພັດທະນາຊົນນະບົດ, ການຈັດຕັ້ງປະຕິບັດວາລະແຫ່ງຊາດ ໃນຂະແຫນງ ກປ ແລະ ພັດທະນາຊົນນະບົດ ປະຈໍາປີ 2022 ແລະ ທິດທາງແຜນການ ປີ 2023, ຮັບ ຟັງການສະເຫນີແນະນໍາບັນດາໂຄງການ,ນະໂຍບາຍ, ນິຕິກໍາ ແລະບັນຫາຕ່າງໆທີ່ຄວນເອົາໃຈໃສ່ 13 ຫົວຂໍ້ ປິ່ນອ້ອມ ຈາກບັນດາກົມ ແລະຮັບຟັງການນໍາສະເຫນີ ບາງບົດຮຽນຈາກ 4 ບໍລິສັດ ແລະ 2 ສະຫະກອນ ພ້ອມທັງເປີດກວ້າງໃຫ້ຜູ້ເຂົ້າຮ່ວມໄດ້ປະກອບຄໍາຄິດຄໍາເຫັນຢ່າງມີຈຸດສຸມຮ່ວມກັນກ້າວໄປເຖິງຄວາມເປັນ ເອກະພາບທາງມາດຕະການ, ວິທີການ ແລະ ພ້ອມກັນປະຕິບັດໄປໃນລວງດຽວກັນຢ່າງຖືກທິດ.

ໃນວາລະກອງປະຊຸມ, ທ່ານ ທອງພັດ ວົງມະນີ ຮອງລັດຖະມົນຕີກະຊວງ ກປ ໄດ້ຂຶ້ນລາຍງານກ່ຽວກັບການສະຫຼຸບການຈັດຕັ້ງປະຕິບັດ ແຜນພັດທະນາ ກປ ແລະ ພັດທະນາຊົນນະບົດ ປະຈໍາປີ 2022 ແລະ ທິດທາງແຜນການປະຈໍາປີ 2023 ຊຶ່ງໄດ້ຍົກໃຫ້ເຫັນເຖິງຜົນງານພົ້ນເດັ່ນໃນຫຼາຍແຜນງານ ເປັນຕົ້ນວ່າ: ແຜນ ງານທີ 1 ການຄໍ້າປະກັນສະບຽງອາຫານ ແລະ ໂພຊະນາການ ຊຶ່ງການຜະລິດເຂົ້າເປືອກລວມ ໃນປີ 2022 ປັກດໍາໄດ້ທັງຫມົດ 959.407 ເຮັກຕາ, ເນື້ອທີ່ເກັບກ່ຽວ 957.629 ເຮັກຕາ, ຜົນຜະລິດ 3.781.580 ໂຕນ (ຕາມມະຕິສະພາຮັບຮອງ 3,7 ລ້ານໂຕນ) ບັນລຸລື່ນແຜນການ 2,2%; ການລ້ຽງສັດ ແລະ ການປະມົງ ມີການ ຂະຫຍາຍຕົວໃນລະດັບ 3,88% ທຽບໃສ່ປີ 2021 ລື່ນແຜນການທີ່ວາງໄວ້ ຊຶ່ງໃນແຜນປີ 2022 ແມ່ນ 3,5%, ນອກນີ້, ກໍໄດ້ສຸມໃສ່ປັບປຸງພຶດຕິກໍາດ້ານໂພຊະນາ ການ, ສະຫນອງທຶນແບບມີເງື່ອນໄຂໃຫ້ຄອບຄົວເປົ້າຫມາຍ, ໃຫ້ຄວາມຮູ້ດ້ານເຕັກນິກກະສິກໍາທີ່ດີ, ສ້າງເປັນຕົວແບບການຜະລິດ, ສະຫນອງຄູ່ມື, ອຸປະກອນການ ຜະລິດກະສິກໍາ ແລະ ລວມທັງໄດ້ເສີມຂະຫຍາຍກົນໄກປະສານງານຫນຶ່ງດຽວຫຼາຍຂະແຫນງການ ໄດ້ທັງຫມົດ 6 ແຂວງ (ຜົ້ງສາລີ, ຫົວພັນ, ອຸດົມໄຊ, ຫຼວງນໍ້າທາ, ຫຼວງພະບາງ ແລະ ຊຽງຂວາງ) ລວມໄດ້ 29 ເມືອງ, 1.422 ບ້ານ ແລະ 88.518 ຄອບຄົວ ໃນນີ້ ມີກຸ່ມແມ່ຍິງຖືພາ 48.249 ຄົນ ແລະ ເດັກນ້ອຍ ລຸ່ມ 5 ປີ 41.603 ຄົນ.

ສໍາລັບແຜນງານທີ 2 ການຜະລິດກະສິກໍາ ເປັນສິນຄ້າ ກໍມີຫຼາຍອັນພົ້ນເດັ່ນ ເປັນຕົ້ນການປູກຝັງ ທີ່ສຸມໃສ່ການຜະລິດບັນດາພືດທີ່ໄດ້ເຈລະຈາ ເຕັກນິກເປີດຕະຫຼາດແລ້ວສາມາດປະຕິບັດໄດ້ 563.456 ເຮັກຕາ,ຜົນຜະລິດມີ 8.176.420 ໂຕນ (ແຜນການ 6,31 ລ້ານໂຕນ) ລື່ນແຜນການ 29,46%; ຂະນະທີ່ ການລ້ຽງສັດ ແລະ ສັດນໍ້າ ເປັນສິນຄ້າ ແບບເປັນກຸ່ມ, ເປັນຟາມ ໄດ້ມີການຂະຫຍາຍຕົວ ມີຟາມລ້ຽງສັດທັງຫມົດ 1.989 ຟາມ ມີສັດລ້ຽງ 5.012.280 ໂຕ ຊຶ່ງອັນ ພົ້ນເດັ່ນແມ່ນ ຟາມລ້ຽງງົວ ເພີ່ມຂຶ້ນ 12 ຟາມ. ນອກຈາກນີ້ກໍຍັງມີຫຼາຍວຽກງານ ໃນຫຼາຍແຜນງານທີ່ພົ້ນເດັ່ນອີກຈໍານວນຫນຶ່ງ.

ແຫຼ່ງຂ່າວ ແລະ ຮູບພາບ: ຂ່າວເສດຖະກິດສັງຄົມ

ບົດຄວາມຫຼ້າສຸດ

ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກແຂວງຈໍາປາສັກ ໄດ້ຕ້ອນຮັບ ທ່ານ ເຫຼັກໄຫຼ ສີວິໄລ ກໍາມະການສູນກາງພັກ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ)...

ສປປ ລາວ ເຂົ້າຮ່ວມເປັນສະມາຊິກເຄືອຂ່າຍພັນທະມິດດ້ານທຸລະກິດປະຊາສຳພັນໃນອາຊີ (OAC)

ໃນວັນທີ 5 ພະຈິກ 2026 ທີ່ຜ່ານມາ, ສປປ ລາວ ໄດ້ເຂົ້າຮ່ວມການເປັນສະມາຊິກເຄືອຂ່າຍພັນທະມິດດ້ານທຸລະກິດປະຊາສຳພັນໃນອາຊີ ຫຼື One Asia Communications (OAC) ໃນເວທີປຶກສາຫາລືດ້ານການສື່ສານ...

ແກ້ໄຂຫຼາຍບັນຫາ ນະຄອນຫຼວງວຽງຈັນ ແກ້ໄຂບັນຫາຄວາມທຸກຍາກ ການຂາດແຄນຄູສອນ ການບໍລິຫານຈັດການຂີ້ເຫຍື້ອ

ກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ V ໄດ້ດໍາເນີນມາຮອດວັນທີ 13 ພະຈິກ 2026 ໄດ້ປິດລົງດ້ວຍຜົນສໍາເລັດອັນຈົບງາມ ພາຍໃຕ້ການເປັນປະທານຂອງ ທານ...

ກົດລະບຽບພາຍໃນ, ບໍ່ຈອດຊ້ອນຄັນ ຫຼື ກີດຂວາງທາງເຂົ້າ-ອອກ, ບໍ່ຈອງບ່ອນຈອດລົດສາທາລະນະດ້ວຍວັດຖຸ ແລະ ບໍ່ຫຼົບຫຼີກການຊຳລະຄ່າບໍລິການ.

ການຊອກຫາບ່ອນຈອດລົດໃນຕົວເມືອງຍັງກາຍເປັນບັນຫາທີ່ສ້າງຄວາມຫຍຸ້ງຍາກໃຫ້ແກ່ຜູ້ຂັບຂີ່ ໂດຍສະເພາະ ການຈອດລົດບໍ່ເປັນລະບຽບ, ທັງກີດຂວາງການສັນຈອນ ແລະ ສ່ຽງຕໍ່ການເກີດອຸບັດຕິເຫດ ເພື່ອແກ້ໄຂບັນຫາດັ່ງກ່າວ. ດັ່ງນັ້ນນະຄອນຫຼວງວຽງຈັນ (ນວ) ຈຶ່ງໄດ້ຮ່າງຂໍ້ຕົກລົງວ່າດ້ວຍ ການຄຸ້ມຄອງ ແລະ ພັດທະນາສະຖານທີ່ຈອດລົດ ເພື່ອວາງລະບຽບການຈອດລົດໃຫ້ເປັນລະບົບ...