ວັນທີ 17 ມີນາ 2023 ສານອາຍາລະຫວ່າງປະເທດ (ICC) ອອກໝາຍຈັບ ວະລາດິເມຍ ປູຕິນ ປະທານາທິບໍດີຣັດເຊຍ ຖານກໍ່ສົງຄາມໃນຢູເຄຣນ ໂດຍກ່າວຫາວ່າ ກໍ່ອາຊະຍະກຳສົງຄາມ ແລະ ສົ່ງໂຕເດັກນ້ອຍຢູເຄຣນຈຳນວນຫຼາຍອອກນອກປະເທດຢ່າງຜິດກົດໝາຍ.
ການເຄື່ອນໄຫວນີ້ມີຜົນເຮັດໃຫ້ລະບົບສານໃນ 123 ກຸ່ມສົນທິສັນຍາຂອງສານ ຈຳເປັນຕ້ອງຈັບກຸມ ປູຕິນ ຖ້າລາວຍັງເດີນທາງເຂົ້າໄປດິນແດນເຫຼົ່ານັ້ນ ແລະ ຈະຕ້ອງສົ່ງໂຕຜູ້ນຳຣັດເຊຍໄປຫາສານທີ່ກຸງເຮັກ ເພື່ອພິຈາລະນາຄວາມຜິດ.
ຣັດເຊຍຍັງຢືນຢັນການປະຕິເສດຂໍ້ກ່າວຫາທີ່ວ່າ ທະຫານຣັດເຊຍກໍ່ສົງຄາມ ແລະ ຄວາມຮຸນແຮງຕະຫຼອດໄລຍະເວລາ 1 ປີ ທີ່ເຮັດສົງຄາມໃນຢູເຄຣນ ຂະນະທີ່ທຳນຽບເຄຣມລິນ ກ່າວວ່າຄຳສັ່ງຂອງ ICC ນັ້ນ ເປັນໂມຄະ ແລະ ບໍ່ມີຜົນ.
ຣັດເຊຍ ແລະ ຢູເຄຣນ ຕ່າງກໍບໍ່ໄດ້ເປັນຄູ່ຮ່ວມສົນທິສັນຍາຂອງ ICC ແຕ່ວ່າລັດຖະບານຢູເຄຣນໄດ້ມອບອຳນາດໃຫ້ສານສາມາດພິຈາລະນາອາຊະຍະກຳສົງຄາມທີ່ເກີດຂຶ້ນໃນດິນແດນຢູເຄຣນ.
ສານອາຍາລະຫວ່າງປະເທດ (ICC) ບໍ່ມີໜ່ວຍງານຕຳຫຼວດເປັນຂອງຕົນເອງ ແລະ ຈຳເປັນຕ້ອງອາໄສຄວາມຮ່ວມມືຈາກຄູ່ຮ່ວມສົນທິສັນຍາ ໃນການຄວບຄຸມຜູ້ຖືກຫາຕາມໝາຍຈັບ.
ທັ້ງນີ້ ໝາຍຈັບຂອງສານຕັ້ງຂໍ້ສົງໄສວ່າ ປູຕິນ ຢູ່ພາຍໃຕ້ຄຳສັ່ງ ບັງຄັບໃຫ້ສົ່ງໂຕເດັກນ້ອຍ ແລະ ປະຊາຊົນອອກຈາກດິນແດນຢູເຄຣນຢ່າງຜິດກົດໝາຍ ນັບຕັ້ງແຕ່ ວັນທີ 24 ກຸມພາ 2022 ເປັນຕົ້ນ.
ຣັດຖະບານຢູເຄຣນອ້າງວ່າ ມີເດັກນ້ອຍ 16,000 ຄົນ ຖືກບັງຄັບໃຫ້ສົ່ງໂຕໄປຍັງຣັດເຊຍ ຫຼື ດິນແດນຂອງຢູເຄຣນທີ່ຢູ່ພາຍໃຕ້ການຄວບຄຸມຂອງຣັດເຊຍຢ່າງຜິດກົດໝາຍ.
ປູຕິນ ຖືເປັນຜູ້ນຳປະເທດ ຄົນທີ 3 ຂອງໂລກທີ່ຖືກໝາຍຈັບຂອງສານ ICC ຖັດຈາກ ປະທານາທິບໍດີ ໂອມາອັນ ບາຊີ ແຫ່ງຊູດານ ແລະ ມູອັມມາ ກັດດາຟີ ອະດີດຜູ້ນຳລິເບຍ.
ແຫຼ່ງຂ່າວ Reuters