ຖືວ່າເປັນປະເດັນທີ່ກຳລັງເປັນກະແສໃນສັງຄົມ ເມື່ອນັກສຶກສາທີ່ມະຫາວິທະຍາໄລແຫ່ງໜຶ່ງ ຕ່າງພາກັນກຽມພ້ອມທີ່ຈະໄປທັດສະນະສຶກສາທີ່ຕ່າງແຕ່ ແຕ່ຜົນປາກົດວ່າເງິນທີ່ສັງລວມເພື່ອຈ່າຍຄ່າໃຊ້ຈ່າຍຕ່າງໆນັ້ນ ໄດ້ຖືກຍັກຍອກໄປແລ້ວ.

ຈາກການສອບຖາມຂອງນັກສຶກສາພາຍໃນນັ້ນ ໄດ້ໃຫ້ຮູ້ວ່າ: ໃນວັນພຸດ ທີ 15 ກຸມພາ ທີ່ຜ່ານມາ ກໍຄືກ່ອນມື້ໄປທັດສະນະພຽງ 1 ມື້ ມີອາຈານແຈ້ງເຂົ້າກຸ່ມຫ້ອງຮຽນວ່າ  “ພົບບັນຫາທີ່ເກີດຂຶ້ນກັບການໄປທັດສະນະ ໂດຍນັກສຶກສາຜູ້ທີ່ຮັບຜິດຊອບຄ່າລົດ ບໍ່ໄດ້ຈ່າຍຄ່າລົດ ແລະ ຜູ້ກ່ຽວບໍ່ມີເງິນຄ່າຈ່າຍແລ້ວ, ຖ້າບໍ່ໄດ້ໄປທັດສະນະມື້ອື່ນ ແມ່ນນັກສຶກສາຕ້ອງໄດ້ເກັບຄືນຄ່າລົດ 550.000 ກີບ ພ້ອມກັບຄ່າປັບໃໝຕ່າງໆ, ຖ້ານັກສຶກສາໄປ ມີແຕ່ຕ້ອງຈ່າຍຄືນສ່ວນຄ່າລົດ 550.000 ກີບ”.

“ສ່ວນຜູ້ທີ່ຍັກຍອກເງິນໄປ ແມ່ນຈະໄດ້ໃຊ້ກົດລະບຽບ ກົດໝາຍ ທວງຄືນກັບຜູ້ກ່ຽວ ເມື່ອໄດ້ແລ້ວຈະຈ່າຍໃຫ້ນັກສຶກສາໃນພາຍຫຼັງ”.

ໂດຍກ່ອນໜ້ານີ້ ຜູ້ກ່ຽວກໍໄດ້ປອມແປງ ບິນການໂອນເງິນ ຈຳນວນ 25 ລ້ານ ແລະ 40 ລ້ານ ເພື່ອສົ່ງໃຫ້ອາຈານໄດ້ຊາບວ່າໂອນຈ່າຍຄ່າລົດໄປທັດສະນະແລ້ວ.

ເມື່ອໃຫ້ຮອດມື້ໄປທັດສະນະ ທາງອາຈານກໍໄດ້ເປັນຄົນໂທຖາມລົດໂດຍສານທີ່ຈະໄປທັດສະນະ ເພື່ອກຽມພ້ອມ ຫຼັງຈາກນັ້ນຈຶ່ງໄດ້ຮູ້ຄວາມຈິງວ່າຜູ້ກ່ຽວບໍ່ໄດ້ຈ່າຍ ແລະ ບິນການໂອນເງິນນັ້ນ ກໍເປັນບິນປອມທີ່ຜູ້ກ່ຽວໄດ້ປອງແປງຂຶ້ນມາ.

ເມື່ອສັງລວມຈຳນວນເງິນທັງໝົດແລ້ວມີປະມານ 260 ລ້ານກີບ ທີ່ຖືກຍັກຍອກໄປ.

ຈາກປະເດັນດັ່ງກ່າວ ເຮັດໃຫ້ນັກສຶກສາຈຳນວນຫຼາຍບໍ່ພໍໃຈ ແລະ ສັງຄົມອອນລາຍກໍຕັ້ງຄຳຖາມວ່າ: ເປັນຫຍັງຄືໃຫ້ນັກສຶກສາເປັນຄົນເກັບກຳເງິນຈຳນວນຫຼາຍແບບນີ້?

ແລະເປັນຫຍັງຕ້ອງໄດ້ຈ່າຍຄ່າປັບໃໝໃຫ້ແກ່ລົດໂດຍສານຕື່ມອີກ?

ໃນຄວາມຮັບຜິດຊອບນີ້ ຄວນເປັນອາຈານ ແລະ ຄະນະຕ້ອງຮັບຜິດຊອບຫຼືບໍ່??

ປັດຈຸບັນ ກໍຍັງບໍ່ສາມາດແກ້ໄຂບັນຫານີ້ໄດ້ ພ້ອມກັບຕິດຕາມວ່າເລື່ອງຈະຈົບໃນແບບໃດ.